تفریح جب افراتفری میں بدل جائے اور ثقافت کثافت میں تو ہنستے بستے گھر اُجڑ جاتے ہیں۔
چارماہ قبل شادی کے بندھن میں بندھنے والا جوان بھانجوں کی شادی میں فائرنگ کی زَد میں آکر زندگی سے ہاتھ دھو بیٹھا۔
تفریح قدرت کا انمول تحفہ ہے۔تفریح و ثقافت کسی قوم کی شناخت ہوتی ہے۔ عمومی رجحانات اور مجموعی حالات کسی بھی ملک و قوم کی تفریح و ثقافت پر اثر انداز ہوتے ہیں۔ تہذیب و تمدن کی ترقی کے ساتھ نت نئے رسوم و رواج جنم لیتے ہیں۔ زندہ قومیں اُس وقت تک کسی تفریح سے لطف اندوز ہوتی ہیں جب تک انسانی تہذیب کو خطرہ لاحق نہ ہو۔ جب ثقافت کثافت اور ضلالت میں بدل جائے اور تفریح افراتفری میں ڈھل جائے تو زندہ قومیں ایسی تفریح و ثقافت کو خیرآباد کہہ دیتی ہیں اور مردہ و جاہل قومیں انہیں اپنا کر اپنی اخلاقی و جسمانی زندگی کا جنازہ نکال دیتی ہیں۔ ایسی ثقافت اور تفریح سے اللہ کی پناہ جس سے دوسرے انسان خوف میں مبتلا ہوجائیں ، جو ثقافت انسانی جانوں کے ضیاع کا سبب بن جائے۔ شادی بیاہ پر ہوائی فائرنگ اور دھاتی دھاگہ والی پتنگ بازی ایسی ہی ثقافتیں ہیں جو انسانی جانوں کے لیے زہرِ قاتل ہیں۔ ایک دو نہیں بیسیوں افراد اِن تفریحات کی بھینٹ چڑھ چکے ہیں۔قانون سے بچنے کے لیے شادی پہ ہوائی فائرنگ کی آڑ میں کئی بار تو موقعہ 
پرست دُشمن بھی اپنے انتقام کی آگ ٹھنڈی کرنے کی کوشش کرتے ہیں۔
ایک طرف ماں ، خالائیں،پھوپھیاں شادی کے شادیانے بجارہی ہوتی ہیں تو دوسری طرف ان کے نوجوان بیٹے، بھتیجے، بھانجے فائرنگ کی زد میں آکر زمین پر تڑپ رہے ہوتے ہیں۔
داؤدخیل ایک ایسا قصبہ ہے جہاں بہت سے خاندانوں میں شادی بیاہ کے موقع پر ہوائی فائرنگ اور درجنوں منچلوں کی شراب نوشی ثقافت کی صورت اختیار کرچکی ہے۔شرفاء اور معززین کو شادی کارڈ پر\’\’ ہوائی فائرنگ منع ہے\’\’ کی عبارت لکھوانا پڑتی ہے۔
یہ گیارہ اکتوبر 2013ء کی رات تقریباََ دس بجے کا واقعہ ہے۔ اپنے بھانجوں انعام اللہ خان اور مطیع اللہ خان کی شادی میں شریک ہونے کے لیے طارق خان،ناصر خان بہرام خیل اور اُن کے خاندان کے دیگر افراد ملتان سے خصوصی طور پر تشریف لائے۔ ایک طرف خواتین اپنے پیاروں کی خوشی کے گیت گارہی تھی جبکہ دوسری طرف برقی قمقموں میں جوانوں، نوجوانوں کے رقص جاری تھے۔ شادی کارڈ پردُلہوں کے والد حاجی لطیف اللہ خان نے خصوصی طور پر ہوائی فائرنگ منع ہے کی واضح عبارت لکھوا دی تھی اس لیے سب بے فکر ہوکر شادی کی رسوم سے لطف اندوز ہورہے تھے کہ اچانک وہ کچھ رونما ہوگیا جس نے خوشیوں بھرے گھر کو ماتم کدے میں بدل دیا۔ ایف آئی آر میں مدعی ناصر خان کے مطابق شادی میں ہوائی فائرنگ کی واضح ممانعت کے باوجود حمایت اللہ ولد حبیب اللہ قوم شریف خیل نے پستول بارہ بور سے رات تقریباََ پونے دس بجے ہوائی فائر کر دیا۔جس پر مسمیان طارق خان اورسمیع اللہ نے منع کیاتو حمایت اللہ نے بُرا مناتے ہوئے ان پر سیدھا فائر کردیا جو میرے بھائی طارق خان اور سمیع اللہ کو لگا جس سے وہ شدیدزخمی ہوکر زمین پر گرگئے۔ناصرخان، سید امیر اور انعام اللہ نے حمایت اللہ کو پکڑنے کی کوشش کی تو اس کا بھائی نزاکت اللہ 30بور پسٹل سے ہوائی فائرنگ کرتے ہوئے اپنے بھائی حمایت اللہ کو چھڑوا کربھگالے گیا۔ زخمیوں کو آر ایچ سی داؤدخیل لایاگیا جہاں طارق خان زخموں کی تاب نہ لاتے ہوئے جاں بحق ہوگیا جبکہ سمیع اللہ خان کو میانوالی ریفر کردیاگیا۔ ناصر خان مدعی مقدمہ نے گزشتہ روز راقم سے بات کرتے ہوئے مزید وضاحت کی کہ ہمارے بھائی کو جان بوجھ کر حمایت اللہ نے قتل کیا ہے۔ہم وقت آنے پر مزید
انکشافات عدا لت میں بیان کریں گے۔زخمی ہونے والے سمیع اللہ خان نے بتایاکہ میرے ساتھ حمایت اللہ کی کوئی دُشمنی نہیں تھی ،نشے کی حالت اور بارہ بور پستول کے غلط استعمال سے یہ حادثہ رونماہوگیا۔ ملزمان کے چھوٹے بھائی انعام اللہ خان نے بتایاکہ میرے بھائی حمایت اللہ سے یہ قتل انجانے میں ہواہے۔ غلطی سے فائر طارق خان اور سمیع اللہ کو لگ گیا۔میرے بھائی کو معاف کردیاجائے۔ہماری مقتول خاندان سے کوئی دُشمنی نہیں ہے۔اُس وقت کے ایس ایچ او مجیداللہ خان نیازی نے رابطہ پر بتایاکہ داؤدخیل میں اکثرشادی بیاہ پر نوجوان شراب نوشی اور ہوائی فائرنگ کرتے ہیں۔ ایسے نوجوانوں کو جب روکا جاتاہے تو وہ مشتعل ہوجاتے ہیں اور انتہائی اقدام کرگزرتے ہیں۔ یہ واقعہ بھی جہالت اور غیرقانونی حرکات کا شاخسانہ لگتاہے۔
یہ واقعہ کسی غلطی کا نتیجہ تھا یا جان بوجھ کے شادی میں ہوائی فائرنگ کی آڑ میں یہ فعل سرزد ہوا، اس کا فیصلہ تو عدالت کرے گی۔(یہ تحریرعدالتی کارروائی میں بطور ثبوت پیش کرنے کے لیے نہیں لکھی گئی) مگر اس سے ایک نوجوان جس کی چار پانچ ماہ قبل داؤدخیل میں ہی شادی ہوئی تھی۔ابھی دلہن کے ہاتھوں کی مہندی کا رنگ بھی نہیں اُترا تھاکہ اُس کے خاوند کو خون میں رنگ دیاگیا۔ ملتان سے اپنے پیاروں کی خوشیوں میں شرکت کے لیے آنا والا خاندان نوجوان بھائی کی موت کا صدمہ لے کر لوٹا۔طارق خان کی عمر تقریباََ 36سال کے لگ بھگ تھی۔ مقتول پرائیویٹ کمپنیز میں بطورِ ویلڈر کام کرتا تھا۔زخمی سمیع اللہ خان کچھ روز بعد صحت یاب ہوگیا البتہ ایک چھرا اب بھی اُس کی ریڑھ کی ہڈی میں پھنسا ہوا ہے۔ ایک بیٹی کا باپ ہے اور اب مزدوری کرکے گھر کا نظام چلارہاہے۔ ملزمان حمایت اللہ خان اور نزاکت اللہ خان کاباپ حبیب اللہ خان المعروف بھمباں والااس وقوعہ کے کچھ ماہ بعد وفات پاگیا جبکہ ایک بھائی نعمت اللہ خان پہلے ہی وفات پا چکاہے جس کا ایک بیٹی اور ایک بیٹا ہے۔ ایک بھائی حیات اللہ خان منشیات کا عادی ہے جس کے دوبیٹے اور دوبیٹیوں بمعہ اہلخانہ کی ذمہ داری بھی اب چھوٹے بھائی انعام اللہ خان پر ہے۔
مقتول طارق خان کی نمازِ جنازہ 12اکتوبر2013ء کی صبح داؤدخیل میں ادا کی گئی تھی۔ نماز جنازہ پڑ ھانے والے مو لانامرید احمد نے اس موقع پر سینکڑ وں شرکاء جنازہ کو خطاب کرتے ہوئے کہاتھاکہ شہر میں شراب فروشی اور شراب نوشی عام ہوچکی ہے۔معاشرہ اور حکومت بے حس ہوچکے ہیں۔ پولیس موثر کارروائی نہیں کرتی ۔ اس واقعہ میں شراب کے نشے میں دُھت شخص کی فائرنگ سے ایک بے گناہ نوجوان 
کی زندگی چلی گئی جبکہ ایک نوجوان زخمی ہو گیا۔ اس نوجوان کے خون کا معاشرہ بھی برابر ذمہ دار ہے۔
جن لوگوں نے انسانی جان و مال کی دُشمن رسوم و رواج ، تفریح و ثقافت کو اپنی نام نہاد نمود و نمائش کا ذریعہ بنا رکھاہے، اُنہیں سوچنا چاہیے کہ بے گناہ ایک انسانی قتل بھی ساری انسانیت کے قتل کے برابر ہے۔ بسنت کے موقع پر بوکاٹا کے شوق میں اور شادی بیاہ میں اسلحہ اور مصنوعی رعب و دبدبہ جمانے کے چکر میں انسانی جانوں سے کھیلنے والے اگر اِس دُنیا کی عدالت سے بچ بھی گئے تو اللہ کے حضور اِن کوپورے پورے احتساب کا سامنا کرنا پڑے گا۔ وہاں ظالم اور مظلوم دونوں کو اپنے اپنے کردار کا پورا پورا بدلہ دیاجائے گا۔حکومت، اساتذہ، علماکرام،این جی اوز، والدین،پیر ان و مشائخ ، صاحبانِ ثروت ،ادیب و شعرااور صحافیوں سمیت تمام ذمہ داران معاشرہ میں موجود غیراخلاقی و غیر قانونی تفریحات اور سرگرمیوں کے خاتمہ کے لیے اپنے اپنے دائرہ اختیار میں موثر کردار ادا کریں تو پُرامن معاشرے کا خواب شرمندہ تعبیر ہوسکتاہے۔
