تحریر: حافظ کریم اللہ چشتی پائی خیل،میانوالی
ارشادباری تعالیٰ ہے ۔فِیْھَایُفْرَقُ کُلُّ اَمْرٍحَکِیْم ترجمہ : بانٹ دیاجاتاہے اس رات میں ہرحکمت والاکام
حضرت علی المرتضیٰ شیرِخداکرم اللہ وجہہ الکریم روایت کرتے ہیں کہ حضورنبی کریم صلی اللہ علیہ والہٖ وسلم نے فرمایا!”جب شعبان المعظم کی پندرہویں رات ہوتواس رات کوقیام کرواوردن کوروزہ رکھوکیونکہ اس رات میں اللہ تعالیٰ کی تجلی آفتاب کے غروب ہونے کے وقت سے ہی آسمان ودنیاپرظاہرہوتی ہے۔اوراللہ تعالیٰ فرماتا ہے کہ کوئی بخشش مانگنے والاہے کہ میں اُسے بخش دوں،کیاکوئی رزق مانگنے والاہے کہ میں اُسکوعطاکروں،کیاکوئی مصیبت زدہ ہے کہ میں اسے چھوڑوں،کیاکوئی فلاں فلاں حاجت والاہے کہ میں اسکی حاجت پوری کروں،حتیٰ کہ صبح ہوجاتی ہے۔(ابن ماجہ)
1۔صلوٰ ۃ الخیر : جو شخص اس رات میں سو (100) رکعت نماز نفل پڑھے ہر رکعت میں سورۃ الفاتحہ کے بعد سورۃ الاخلاص گیارہ بار پڑھے ۔ اس کے متعلق حضورنبی کریم صلی اللہ علیہ والہٖ وسلم فرماتے ہیں کہ اللہ تعالیٰ فرشتوں کو حکم دیتا ہے کہ ایک سال تک اس کا کوئی گناہ نہ لکھو بلکہ نیکیاں ہی لکھتے رہو حضرت حسن بصری رحمۃ اللہ علیہ فرماتے ہیں کہ میں نے حضورنبی کریم صلی اللہ علیہ والہٖ وسلم کے تیس صحابہ کرام علہیم الرضوان سے سنا کہ جو شخص اس نماز کو پڑھے گا اللہ تعالیٰ اس کی طرف رحمت کی ستر نظریں فرمائے گا ۔ اور ہر نظر کے ساتھ ستر حاجتیں پوری فرمائے گا ۔ سب سے چھوٹی حاجت گناہوں سے پاک فرمانا ہے
2۔چودہ رکعت نمازنفل : حضرت علی المرتضیٰ شیرخداکرم اللہ وجہہ الکریم فرماتے ہیں کہ میں نے شعبان کی پندرہویں رات کو حضور نبی کریم صلی اللہ علیہ والہٖ وسلم کو دیکھا کہ آپ صلی اللہ علیہ والہٖ وسلم نے چودہ رکعت نماز ادا فرمائی ۔ پھر آپ صلی اللہ علیہ والہٖ وسلم نے بیٹھ کر سورۃا لفاتحہ ، سورۃ اخلاص ، سورۃا لفلق اور سورۃ الناس چودہ چودہ بارپڑھیں ۔ پھر آپصلی اللہ علیہ والہٖ وسلم نے آیت الکرسی ایک بار پڑھ کر لقد جا ء کم رسول من انفسکم،الاخرپوری آیت کریمہ پڑھی اس سے فارغ ہو کر نبی کریم صلی اللہ علیہ والہٖ وسلم نے فرمایا اے علی المرتضیٰ شیرخداکرم اللہ وجہہ الکریمجو ایسا عمل کرے جیسا کہ میں نے کیا ہے تو اس کو بیس مقبول حجوں کا اور بیس سال کے روزوں کا ثواب ملے گا ۔
3۔ چار رکعت نماز نفل : جو شخص اس رات چار رکعت نماز نفل پڑھے اور دن کو روزہ رکھے تو اللہ تعالیٰ اس کے پچاس سال کے گناہ معاف کر دے گا ۔
4۔آٹھ رکعت نماز نفل : جو شخص آٹھ رکعت نمازنفل پڑھے اور ہر رکعت میں سورۃ ا لفاتحہ کے بعد گیارہ گیارہ بار سورۃ اخلاص پڑھے پھر اس کا ثواب سیدہ کائنات حضرت فاطمۃ الزہرہ رضی اللہ تعالیٰ عنھا کی روحِ مبارکہ کو بخشے تو اس کے متعلق سیدہ کائنات حضرت فاطمۃ الزہرہ رضی اللہ تعالیٰ عنھا فرماتی ہیں کہ میں جنت میں اس وقت تک قدم نہ رکھوں گی جب تک اس کی شفاعت نہ کر الوں ۔
5۔بارہ رکعت نماز نفل : حضورنبی کریمصلی اللہ علیہ والہٖ وسلم نے فرمایا کہ جس نے بارہ نفل پڑھے ہر رکعت میں سورۃ الفاتحہ کے بعد دس بار سورۃ اخلاص پڑھی تو اس کے تمام گناہ مٹا دیئے جاتے ہیں اور اس کی عمر میں برکت ہوتی ہے ۔
6۔ پندرہ شعبان کا روزہ : حضورنبی کریم صلی اللہ علیہ والہٖ وسلم نے فرمایا کہ جس نے پندرہ شعبان کو روزہ رکھا اسے دو سال ایک گزشتہ اور ایک آئندہ کے روزوں کا ثواب ملے گا ۔ ایک اور روایت یہ ہے کہ پندرہ شعبان کو جن ، پرندے ، درندے اور سمندر کی مچھلیاں بھی روزہ رکھتی ہیں
7۔نوافل بعد از نماز مغرب:جو شخص مغرب کی نماز کے بعد چھ رکعتیں دو دو رکعت کرکے پڑھے کہ دو رکعت نماز نفل درازی عمر بالخیر ہونے کی نیت سے دو رکعت نمازنفل بلائیں دفع ہونے کی نیت سے اور دو رکعت نمازنفل مخلوق کا محتاج نہ ہونے کی نیت سے پڑھے اور ہر دو رکعت کے بعد سورہ یٰسین ایک بار( یا اکیس بار سورہ اخلاص) اس کے بعد دعا نصف شعبان المعظم پڑھے۔
8۔دس رکعت نماز نفل:حضور نبی کریم صلی اللہ علیہ والہٖ وسلم نے فرمایا جو میرا نیازمند امتی شب برات میں دس(10)رکعتنمازنفل اس طرح پڑھے کہ ہر رکعت میں الحمد شریف کے بعد قل ھو اللہ احد گیا رہ گیارہ مرتبہ پڑھے تو اس کے گناہ معاف ہوں گے اور اس کی عمر میں برکت ہوگی۔
9۔نوافل برائے نجات عذاب قبر:شعبان کی پندرہویں شب کوجوکوئی آٹھ رکعت نماز دو سلام سے پڑھے ۔ہر رکعت میں سورۃ الفاتحہ کے بعد سورہ اخلاص 10مرتبہ پڑھے۔اللہ عزوجل اس نماز کے پڑھنے والے کیلئے بے شمار فرشتے مقرر فرما دے گا جو اُسے عذاب قبر سے نجات کی اور داخل بہشت ہونے کی خبر دیں گے۔
10۔نوافل برائے توبہ:پندرہویں شب کو جوکو ئی آٹھ رکعت نمازنفل دو سلام سے پڑھے (یعنی4،4رکعت)پہلی رکعت میں سورۃ االفاتحہ کے بعد آیت الکرسی 10مرتبہ دوسری میں سورہ فاتحہ کے بعد سورہ الم نشرح دس بار اور تیسری میں سورۃالقدر اور چوتھی میں سورۃ اخلاص دس مرتبہ پڑھے ۔پھر دوسری چار رکعت بھی اسی ترتیب سے پڑھے۔بعد سلام کے ستر مرتبہ استغفار اور ستر مرتبہ آقاعلیہ الصلوٰۃ والسلام کی ذات اقدس پر درود پاک پڑھ کر اپنے گناہوں سے توبہ کرے۔ان شاء اللہ عزوجل صغیر وکبیرہ گناہ معاف فرمائے گا۔
11۔دو رکعت نماز نفل:جو کوئی پندرہویں شعبان کو دو رکعت نماز نفل پڑھے ہر رکعت میں سورۃالفاتحہ کے بعدایک بار آیت الکرسی اور15بار اخلاص پڑھے ۔سلام پھیرنے کے بعدآقاصلی اللہ علیہ والہٖ وسلم کی ذات اقدس پردرود شریف 100مرتبہ پڑھ کر ترقی رزق کی دعا کرے۔ان شاء اللہ نماز کے باعث رزق میں برکت ہوگی۔
شب براء ت جہنم کی آگ سے نجات پانے کی رات ہے مگرآج کل ہم مسلمانوں کوکیاہوگیا ہے آگ سے چھٹکاراحاصل کرنے کے بجائے پیسے خرچ کرکے خوداپنے لئے آگ یعنی آتشبازی کاسامان خریدتے ہیں حکیم الامت مفتی احمدیارخان نعیمی رحمۃ اللہ علیہ فرماتے ہیں کہ آتشبازی نمرودبادشاہ نے ایجادکی جبکہ اس نے حضرت ابراہیم خلیل اللہ علیہ السلام کو آگ میں ڈالااورآگ گلزارہوگئی تو اس کے آدمیوں نے آگ کے اناربھرکران میں آگ لگاکرحضرت ابراہیم خلیل اللہ علیہ السلام کی طرف پھینکے یہ بڑی عظمت والی رات ہے اس رات اللہ پاک گناہ گاروں کودوزخ کی آگ سے نجات دیتاہے ہم اس رات آگ سے بچنے کی بجائے گھروں میں شیطانی کام (پٹاخے،شرکنیاں،ٹائر وغیرہ جلانا) کرتے ہیں حکیم الامت مفتی احمدیارخان نعیمی رحمۃ اللہ علیہ فرماتے ہیں آتشبازی بنانا،بیچنا،خریدنااورخریدوانا، چَلانااورچلواناسب حرام ہے ۔ لہذاہم خود بھی ان کاموں سے بچیں،دوسروں کوبھی بچائیں اوراللہ پاک کی رحمت کے حقداربن جائیں۔ اللہ پاک عمل کی توفیق عطا فرمائے آمین۔
