پپلاں (نامہ نگار) گورنمنٹ ہائی سکول دوآبہ کا میٹرک کا جواں سالہ ہونہار طالب علم محمد وسیم اڑوڑ کی زندگی کا چراغ ٹریکٹر حادثہ میں گل ہو گیا۔ نوجوان طالب علم کی موت کی خبر سن کر گھر میں کہرام مچ گیا علاقہ بھر میں افسردگی کی فضا چھا گئی۔ واقعات کے مطابق نواحی علاقہ دوآبہ کے کاشتکار غلام یسین اڑوڑ نے دو دن قبل نیا ٹریکٹر خریدا جس کی ابتدائی رننگ کے لیئے گزشتہ روز سہہ پہر کو اسکا جواں سالہ بیٹا میٹر ک کا طالب علم محمد وسیم اسے لے کر اپنے گھر سے پپلاں راجباہ لنک روڈ پر ڈھنگانہ کی طرف جا رہا تھا کہ اچانک ایک تیز رفتار چنگ چی رکشا اسکے سامنے آ گیا جس کو بچانے کی کوشش میں سڑک کے کناروں پر پڑنے والے گڑھوں کی وجہ سے ٹریکٹر نیچے جا گرا اور ٹریکٹر پر سوار نوجوان طالب علم ٹریکٹر سے گر کر اسکے نیچے آ گیا جسکی وجہ سے اسکی موت واقع ہو گئی۔ طالب علم کی موت کی خبر سن کر سینکڑوں لوگ انکے گھر جمع ہو گئے اور انکے گھر میں مہرام مچ گیا۔ ہونہار طالب علم کی نماز جنازہ دوآبہ میں ادا کی گئی جس میں گورنمنٹ ہائی سکول دوآبہ کے تمام تدریسی سٹاف اور تمام طلباء کے علاوہ علاقہ بھر کی سیاسی سماجی شخصیات معززین علاقہ سمیت ہزاروں افراد نے شرکت کی اس وقت انتہائی رقت آمیز مناظر دیکھے گئے اور طالب علم کی وفات پر ہر آنکھ اشک بار تھی جبکہ اسکے رشتہ دار اور عزیز و اقارب دھاڑیں مار مار کر روتے رہے جسے انتہائی سوگوار اور افسردہ ماحول میں سپرد خاک کر دیا گیا۔ مرحوم کی وفات پر سکول کے تمام سٹاف طلباء اہم سیاسی سماجی کاروباری شخصیات تاجروں اور شہریوں نے سوگوار خاندان سے انتہائی دکھ اور افسوس کا اظہار کیا اور انکی مغفرت کے لیئے دعا کی۔
