داؤدخیل( نامہ نگار) رنگے ہاتھوں گرفتار ایس ڈی او معطل ہوا نہ لائن حاضر۔ اب قتل کی دھمکیوں پراُتر آیاہے۔انتظامیہ تحفظ فراہم کرے۔ یہ باتیں ماڑی شہر کے رہائشی فیض محمد نے گزشتہ روز پریس کانفرنس کے دوران کہیں۔ فیض محمد نے کہاکہ اپنی ٹھیکیداری کی درخواست منظور کرانے کے لیے فلک نازسب ڈویژنل کلرک نے کہاکہ ایس ڈی او کو رشوت دینا پڑے گی ورنہ درخواست منظور نہیں ہوگی۔ انہوں نے کہاکہ محکمہ انہار کے ایس ڈی او عبدالجبار کو میں نے رشوت لیتے ہوئے رنگے ہاتھوں اینٹی کرپشن میانوالی کے ذریعے گرفتار کرایا۔ جس کی ایف آئی آر اٹھارہ مارچ دوہزار پندرہ کو انٹی کرپشن ایکٹ کے تحت درج ہوئی۔ فیض محمد نے کہاکہ ایس ڈی او مذکور کچھ دِن میانوالی جیل میں بندرہا اور اکتیس مارچ کو ضمانت پر رہاہواہے۔لیکن افسرانِ بالا نے ایس ڈی او کو معطل کیا نہ لائن حاضر کیا۔متعلقہ افسرانِ بالا بھی اس رشوت کے دھندے میں ملوث لگتے ہیں۔ کئی روز سے عبدالجبار ایس ڈی او کے دوست احباب، تعلق دار اور مفاد اُٹھانے والے مجھے تنگ اور پریشان کررہے ہیں کہ ایس ڈی او کے ساتھ راضی نامہ کرو ورنہ قتل کردینگے۔ فیض محمد نے ضلعی انتظامیہ سے اپیل کی کہ مجھے تحفظ فراہم کیاجائے تاکہ ایس ڈی او عبدالجبار کو سزا دلوا سکوں۔ایس ڈی او عبدالجبار سے رابطہ کے لیے کلرک فلک ناز سے نمبر لینے کی کوشش کی گئی مگر اُس نے وعدہ کرکے رابطہ ہی منقطع کردیا۔
