لاہور: مرکزی جماعت اہلسنت پاکستان کے مرکزی ناظم اعلی پیر سید عرفان شاہ مشہدی نے کہا ہے کہ 6 دسمبر کو مینار پاکستان پر ہونے والی عزت رسول ﷺ کانفرنس اہلسنت کیلئے سنگ میل ثابت ہوگی۔ عزت رسول ﷺ کانفرنس بین الاقوامی سطح پر تحفظ ناموس رسالت کے لئے فیصلہ کن کردار ادا کرے گی۔ کانفرنس ملک و ملت کے خلاف ہونے والی سازشوں کے مقابلہ میں قوم کو جاندار لائحہ عمل عطا کرے گی۔ان خیالات کا اظہار انہوں نے کانفرنس کی تیاریوں کے سلسلہ میں مرکز صراط مستقیم تاج باغ لاہور میں علماء و مشائخ اور کارکنان کے اجتماع سے خطاب کرتے ہوئے کیا۔ انہوں نے کہا کہ ملک بھر اور بیرون ممالک سے شرکاء کی شرکت کو یقینی بنانے کے لئے انتظامات مکمل کر لئے گئے ہیں۔ سربراہ تحریک صراطِ مستقیم ڈاکٹر محمد اشرف آصف جلالی نے کہا کہ غلبۂ اسلام کی منزل عزت رسول ﷺ پر پہرہ دیئے بغیر حاصل نہیں کی جاسکتیْ کارکنان عزت رسولﷺ کانفرنس کا پیغام گلی گلی کوچہ کوچہ عام کریں اجتماع میں علامہ ارشاد احمد حقانی، قاضی محمد عبد الغفار علامہ فرمان علی نقشبندی ، حکیم محمد آصف اور کثیر تعداد میں علماء و خطباء نے شرکت کی۔
