جو معاشرے انصاف نہیں کرتے وہاں امن زندہ دفن اور سکون غارت ہوجاتا ہے جہاں زور آور انصاف کو اپنے جوتوں تلے روندنا شروع کر دیں اور ڈر والے ضمیر کی بولی لگاتے ہوں وہاں قانون کا ڈر اور اداروں کا تقدس ختم ہوجانا کوئی تعجب کی بات نہیں اور اباب اقتدار کی طرح ہور صاحب اختیا ر بھی جواب دہ ہے جو اپنے منصب سے انصاف نہیں کرتا وہ قانون کے شکنجے میں آئے نہ آئے قدرت کی گرفت میں ضرور آتا ہے ،جہاں توہین انسانیت عام ہو وہاں توہین عدالت کا قانون ایک مذاق لگتا ہے ، شہریوں کا توہین عدالت کے ڈر سے کمرہ عدالت میں موبائل فون بند ہوجاتا ہے لیکن مسجد میں کئی نمازیوں کے موبائل فون آن ہوتے ہیں اور دوران نماز بجتے ہیں لوگ بیماریوں کے ڈر سیاپنے شیر خوار بچوں کو اسپتال نہیں لے جاتے لیکن مسجد کو پبلک پارک سمجھ کر وہاں ساتھ لے جاتے ہیں اور انکے شور سے نمازی پریشان ہوتے ہیں ۔
اگر عہد حاضر کے حکمرانوں نے اپنی روش نہ بدلی تو وہ بھی تاریخ کا تاریک باب بن جائیں گے جو انصاف کرتا ہے تاریخ اس کے ساتھ ہرگز نا انصافی نہیں کرتی جو زندہ ضمیر لوگ دوسروں کے لئے آسانیاں تقسیم کرتے ہیں ان کا موت کے بعد کا سفر آسان ہو جاتا ہے ۔
سابق چیف جسٹس افتخار محمد چوہدری کے انصاف نے لوگوں کو انکا گرویدہ بنا دیا تھا اور لوگ انکی گاڑی کو چوما کرتے تھے مگر ان کی بحالی اور ریٹائرمنٹ کے بعد سے آج تک کسی نے ان کی گاڑی کو نہیں چوما ، موصوف بچھلی کئی دہایؤں سے سیاست کر ہے ہیں مگر باضابطہ سیاسی جماعت اب بنائی ہے لیکن اپنے پرانے اتحادی میاں نواز شریف سے اتحاد کئے بغیر انکی اقتدار ایوان تک رسائی کا خواب شرمندہ تعبیر نہیں ہو سکا ، لوگ جنرل راحیل شریف کے نام سے نہیں بلکہ انکے کردار سے والہانہ محبت کرتے ہیں اگر خدانخواستہ وہ بھی امیدوں پر پورا نہ اترے اور قومی لٹیروں کا بے رحم احتساب نہ کیا توپھر ان بیچاروں کی دعاؤں اور وفاؤں کا محورکوئی اور بن جائے گا جیسا کہ سنا جارہا ہے کہ سیا سی احتساب اب سیاست کی بھینٹ چڑھتا نظر آرہا ہے ، جنرل راحیل شریف کی ایکسٹینشن سے یقیناًقومی لٹیروں کی ٹینشن بڑھ گئی ہے ،عوام جنرل راحیل شریف نہیں مگر انکی ایکسٹینشن کے خواہاں ہیں ، پاکستان کو امن و امان کے سلسلے میں جس قسم کے چیلیجز اور خطرات کا سامنا ہے اور جنرل راحیل شریف کی قیادت میں پاک فوج کے اندر جوان جس پیشہ ورانہ انداز سے ڈلیور کر رہے ہیں اس تناظر میں افواج پاکستا ن کے پروفیشنل سپہ سالار کو ایکسٹینشن ضرور دی جائے ، پاکستان میں پائیدار امن اور جمہوریت سمیت آئینی اداروں پر عوام کے اعتماد کی بحالی کے لئے عدلیہ میں اصلاحات ناگزیر ہیں ۔
ظلم کا راستہ روکنے کیلئے سیکیورٹی فورسز کو طاقت ور اور انصاف کو عام کرنا ہوگا ، کمزور انسانوں کی زبان بندی سے انکے اندر کی شدید نفرت کو دبایا نہیں جاسکتا ، جس ریاست میں جابجا انصاف اور انسانیت کا خون بہتا ہو زوال اسکا مقدر بن جاتا ہے ، قانون کی حکمرانی کا خواب انصاف کی فراوانی کے بغیر شرمندہ تعبیر نہیں ہو سکتا ، دنیا کی جس ریاست نے رعایا کو انصاف کی فراہمی یقینی بنائی وہ تعمیر و ترقی کی شاہراہ پر گامزن ہوئی ، جس ستم زدہ انسان کو بر وقت انصاف نہیں ملے گا اسے انتقام کی تاریک راہوں پر جانے سے کوئی نہیں روک سکتا ، ہمارے ملک میں جو منفی روایات پنپ رہی ہیں اگر انکا فوری سدباب نہ کیا گیا تو ذرا اور زور والے مزیدبے لگام جبکہ قومی ادارے پوری طرح ناکام ہو جائیں گے ، جہاں طاقتور کمزور کو کچلنے کے لئے قانون سے کھیلتے ہیں ایک دن کمزوروں کا پیمانہ صبر چھلک جاتا ہے ، اس وقت سے ڈرنا اور بچنا چاہیے ۔
2007ئسے آج تک امن کے رکھوالوں اور کالی بھیڑوں کے ظلم اور ناانصافی کی بھینٹ چڑھنے والے نہایت ہی شریف اورایک بزرگ شہری ہیں جو مسلسل آٹھ برس سے افسر شاہی کے ظلم سے زندہ مصلوب ہیں ، جن کے بارے میں سیاسی ، سماجی ،اقتصادی ،تاجر برادری اور ہر طبقہ کے معزز افراد نے بائی رٹن گواہی دی کہ یہ پاکستان کے پرامن اورایک مثبت سوچ کے شہری ہیں لیکن وہ آج بھی عدلیہ اور قانون نافذ کرنے والے اداورں کے لئے سوالیہ نشان ہیں ، پتا نہیں کب انساف کے دروازے ان کے لئے کھلیں گے ۔
بچھلے دنوں شہر لاہور میں راہ چلتے ایک یتیم طالب علم زین عبدالرؤف کو بے دردی سے قتل کر دیاگیا تھا مقتول کے گھرصف ماتم بچھ گئی جبکہ پورا ملک سوگ میں ڈوب گیا ،زین کے ناحق قتل پر پاکستان کا ہر باضمیر انسان رنجیدہ اور مضطرب تھا میڈیا نے اس اندوہناک واقعہ کو بھرپور کوریج دی ایف آئی آر میں نام زد مرکزی ملزم مصطفیٰ کانجو سمیت باقی شریک ملزمان بھی بروقت قانون کی گرفت میں آگئے ۔لاہور پولیس کے انتھک کپتان امین وینس نے مقتول کی بیوہ سے انصاف کی فراہمی کے ساتھ ان کی حفاظت کا وعدہ کیا اور مقتول زین کے گھر پر پولیس اہلکار تعینات کر دیئے ،مرکزی ملزم مصطفی کانجو جو سابق وفاقی وزیر مملکت صدیق کانجو مرحوم کا حقیقی بیٹا ہے ،میڈیا کی طرف سے ملزم کو ماضی میں بھی پرتشدد سرگرمیوں میں بھی ملوث بتایا گیا ۔
مدعی اور گواہان کے بیانات بھی میڈیا پر نشر ہوئے صرف آٹھ ماہ کے اندر 13گواہان اپنے اپنے بیان سے منحرف ہوتے گئے جس کے نتیجے میں ملزم مصطفی کانجوسمیت دیگر شریک ملزمان کو باعزت بر ی کردیا گیا ۔ کیا یہ تنہا پولیس کے انوسٹی گیشن ونگ کی ناکامی ہے یا پورا معاشرہ اور ریاستی ناکام ہو گیا ہے اگر مدعی اور گواہان منحرف ہو گئے تھے تو قتل کی واردات میں استعمال ہونے والی گاڑی ،بندوق،گولیاں اور ان کے خول کہاں گئے ؟ کیا ملزمان کے موبائل فونز کی لوکیشن حاصل کی گئی تھی ؟ یہ آئی ٹی کا دور ہے جدید ایجادات میں انوسٹی گیشن کو انتہائی سہل بنا دیا ہے ، اب مجرم کی طرح تفتیشی کا شاطر ہونا شرط نہیں ہے ، اس واقعہ میں پولیس ونگ کی نااہلی اور ناکامی سے چشم پوشی نہیں کی جاسکتی ، پھر ایک بیوہ ماں کے اکلوتے بیٹے اور مستقبل کے کفیل زین کا قاتل کون ہے ؟ کوئی تو بتائے مقتول زین کی بیوہ ماں اور بہنیں اس یتیم کا خون کس کے ہاتھوں پر تلاش کریں ؟ انہیں انصاف اور تسلی کون دے گا ؟
راقم نے پہلے بھی کئی بار لکھا ہے کہ مقدمات اور بلخصوص قتل کے واقعات میں خالی شہادت پر انحصار کرنا درست نہیں بلکہ شواہد باریک بینی سے تلاش اور محفوظ کیے جائیں ایف آئی آر کو (فرسٹ انفارمیشن رپورٹ) کی بجائے (فرسٹ انویسٹی گیشن رپورٹ) بنایا جائے ۔
اب ہوائیں ہی کریں گی روشنی کا فیصلہ
جس دیے میں جان ہو گی وہی دیا رہ جائے گا
