پپلاں (محمد رضوان آکاش) رکن قومی اسمبلی و ممبر سنٹرل ایگزیکٹو کمیٹی پی ٹی آئی امجد علی خان نے کہا کہ دھاندلی کے ذریعے اقتدار میں آنے والی موجودہ حکومت کی اعلی کارکردگی اب عوام کے سامنے آ چکی ہے اور حکمرانوں کی کرپشن اور نا اہلی کی وجہ سے پورا ملک اندھیروں میں ڈوب چکاہے ملک سے امن و امان، روزگار، پیٹرول، گیس اور پانی غائب ہونے کے بعد اب بجلی بھی غائب ہے اور وزیر اعظم میاں نواز شریف اپنی حکومت اور کابینہ کی کرپشن اور نا اہلی پر پردہ ڈالنے کے لیئے پیٹرول بحران کا تمام ملبہ اوگرا اور پی ایس او کے سرکاری ملازمین عوام اور میڈیا پر ڈال کر اپنے کرپٹ وزراء کو بچانے میں مصروف ہیں لیکن عوام سب کچھ جان چکے ہیں کندیاں ، پپلاں ہرنولی میں رابطہ عوام مہم کے دوران صحافیوں سے گفتگو کرتے ہوئے ممبرقومی اسمبلی امجد علی خان نے کہا کہ الیکشن مہم کے دوران عوام کو روشن اور خوشحال پاکستان کے جھوٹے خواب دکھانے والے میاں نواز شریف اور میا ں شہباز شریف اب قوم کو سچ کیو ں نہیں بتاتے۔ انہوں نے کہا کہ سستی روٹی، لیپ ٹاپ، یوتھ فیسٹیول، سستے رمضان بازار، جنگلا بس، یوتھ بزنس لون سکیم ، موٹر وے منصوبوں اور اپنا روزگار سکیم کی ناکامی کے بعد اب ان کرپٹ حکمرانوں کی موم بتی سکیم شروع ہو گی تاکہ اندھیروں میں ڈوبا ہوا پاکستان روشن ہو سکے۔ انہوں نے مزید کہا کہ تیسری بار وزیر اعظم پاکستان بننے والے میاں نواز شریف اور چھٹی مرتبہ پنجاب میں حکومت قائم کرنے والوں کی وہ تجربہ کار ٹیم کہاں ہے جس کا الیکشن مہم کے دوران بڑا واویلا کیا جاتا تھا ان کرپٹ حکمرانوں اور انکی ٹیم کا تجربہ صرف ملکی خزانہ اور عوامی دولت لوٹنے کا ہے جس کا وہ کامیابی سے مظاہرہ کر رہے ہیں اور تمام سرکاری اداروں میں کرپشن اور لوٹ مار کا نہ رکنے والا سلسلہ ابھی تک جاری ہے انہوں نے مزید کہا کہ اب تو محترمہ مریم نواز امدادی سکیم کے نام پرسادہ لوح خواتین کو بھی لوٹا جا رہا ہے جس پر حکومت اور انتظامیہ خاموش ہے اور آج تمام اخبارات میں اسکی خبریں شائع ہوئی ہیں کہ میرے حلقہ کے شہر کندیاں اور دیگر علاقوں میں فراڈیوں کے ہاتھوں غریب خواتین کو لوٹا جا رہا ہے جو حکومتی کرپشن اور لوٹ مار میں ایک او ر اضافہ ہے جبکہ نااہل حکمرانوں کی نہ تو کوئی خارجہ پالیسی ہے نہ وزیر خارجہ ہے بلکہ نام نہاد جمہوریت کے علمبرداروں اور دعوے داروں کی ناکام پالیسیوں کی وجہ سے ملک آج جس مقام پر پہنچ چکا ہے اور ہماری خارجہ پالیسی اب کون طے کر رہا ہے وہ کسی سے ڈھکا چھپا نہیں رہاہماری داخلہ پالیسی کا حال بھی سب کے سامنے ہے اور اسی وجہ سے آج ہمارے بچے اور اُن کے سکول تک محفوظ نہیں رہے۔ دہشت گردی کی جنگ میں ہماری پاک افواج کی قربانیاں نا قابل فراموش ہیں اور انشاء اللہ دہشت گردی کی جنگ میں اپنی جانوں کا نذرانہ پیش کرنے والے شہداکا خون اب ضرور رنگ لائے گا۔ امجد علی خان نے مزید کہا کہ الیکشن میں ہونے والی دھاندلی کی شفاف تحقیقات کے لیئے سپریم کورٹ کا ا علی سطحی جوڈیشل کمیشن بنانے سے راہ فرار اختیار کرنے کے لیئے اب حکومت پورا زور لگا رہی ہے لیکن وہ بھول رہی ہے پی ٹی آئی کو کمزور سمجھنے والے وزیر اعظم کے نادان مشیر اور جھوٹ بول کر عوام کو گمراہ کرنے والے وزراء کو حقیقت کا ادراک کر لینا چاہیئے ورنہ پھر دمام دم مست قلندر ضرور ہو گا اور ہم پورا ملک بند کر دینگے۔
