داؤدخیل (خصوصی سروے:ذوالفقارخان)چار یونین کونسل داؤدخیل،ڈھیر امید علی شاہ،پائی خیل اورموچھ کیلئے بنایا جانے والا مشترکہ قدیمی سیم نالہ موضع محمدیار والا کے مقام پرمحکمہ انہار میانوالی کی طرف سے مبینہ غفلت ،لاپرواہی اور گزشتہ پانچ سالوں سے بھل صفائی نہ ہونے کی وجہ سے بند تھاجبکہ حالیہ شدید بارشوں کی وجہ سے ڈی سی او میانوالی کے حکم کے مطابق مذکورہ چار یونین کونسل کا بارشی پانی بھی سیم نالہ میں ڈال دیا گیاجسکی وجہ سے سیم نالہ میں طغیانی اور اوورفلو کی وجہ سے سارا اخراجی پانی موضع محمدیار والا میں پھیلی تقریباًدس ہزار کنال پر کھڑی گندم کی فصل میں داخل ہو گیاجسکی وجہ سے گندم کی فصل مکمل تباہ اور کسانوں کی کا پیسہ اور محنت بالکل برباد ہو گئی اور گندم کی فصل پکنے سے پہلے ہی گل سڑ چکی ہیں۔اس سلسلہ میں موضع محمدیار والا کے کسانوں اور زمینداروں نے محکمہ انہار ضلعی انتظامیہ کے میانوالی کی طرف سے مبینہ غفلت ،لاپرواہی کے خلاف بھرپوراحتجاج کیا ۔مقامی زمیندار ہدایت اللہ خان نے بتایا کہ سیم نالہ کی صفائی کیلئے ہم گزشتہ تین سالوں سے ایکسےئن محکمہ انہار میانوالی کے پاس جا رہے ہیں کہ نالہ کی کھدائی قانوناًہر سال محکمہ انہار نے 10فٹ کرنی ہوتی ہے وہ توکی جائے لیکن اسکی طرف کوئی توجہ دی گئی اور صفائی نہ کھدائی کی گئی جس کے نتیجہ میں اس تباہی نے ہماری کمر معاشی طور پر توڑ کے رکھ دی ۔ہمیں ہر سال گلی سڑی اور کچی گندم کاٹ کر چارے کے طور پر مویشیوں کو کھلانا پڑتی ہے۔ زمیندار مولوی جہانگیر خان نے کہاجب ہم وفد کی صورت میں ضلعی محکمہ انہارکے آفیسران سے ملے وہ لوگ موقع پر آئے بھی اور انھو ں نے یہ بات تسلیم کی کہ سیم نالہ کی کھدائی قانوناً ہر سال ہونی چاہئے تھی لیکن نہ ہو سکی ۔ زمیندارزبیر خان،ربنواز خان،رفیع اللہ ملک،اسلم خان و دیگر نے بتایا کہ مذکورہ سیم نالہ موضع محمدیار والا کی سیم اور علاقہ کی نکاسی آب کیلئے بنایا گیا تھالیکن اسکی بندی کی وجہ سے گلیوں میں کھڑا بارشی پانی تعفن زدہ ہو چکا ہے اور ساری سیم ہمارے گھروں کو دیمک کی طرح چاٹ رہی ہے ۔ ہر سال ضلعی محکمہ انہار کے پاس اسکی کھدائی اور صفائی کا فنڈ بھی آتا ہے جواس پر خرچ کبھی نہیں کیا جاتا بلکہ سارا فنڈ خرد برد کر لیا جاتا ہے جسکی وجہ سے حالات یہ ہیں کہ علاقے کے زمیندار اوں کی ہزاروں کنال زرعی اراضی تباہ ہو چکی اور اسکے گھروں میں فاقوں تک نوبت آ چکی ہے اور اس سیم نالہ کی صفائی اورکھدائی نہ ہونے کی وجہ سے ہر سال علاقے کے زمیندار اوں اور کسانوں کا معاشی قتل گندم اور دھان کی فصلوں کی تباہی کی صورت میں کیا جاتا ہے ۔موضع محمدیار والا کے کسانوں اور زمینداروں نے محکمہ انہار،ضلعی انتظامیہ میانوالی،ای ڈی او زراعت و خوراک میانوالی سے مطالبہ کیا ہے کہ ہنگامی بنیادوں پر سیم نالہ کی صفائی اورکھدائی کی جائے اور آئندہ بھی ہر سال اسکی صفائی اورکھدائی ممکن بنائی جائے علاوہ ازیں کسانوں اور زمینداروں کے ہونے والے سیم نالہ میں طغیانی اور اوورفلو اور شدید بارشوں کی وجہ سے فصلوں کے نقصانات کا مالی ازالہ بھی کیا جائے۔
