داؤدخیل( نامہ نگار)اسکندرآباد میں انڈسٹریز کے سکولزکی فیسیں کئی گنا بڑھادی گئیں جو کہ 1956ء میں علاقہ کے عوام سے کئے جانے والے معاہدے کی کھلی خلاف ورزی ہے۔ماڈل ہائی سکول ،پری پرائمری سکول میں داخل ہونے والے معصوم بچوں سے 750روپے ماہانہ جبکہ 3500روپے داخلہ فیس وصول کی جارہی ہے۔ سیاسی شخصیت حسن رضا شاہ نے پریس سے بات چیت کرتے ہوئے کہاکہ دونوں فیکٹریوں کو سکولزکے تمام تر اخراجات اٹھانا ہونگے او رعلاقہ کے عوام کومفت تعلیم دینا ہوگی ۔انہیں فیسوں کا موجودہ شیڈول نامنظور ہے وہ اس اہم ترین عوامی مسئلے کولیکر عدالت بھی جائیں گے اور شدید احتجاج بھی کریں گے ۔انہوں نے مزیدکہاکہ انٹر گرلز کالج اسکندرآباد میں غریب بچیوں سے پندرہ سو روپے ماہوار فیس لی جارہی ہے، بات کرنے پرانتظامیہ کہتی ہے کہ ان فیسوں سے اساتذہ کی تنخواہیں پوری کی جارہی ہیں،اربوں روپے منافع کمانے والے ،لاکھوں روپے ثقافت کے نام پر فحاشی اورعیاشی پہ لگا نے والے اساتذہ کی تنخواہیں غریب لوگوں کی جیبیں کاٹ کر دے رہے ہیں۔جب کوئی بات بنتی ہے تو یہی ادارے کہتے ہیں کہٍ ہم علاقہ کے غریب عوام کوفری ایجوکیشن دے رہے ہیں اگر یہ بات سچ ہے تو فری ایجوکیشن میں فیسیں نہیں لی جاتی بلکہ غریب بچوں کوکتابیں کاپیاں و دیگر سامان یونیفارم وغیرہ بھی مہیا کیاجاتا ہے ۔اربوں روپے منافع کمانے والے فیکٹری مالکان اور اُن کی انتظامیہ ہمارے علاقے کے ساتھ بھونڈا مذاق بند کریں اور ہمیں ہمارے حقوق دیں۔
