داؤدخیل(ذوالفقارخان)پائی خیل ضلع میانوالی کے مصعب اکرم نیازی پہلوان نے لاہور میں منعقد ہونے والے ہارس اینڈ کیٹل شو میں کشتی کے بین الصوبائی مقابلوں کے فائنل میں عمر بٹ پہلوان کو پہلے ہی راؤ نڈ میں ایک سنسنی خیز مقابلے کے بعد چاروں شانے چت کر دیا۔ مصعب اکرم نیازی کو اسی سال اپریل میں آذربائیجان کے شہر باکو میں منعقد ہونے والے انڈر20انٹرنیشنل ریسلنگ مقابلوں میں حصہ لینے کے لئے قومی ٹیم میں سلیکٹ کیا گیا ہے۔جبکہ اسی سال جولائی میں برما کے شہر میامبر میں ہونے والی جونئیر ایشین ریسلنگ چمپئن شپ میں بھی ہیوی ویٹ کلا س میں پاکستانی دستے کی نمائندگی کیلئے بھی منتخب کیا گیا ہے۔ پاکستان ریسلنگ فیڈریشن کے جنرل سیکریٹری چوہدری ارشد ستار کا کہنا ہے کہ مصعب اکرم نیازی پہلوان اتنی کم عمر ی میں جس تیزی سے ترقی کر رہا ہے ۔ انشاء اللہ جلد دنیا بھر میں دنیائے کشتی میں پاکستان کا سبز ہلالی پرچم سر بلند کرے گا۔
