ورلڈ کونسل آف ریلیجنز، پاکستان اسرائیل کی طرف سے فلسطین پر کیے جانے والے حملوں کی شدید مذمت کرتی ہے۔اسرایل کے ۸ جولائی سے ہونے والے حملوں میں شہید ھونے والوں میں اکثریت بچوں اور عورتوں کی ہے اور اسرائیل نے فلسطین پر ظلم و زیادتی اور حیوانیت کی تمام حدیں پار کر دی ہیں۔جان بوجھ کر عام لوگوں کو نشانہ بنایا جا رہا ہے۔مسلم امہ کو چاہیے کہ وہ اس مشکل وقت میں فلسطین کا بھرپور ساتھ دے۔ان خیالات کا اظہار مولانا محمد حنیف جالندھری نے ایک پریس بریفینگ کے دوران کیا۔انہوں نے مزید کہاکہ فلسطین کے نہتے اور بے گناہ مسلمانوں کے خلاف اسرائیلی وحشت و بربریت ناقابل تلافی جرم ہے اسرائیلی جارحیت نے خطے کا امن تباہ کر رکھا ہے مگر اقوام متحدہ اور انسانی حقوق کی عالمی تنظیموں نے خاموشی اختیار کر رکھی ہے۔ انہوں نے اقوام متحدہ سے مطالبہ کیاکہ فلسطینیوں کی نسل کشی بند کروانے میں اپنا موثر کردار ادا کرے۔ مزید اُنہوں نے حکومتِ پاکستان پر زور دیا کہ اقوامِ متحدہ کی جنرل اسمبلی میں اپنی آواز فلسطینیوں کے حق میں بلند کی جا ئے اور عالمی سطح پر مسلمانوں کے خلاف نا انصافیوں کو روکنے میں موثر کردار ادا کرے۔
