داؤدخیل (ذوالفقارخان)جہاں تک ہو سکا میں نے دکھی انسانیت کی خدمت کا مشن جاری رکھا ہوا ہے اور جب تک زندہ ہوا اللہ کے بندوں کی خدمت کرتا رہوں گا۔ نظریہ پاکستان ہمارے چینل کی اساس ہے۔ ان خیالات کا اظہار نجی ٹی وی کے چیئرمین اور ممبراسلامی نظریاتی کونسل علامہ افتخار نقوی نے اپنے ٹی وی کی چوتھی سالگرہ کے موقع پر کھاد فیکٹری کے گیسٹ ہاؤس اسکندرآباد میں منعقدہ تقریب سے خطاب کرتے ہوئے کیا۔ انہوں نے کہا کہ میانوالی میرا آبائی ضلع نہیں ہے میرے آباواجداد مظفر گڑ ھ سے ہیں لیکن اب میانوالی میرا گھر ہے ۔ میری کوشش ہے کہ میں میانوالی کی عوام کی محرمیوں کا ازالہ کروں۔ ضلع میانوالی کے ساتھ ہمیشہ ناانصافیاں کیں گئیں ہیں ا سکے پہاڑوں میں تمام معدنیات موجو دہیں لیکن یہاں سے دوسرے اضلاع کو بھیجی جاتی ہیں اگر ان کے کارخانے اسی ضلع میں ہوتے تو آج یہ ضلع پورے ملک کا خوشحال ضلع ہوتا۔ انہوں نے کہا کہ ہمارے چینل پر مکمل اسلامی اقدار کی عکاسی کی جا رہی ہے ۔ نائب امیر جماعت اسلامی عبد الوہاب نیازی نے کہا کہ سچ ٹی وی نے ہر مکتبہ فکر کو نمائندگی دے کر اسلامی تشخص کو اجاگر کررہاہے۔ یہی وجہ ہے کہ اب عوام میں اس چینل کی مقبولیت میں اضافہ ہو رہاہے ۔خادم میانوالی عظمت اللہ خان نے کہاکہ سچ ٹی وی مقامی سطح کے مسائل کو اُجاگر کرنے کی وجہ سے عام آدمی کی آواز بن چکاہے۔ ہلڑبازی سے اجتناب کرکے پاک فوج اور نظریہ پاکستان کی پاسداری اس نیوز چینل کی وجہ امتیاز ہے۔ نواب آف کالاباغ ملک وحید خان نے کہاکہ ہماری خوش قسمتی ہے کہ اس نیوز چینل کا چیئرمین ہمارے ضلع کو اپنا گھر سمجھتاہے ، اس سے ہمارے ضلع کے مسائل ملکی اور بین الاقوامی سطح پر اجاگر ہوں گے۔تحصیل صدر جاوید اقبال ،حاجی شیکا خان ،ڈاکٹر آصف مغل ،ریاض خان صدر یونین مزدور،سید زاہد عباس و دیگر نے بھی خطاب کیا اور چینل کو چوتھی سالگرہ پر مبارکباد دی اور چینل کے لیے نیک تمناؤں کا اظہار کیا آخر پر چیئرمین ٹی وی چینل علامہ افتخار نقوی نے کیک کاٹا اور شرکاء تقریب میں کیک اور مٹھائی تقسیم کی گئی۔ سالگرہ تقریب میں ضلع بھر سے درجنوں افراد نے شرکت کی۔
