پپلاں(محمد رضوان آکاش) فراڈی عورتوں کا گروہ بے نظیر انکم سپورٹ کی طرح مریم نواز امدادی سکیم شروع ہونے کا جھانسہ دیکر سادہ لوح عورتوں کو لوٹنے میں سرگرم ہوگیا شہر اور گردونواح کی سینکڑوں خواتین سے رجسٹریشن فیس اور دیگر چارجز کی مد میں ہزاروں روپے وصول کر لیئے گئے، بے روز گار لڑکیوں کو ملازمت کا جھانسہ دیکر گھر گھر سروے کیلئے بھیج دیا گیا مفلس اور نادار عورتیں امداد کیلئے پہنچ گئیں شہریوں کا شدید احتجاج اور کاروائی کا مطالبہ ، بے نظیر انکم سپورٹ پروگرام کی طرز پر مریم نواز سکیم شروع ہونے کیلئے سروے کی آڑ میں عورتوں پر مشتمل ایک گروہ کندیاں شہر اور گردونواح میں سادہ لوح عورتوں کو لوٹنے میں مصروف عمل ہے ان عورتوں نے محلہ خواجہ آباد میں کرایہ کے ایک مکان میں دفتر کھو ل رکھا ہے اس گروہ میں شامل لڑکیاں مختلف محلوں میں جا کر سروے کر کے عورتوں کو آئندہ تین ماہ میں 13000روپے دینے کا لالچ دیکر ان کی رجسٹریشن کر رہی ہیں گروہ بیوہ، طلاق یافتہ اور غریب خواتین سے انکی رجسٹریشن کے نام پر100روپے جبکہ سروس چارجز کی مد میں1000روپے سے لیکر2500روپے تک ایڈوانس وصول کر رہا ہے اب تک درجنوں سادہ لوح اور غریب خواتین امداد ملنے کے جھانسے میں آکر اپنے مجموعی طور پر ہزاروں روپے اس گروہ کے ہاتھوں لٹوا چکی ہیں امداد کے تناظر میں خواتین سے کہا گیا ہے کہ یہ پروگرام شروع ہوتے ہی13ہزار روپے فی خواتین کے حساب سے تین ماہ بعد مستحقین کو جملہ رقم یکمشت ادا کر دی جائے گی اس گروہ کی سرغنہ نے کندیاں شہر سے بے روز گار لڑکیوں کو 5ہزار روپے ماہانہ تنخواہ پر ملازم رکھا ہوا ہے اور انہیں بھی تین ماہ بعد اکٹھی تنخواہ دینے کا وعدہ کیا گیا ہے اس گروہ کی عورتوں نے علاقہ میں یہ مشہور کر رکھا ہے کہ یہ مریم نواز کا امدادی پروگرام ہے اور مسلم لیگ (ن) کی حکومت عوام کو ریلیف دینے کیلئے یہ پروگرام جلد شروع کر رہی ہے ذرائع کے مطابق اس گروہ کو مسلم لیگ (ن) کے ضلعی اور مقامی یوتھ ونگ کے عہدیداروں کی سرپرستی حاصل ہے دریں اثناء موجودہ صورتحال پر پاکستان مسلم لیگ (ن) کندیاں سٹی اور یونین کونسل48,49,50کا ایک مشترکہ ہنگامی اجلاس زیر صدارت صدر ظہیر احمد کندی منعقد ہوا جسمیں تمام عہدیداروں اور ممبران نے کثیر تعداد میں شرکت کی اجلاس سے خطاب کرتے ہوئے ظہیر احمد کندی، جنرل سیکرٹری عطاء محمد وینس، محمد اقبال ساجد ممبر مرکزی کونسل پاکستان، شفیع اللہ فاروقی، محمد اکبر جوڑا، احمد شیر جاوید ممبر صوبائی کونسل نے کہا کہ مسلم لیگ(ن) نے مریم نواز امدادی سکیم کے نام سے عوام کو ریلیف دینے کا کوئی پروگرام شروع نہ کیا ہے اور نہ ہی کوئی ایسا پروگرام مستقبل قریب میں شروع ہونا ہے انہوں نے کہا کہ مسلم لیگ(ن) کا کسی ایسے گروہ سے کوئی تعلق نہیں ہے جو مسلم لیگ(ن) کے نام پر غریب اور مفلس عورتوں کو لوٹنے میں مصروف ہے ہم ایسے نوسربازوں کی بھرپور مذمت کرتے ہیں انہوں نے عوام کو متنبہ کیا کہ یہ سراسر فراڈ اور دھوکہ ہے عوام ایسے عناصر سے ہوشیار رہیں نیز اجلاس میں ایک متفقہ قرارداد کے ذریعے ڈی پی او میانوالی، ڈی سی او میانوالی سے مطالبہ کیا گیا ہے کہ غریب عوام کو لوٹنے والے اس گروہ کے خلاف فوری طور پر کاروائی عمل میں لائی جائے اجلاس میں مسلم لیگ کی تمام یونین کونسلوں کے عہدیداروں اور کارکنوں نے کثیر تعداد میں شرکت کی۔
