میرے ایک دوست ہیں ، بہت پیارے، بہت دھیمے ، بہت معیار پسند،بہت حکمت پسند اور استدلال پسند۔حافظِ قرآن ہونے کے ساتھ ساتھ اسلام کو پورے وثوق و وجود سے سمجھنے سمجھانے کے لیے آج کل پی ایچ ڈی کر رہے ہیں۔ معیار پسند نہ ہوتے تو ایم اے اسلامیات پہ اکتفا کیے بیٹھے ہوتے۔ اُن سے اکثر ملنے کو جی چاہتاہے۔ بے تکلف دوستی کا ہم بھی فائدہ اُٹھانے سے باز نہیں آتے ۔ جب بھی اُن کے شہر میانوالی جانا ہو اور وہ بھی لاہور سے گھر تشریف لائے ہوئے ہوں تو بس فون کیا اور کہہ دیا کہ جناب آپ سے شرفِ ملاقات چاہیے۔ وہ ویلے ہوں نہ ہوں ، ہم انہیں ویلا ہی سمجھتے ہیں اور ملنے کا واویلا شروع کردیتے ہیں۔
گزشتہ روز ایک تعلیمی کانفرنس میں شرکت کے لیے گورنمنٹ بوائز کالج میانوالی جانا ہوا۔ جس کا اہتمام تنظیم اساتذہ پاکستان نے کررکھاتھا۔ جس میں تنظیم اساتذہ پاکستان کے صدر پروفیسر میاں محمد اکرم صاحب اور سابق کنٹرولر امتحانات ساہیوال غلام اکبر قیصرانی صاحب خصوصی طور پرشریک ہوئے۔ ہم گئے تو تھے ایک استاد کے ناطے پروگرام میں شرکت کرنے مگر پچھلے دس سال سے ہمیں ہمارے دوست استاد سے زیادہ صحافی سمجھتے ہیں جس کی بدولت ہمارے ہال میں پہنچتے ہی سٹیج سیکرٹری کے فرائض سرانجام دینے والے ہمارے بہت قابلِ احترام دوست حافظ محمد مشتاق خان اور بھائی عبدالرزاق نیازی نے بطورِ صحافی متعارف کرانے کی ٹھان لی۔ حالانکہ اب اُن کو کیسے سمجھایاجائے کہ بھائی چالیس کلومیٹر دُور سے میانوالی شہر پروگرام میں شرکت کے لیے صحافی اپنی جیب خرچ پر کیسے آسکتاہے؟ ایسے پروگرامز میں تو شہر کے صحافی بھی یوں نہیں آتے جب تک کہ باقاعدہ اور بافائدہ دعوت نہ دی جائے۔
اس پروگرام میں بھی مقامی صحافی ایک بھی نہیں دیکھا گیا۔ میرے ایک سینئر صحافی دوست رحمت اللہ خان ہزارے خیل بھی اس پروگرام میں تشریف لائے۔ وہ بھی بنیادی طور پر استاد ہیں اور وہ یہاں بھی اساتذہ کی محبت میں آئے تھے ورنہ بیس پچیس کلومیٹر دُور سے آنا اور بزرگی کی عمر میں کیمرہ اُٹھائے مقررین و شرکاء کی تصاویر بنانا ایک صحافی کے لیے آسان عمل نہیں ہوتا۔ ہمارے ہاں بڑے شہروں کو چھوڑ کر ہر صحافی ،صحافی کے ساتھ ساتھ کیمرہ مین کے فرائض بھی سرانجام دیتاہے اور وہ بھی بالکل مفت میں۔حالانکہ صحافی اور کیمرہ مین کے الگ الگ شعبہ جات ہیں۔ کیمرہ مین تصویر بناتا اور صحافی اُس تصویر کے چھپے راز افشا کرتاہے۔
دوستوں کا ہمیں صحافی سمجھنا شاید اس لیے ہے کہ ہم بچوں کو پڑھاتے ہیں سو وہی ہمیں استاد سمجھتے ہیں، دوستوں کے استاد بننا ہمارے بس میں کہاں۔ اچھا ہے دوست ہمیں” استاد” نہیں سمجھتے ورنہ دوسروں کو بھی ہم سے بچے رہنے کا مشورہ صادر فرما دیتے۔
تعلیمی کانفرنس تو واقعی تعلیمی کانفرنس ثابت ہوئی ۔ ہم تو گئے تھے کہ چلو اساتذہ کے حقوق کی بات ہوگی ۔ پے پیکیج اور ٹائم سکیل کی خوشخبری ، میڈیکل سہولیات دیگر مراعات کے حصول کامژدہ سنایا جائے گا مگر یہاں تو اساتذہ کو حقوق سے زیادہ اپنے فرائض کی طرف متوجہ کرنے کی کوشش کی گئی۔امیر المومنین سیدنا عمرؓ کا ایک قول اساتذہ کو خبردار کرنے کے لیے خصوصی طور پر چسپاں کیاگیاتھا اور عبدالرزاق نیازی نے مائیک پر اس قول کو پڑھنے کی طرف متوجہ بھی کیا کہ اپنا احتساب کرلو اس پہلے کہ کوئی دوسرا تمہارا احتساب کرے۔اسی طرح اساتذہ کو امیر المومنین سیدنا علیؓ کا یہ قول بھی بتایاگیاکہ لوگوں کے ساتھ اُن کی عقل کے مطابق بات کیا کرو۔
اساتذہ کے حقوق کی بات بھی ہوئی ، پاکستان کے وسائل کی امارت بھی پورے پورے اعداد و شمار کے مطابق بیان کی گئی۔ سی ایم پنجاب کے خوشامدی ٹولہ اور تین عدد غیرملکی ماہرین کو پاکستان کے تعلیمی نظام کو برباد کرنے کاذمہ دار بھی ٹھہرایا گیا۔ تعلیمی نظام کوبے سمت دوڑتا گھوڑا بھی قرار دیاگیا۔مخلوط تعلیم اور بوائز سکولز میں خواتین اساتذہ کی تقرری سمیت بہت سی باتوں کو سازش بھی قرار دیاگیا لیکن آخر پہ نچوڑ یہی پیش کیاگیاکہ ہر قسم کے کٹھن اور مشکل حالات میں بھی اصل ہتھیار استاد کے ہاتھ میں ہے۔ نظریہ پاکستان کی اساس کے خلاف استاد کسی صورت نئی نسل کو لے کر نہ جائے۔ نصاب چاہے جیسا بھی آجائے، اصل نصاب تو استادکے دماغ میں ہوتاہے۔ استاد کا دماغ اسلام و پا کستان کے ساتھ سوچے گا تو نئی نسل بھی یہی سوچے گی۔
تنظیم اساتذہ پاکستان کے ایک ذمہ دار غلام اکبر قیصرانی صاحب نے بتایاکہ ہم تھنک ٹینک کے طور پر مختلف لائحہ عمل اور فارمولاز بنا کر حکومت اور دوسری اساتذہ تنظیموں کو دیتے ہیں اور ان کے منظور کرانے کے لیے اپنی آواز ایوانِ اقتدار تک پہنچاتے ہیں۔چار درجاتی فارمولا بھی ہماری کوششوں سے ملاہے۔ٹائم سکیل سات سات پانچ کا فارمولا بلوچستان کے اساتذہ پرلاگو ہوچکاہے اور ہماری کوشش ہے کہ پنجاب میں بھی اس کا اطلاق ہوجائے۔ میاں محمد اکرم صاحب نے کہاکہ ہم نے اللہ کی نعمتوں کا شکر ادا نہیں کیاجس کی بدولت ہم رسوا ہو رہے ہیں۔
بات سے بات نکلتی گئی اور مذکورہ وضاحتیں لکھنا پڑ گئیں۔ورنہ کالم تو ایک معجزہ بیان کرنے کی خاطر شروع کیاتھا۔ قارئین بھی حیران ہونگے کہ کیا پیغمبر ﷺ کی رحلت کے بعد بھی معجزہ؟؟؟ مگر جو بات پیغمبر ﷺ کی بات سے رونما ہو وہ معجزہ ہی تو ہوتی ہے۔ اور جو کسی صحابی یابعد کے ولی سے سرزد ہو وہ کرامت۔
میرے دوست حافظ صاحب ہیں تو بے ریش مگر ایمان و تقوی انتہائی قابلِ رشک۔قسمت کی بات ہے بہت سے باریشوں سے اسلام پناہ مانگتاپھرتاہے اور بہت سے بے ریشوں کی صحبت میں ایمان امان پاتاہے۔ اُن کاکہنا تھاکہ اُن کے والد محترم بہت صحت مند جسم و دماغ کے مالک تھے۔ اچانک ایک دن طبیعت ناساز ہوگئی اور بھوک ختم ہوکے رہ گئی۔ کھانا دیکھ کے متلی ہونے لگتی۔ ہم میانوالی شہر میں دِل کے معروف و مسعود سمجھے جانے والے ڈاکٹر کے پاس لے گئے۔ ڈاکٹر نے دِل کا مرض سمجھ کے علاج شروع کردیا۔کچھ روز کے مسلسل علاج کے بعد بھی والد صاحب کوافاقہ نہ ہوا۔ ہر بار ڈاکٹر کہہ دیتے کہ اب کی بار آپ ٹھیک ہوجائیں گے۔ والد کو ہم آخری بار جب اس ڈاکٹر کے پاس لے کے گئے ۔ ڈاکٹر نے نسخہ لکھا اوریہ کہتے ہوئے ابا جی کی طرف بڑھایا جیسے ایک اور ”طارق” نے پھر کشتیاں جلا دینے کا آرڈر لکھ دیاہو۔یہ ایسا نسخہ ہے کہ اس کے بعد تو کوئی گنجائش ہی نہیں رہے گی۔اب آپ بالکل ٹھیک ہوجائیں گے۔ابا جی جو بہت صاف گو واقع ہوئے تھے، نسخہ واپس کرتے ہوئے بولے ڈاکٹر صاحب آپ کی ڈاکٹری دیکھ لی ، اب ہم کسی اور شہر کا رُخ کرتے ہیں۔
نہایت پرسکون لب ولہجے میں حافظ صاحب نے بات جاری رکھی۔ابا جی کو ہم اسلام آباد لے گئے۔ پورا دن مختلف ٹیسٹ ہوتے رہے۔ دل کی ای سی جی کی جگہ دل کا الٹرا ساؤنڈ تک کردیاگیا اور ڈاکٹرز نے کہا: ان کا دِ ل تو بالکل بچاہوا ہے بلکہ بچہ ہے۔ اور اگر کوئی ٹھوکرنہ لگی تو آئندہ بھی قریب قریب اس کے کمزور ہونے کا کوئی امکان نہیں۔ مزید ٹیسٹس کے بعد واضح ہوا کہ ابا جی کو دِل کا نہیں گردوں کا مرض لاحق ہے۔ہفتہ میں دو بارڈائلسزdialysisتجویز ہوئے۔
حافظ صاحب نے اپنے معیار پسند ہونے کا ثبوت دیتے ہوئے بہت محدود سے بھی کم وسائل ہونے کے باوجود اسلام آباد کے سب سے معیاری ہسپتال کا انتخاب کیا۔ کچھ دوست رشتہ داروں نے کہا بھی کہ وہاں بہت خرچ ہوگا۔ مگر حافظ صاحب نے کہا: وہاں علاج بھی تو معیاری ہوگا۔ جب وسائل ختم ہوگئے توکسی سستے ہسپتال کا رُخ کرلیں گے۔ہفتے میں دوبار کچھ ہفتے میانوالی سے اسلام آباد آنا جانا لگا رہا۔ ساتھ ساتھ دوست احباب مختلف ٹوٹکے بھی بتاتے رہے۔ ایک دن حافظ صاحب کی نظروں سے ایک حدیث گزری یا کسی نے اس حدیث کی طرف متوجہ کیا کہ اس مرض کے لیے اونٹنی کا دودھ شفا ہے۔حافظ صاحب نے اسلام آباد کے ڈاکٹر سے اونٹنی کے دودھ کا ذکر کیا تو ڈاکٹر صاحب نے جھٹ جواب دیا ۔ نہیں نہیں بالکل نہیں ، اونٹنی کا دودھ تو گردوں کے مریض کے لیے زہرِ قاتل ہے۔ دودھ پیتے ہی مریض زندگی سے ہاتھ دھو بیٹھے گا۔ جب گھر آکر ابا جی سے اس بارے گفتگو ہوئی تو ابا نے پوچھا مجھے اس حدیث کی صحت بتائیں ۔ حافظ صاحب نے بتایاکہ یہ حدیث ہے تو صحیح۔ والد صاحب نے کہاکہ پھر ٹھیک ہے ۔ گھر میں خواتین وغیرہ کے سامنے ذکر نہ کرنا۔ جب حدیث صحیح ہے تو پھر میرے پیارے نبی محمد رسول اللہ ﷺ کی بات کیسے نعوذباللہ غلط ہوسکتی ہے۔ میں اونٹنی کا دودھ پیوؤں گا۔
حافظ صاحب گویا ہوئے : اونٹنی کے دودھ کی تلاش شروع کردی جو نورپور تھل کی جانب رواں دواں ایک قافلے سے اونٹنی کا دودھ میسر آگیا۔ ایک عزیز نے دودھ گھر پہنچا دیا۔ جمعہ کا دن تھا، والد صاحب نے نمازِ جمعہ کے لیے غسل کیا۔ نئے کپڑے زیب تن کیے۔ جمعہ کی ادائیگی کے بعد گھر لوٹے تو مجھے دودھ لانے کو کہا۔ ایسے لگ رہاتھاکہ ابا جی آج ہر قسم کے حالات کے لیے ذہنی طور پر تیار ہیں۔ ہم نے بھی کسی ایمرجنسی کی صورت میں آئندہ کا لائحہ عمل تیار کرلیا۔ تاکہ اگر دودھ پینے کے بعد ابا جی کی طبیعت بگڑے تو فی الفور ہسپتال پہنچا کر جان بچانے کی کوشش کی جائے۔
ابا جی نے اللہ کا نام لے کر دودھ پی لیا۔ میں پریشانی کی حالت میں بیٹھا، حادثے اور معجزے کا انتظار کرنے لگا۔ آدھا گھنٹا گزر گیا ، ابا جی جوں کے توں رہے۔ گھنٹا پھر دو گھنٹے گزر گئے مگر ابا کی حالت خراب نہ ہوئی۔ میری جان میں جان آئی کہ چلو اونٹنی کے دودھ نے منفی ردِعمل نہیں کیا۔ رات کو بھی میں اباجی کے کمرے میں سویا اور اباجی کو زور دے کر کہاکہ رات کو جب بھی طبیعت خراب ہو مجھے فوراََ اُٹھا دینا۔ ساری رات گزر گئی۔ اباجی معمول کی پرسکون نیند سوئے رہے۔ اگلے یا اُس سے اگلے دِن ہم نے ڈائلسز کے لیے اسلام آباد جانا تھا۔ ہسپتال پہنچے تو حسبِ معمول ڈائلسز سے پہلے ٹیسٹ کرائے گئے۔ رپورٹس دیکھ کے ڈاکٹر نے کہاکہ دوبارہ ٹیسٹ کرائیں۔ مجھے رپورٹس ٹھیک نہیں لگ رہیں۔ میں ڈر گیا اور اباجی کو بھی بتایاکہ اللہ خیر کرے آج تو دوبارہ ٹیسٹ کرائے جارہے ہیں، معاملہ کچھ ٹھیک نہیں لگ رہا۔پتا نہیں اونٹنی کے دودھ نے کیا کردیاہے۔ دوبارہ ٹیسٹ کے بعد بھی ڈاکٹر کو وہی نتیجہ ملا۔ ڈاکٹر صاحب ہکا بکا رہ گیا۔ انہوں نے کہاکہ رپورٹس کے مطابق تو آپ کے ابا جی کو اب ڈائلسزdialysis کی ضرورت ہی نہیں۔ کیاکیاہے؟ کیا کچھ کھایا پیا ہے ؟ ان کے گردے تو بالکل ٹھیک کام کررہے ہیں۔ حافظ جی نے ڈاکٹر کو اونٹنی کے دودھ کا قصہ سنا دیا۔ ڈاکٹر نے حیرت سے بات سُنی اور ہفتے میں دوبارآنے کے بجائے دو ہفتوں بعد دوبارہ چیک اپ کے لیے آنے کو کہا۔
حافظ صاحب کا کہنا تھاکہ اس دوران میرے اباجی اونٹنی کا دودھ کئی بار استعمال کرتے رہے ۔ بفضلِ خدا طبیعت ٹھیک رہی۔ دو ہفتوں بعد ڈاکٹر کے پاس گئے تو ٹیسٹ رپورٹس پہلے سے بھی زیادہ اچھی تھیں۔ ڈاکٹر نے کہاکہ اب آپ کے ابا کو دوبارہ چیک اپ کی ضرورت نہیں مگر احتیاطاََ تین ماہ بعد چیک کرا لینا۔ ہم تین ماہ بعد گئے تو سب اچھا کی رپورٹ ملی۔
بعد میں کئی لوگ اباجی سے اس بارے مشورہ مانگتے رہتے تھے ۔ وہ سب متاثرین کو کہتے تھے کہ ہم نے تو فرمانِ مصطفیﷺ پر زندگی اور موت کی بیت کرلی تھی۔ ہم آپ کو اس بارے کوئی مشورہ دینے کے قابل نہیں ۔ ہر بندہ خود تحقیق کرکے اپنے حالات اور دِل و دماغ سے پوچھ کرفیصلہ کرے۔ ہمارے لیے تو حدیثِ مصطفیﷺ کی روشنی میں اونٹنی کا دودھ معجزہ ثابت ہوا۔
