داؤدخیل: کئی محلوں کی طرح محلہ غزنی خیل ،اور نئی آبادی میں بھی سیوریج کی بند لائینوں نے عوام کا جینا حرام کر دیا

داؤدخیل (سروے:ذوالفقارخان)داؤدخیل کے کئی محلوں کی طرح محلہ غزنی خیل ،اور نئی آبادی میں بھی سیوریج کی بند لائینوں نے عوام کا جینا حرام کر دیا ۔محلہ کے مکین گندے پانی کی وجہ سے بیماریوں میں مبتلا ہو رہے ہیں۔ گندم کی کھڑی فصل کو بھی سیوریج کے گندے پانی نے تباہ کر دیا۔ اہلیان محلہ کا میونسپل کمیٹی کے سی او کے خلاف احتجاج ۔شاہسوار خان ،اشفاق ہاشمی ،عبید اللہ نے کہا کہ ہمارے محلے میں سیوریج کی لائینیں مکمل طور پر بند ہوچکی ہیں اور گندے پانی کی وجہ سے سانس لینا بھی مشکل ہو چکا ہے۔ گندے پانی کی وجہ سے کئی بیماریاں پھیل رہی ہیں میونسپل کمیٹی کے سی او منیر جعفری کے پاس صفائی کے لیے گئے ہیں لیکن وہ کہتا ہے کہ صفائی نہیں ہوسکتی ہیں جس کو کہنا ہے کہہ دو میرا کوئی کچھ نہیں بگاڑ سکتا ہے۔انہوں نے کہاکہ شہریوں کے ساتھ انتہائی بدتمیزی کے ساتھ پیش آتا ہے اس کی نااہلی کی وجہ سے پورا شہر اس وقت فلتھ ڈپو بن چکا ہے ۔غلام عبا س،فاروق ملک ،سید محمد امام مسجد نے کہا کہ ان بند گٹروں کی وجہ سے نمازیوں کو بھی شدید مشکلات درپیش ہیں اور اس گندے پانی میں مچھروں کی افزائش ہو رہی ہے جس سے ڈینگی مچھر پید اہونے کا خطرہ لاحق ہے اور اس وقت کئی مکین گندے پانی کی وجہ سے خارش ،اور جلدی بیماریوں کے امراض میں مبتلا ہو چکے ہیں لیکن میونسپل کمیٹی میں ہماری کوئی شنوائی نہیں ہو رہی ۔ملک عبدالرحمن ایڈوکیٹ ،ربنواز خان،نعمت اللہ خان و دیگر نے کہا کہ سیوریج لائنوں کی صفائی نہ ہونے کی وجہ سے گٹر ابل رہے ہیں اور سیوریج کا گندہ پانی زرعی زمینوں میں داخل ہو کر کاشت کی گندم کی فصل کو تباہ کر کے رکھ دیا ہے ۔سی او کو کئی بار اس معاملے بارے میں آگاہ کیا لیکن ا سکے کانوں پر جوں تک نہیں رینگتی۔انہوں نے کہاکہ گندم کی فصل کی تباہی پر سی او کے خلاف عدالت میں کیس کریں گے اور تمام نقصان کا ہر جانہ وصول کریں گے ۔شہریوں نے ڈی سی ا ومیانوالی سے مطالبہ کیا کہ داؤدخیل کے بند گٹروں اور گندگی کے ڈھیروں کا نوٹس لیکر ان کی صفائی جلد سے جلدکرانے کا حکم دیں ۔