داؤدخیل (نامہ نگار)داؤدخیل کے تاجران ،دوکانداروں کی جانب سے غنڈہ ٹیکس ،بھتہ خوری ،اور چوری کی وارداتوں کے خلاف ایک جلسہ منعقد کیا جس میں ضلعی صدر انجمن تاجران عطاء اللہ خان شہباز خیل نے داؤدخیل انجمن تاجران کے عہدیداروں اور درجنوں دکانداروں سے خطاب کرتے ہوئے کہا کہ داؤدخیل میں بھتہ خوری ،چوری کی وارداتوں کی روک تھام کے لیے ہمیں متحد ہو نا ہو گا ۔انہوں نے کہاکہ ہم محنت سے روزی کماتے ہیں اگر ہم لوگ بھتہ خوری کے خلاف آواز بلند نہ کریں گے تو ہمارے حالات بہتر نہیں ہو نگے ۔انہوں نے کہا کہ ڈی پی او میانوالی سر فراز ورک نے کہا کہ شہری بھتہ خور کی اطلاع دیں۔وہ چوبیس گھنٹوں کے اندر اندر قانون کی گرفت میں ہو گا۔ اگر آپ متحد ہوئے تو کوئی آپ کا بال بھی بیکا نہیں کر سکتا۔ انہوں نے انجمن تاجران کوساؤنڈ سسٹم دینے کا بھی اعلان کیا۔ امجد عبا س خان نے کہا کہ ہمارے بعض کمزور دکاندار خفیہ بھتہ دیتے ہیں جس کی وجہ سے بھتہ خور وں کو شہہ مل رہی ہے۔ ہم اپنے تمام دکانداروں کے ساتھ ہیں۔ جماعت اسلامی کے عبد اللہ خان نے کہاکہ بھتہ خوری، جوا، ڈاکہ زنی، چوری چکاری اور منشیات فروشی سب بُرے اور حرام افعال ہیں۔ جو ان کاموں میں ملوث ہے وہ اپنی دُنیا و آخرت دونوں خراب کررہاہے۔ ہم دکاندار ایک دوسرے کے شانہ بشانہ کھڑے ہیں۔بھتہ خوروں کو سخت سے سخت سزا ملنی چاہیے۔ضلعی جنرل سیکرٹری الطاف شاہ نے بھی جلسہ سے خطاب کیا ۔
