داؤدخیل (نامہ نگار)سکول سیفٹی مہم کے دوران ریسکیو1122 کے ڈی آر توقیر احمد نے گزشتہ روزگورنمنٹ ہائی سکول پکی شاہ مردان میں طلبہ کو تربیت دیتے ہوئے کہاکہ کسی بھی حادثہ کی صورت میں اپنے حواس پر قابو رکھنا سب سے بنیادی عمل ہے۔ انہوں نے کہاکہ بروقت مدد دے کر بہت سی قیمتی جانیں بچائی جاسکتی ہیں۔ چوٹ لگنے کی صورت میں متاثرہ حصے کو بار بار لانے سے گریز کریں۔ زخمی شخص کے خون کے بہاؤ کو روکنے کے لیے متاثرہ جگہ پر کپڑا رکھیں۔اور جلد ازجلد ہسپتال منتقل کرنے کی کوشش کریں۔زیادہ تر سانپ زہریلے نہیں ہوتے مگر متاثرہ شخص اکثر خوف سے مر جاتاہے۔اس خوف سے مریض کو نکالا جائے۔ڈی آر توقیر احمد نے کہاکہ آگ لگنے کی صورت میں بھاگنے کی بجائے زمین پر رولنگ کریں۔کسی شخص کو آگ لگ جائے تو اُس پر فوری طور پر بوری یا کمبل ڈال دیاجائے تاکہ ہوا بند ہونے سے آگ بجھ جائے۔اگر جسم کا کوئی حصہ جل جائے تو اُس پر فوری طور پربار بار ٹھنڈاپانی ڈالیں تاکہ درجہ حرارت کم ہو۔ڈی آر توقیر احمد اور ڈی آر سردار حسن نے بتایاکہ ہماری دو ٹیمیں دو دن سے ضلع بھر کے بوائز اور گرلز سکولز میں ایمرجنسی کی بنیاد پر طلبا و طالبات کو تربیت دے رہے ہیں۔ اس وقت تک تحصیل پپلاں، تحصیل عیسیٰ خیل میں عیسیٰ خیل شہر، کلور، ترگ، کمرمشانی اور کالاباغ کے ہائی سکولز میں تربیت دے چکے ہیں جبکہ ماڑی انڈس اور پکی شاہ مردان کے سکولز میں اب مکمل کی ہے۔انہوں نے کہاکہ اگر کچھ مخیرحضرات ریسکیو 1122 کو دو تین پروجیکٹرز مہیا کردیں تو اس سے مزید بہتر تربیت ہو سکے گی۔ تربیت کے اختتام پر طلبہ سے جائزہ ٹیسٹ بھی لیا گیا۔ریسکیو 1122 کی دوسری ٹیم میں ڈی آر خالد محمود اور ڈی آر نور حسن فرائض سرانجام دے رہے ہیں۔ اس موقع پر ہیڈماسٹر جاوید اقبال ملک، سید ظفر عباس، سیدمحمد سبطین شاہ ،سلیم اختر،سید شفیع اللہ شاہ، مبشر حسین ، ضیا محمد شاہ ، غلام عباس رجائی ودیگر اساتذہ بھی موجود تھے۔
