ابتداء انسان انفرادی طورپہ زندگی بسر کرتا تھاکہ زندگی کے روز مرہ کے کا م ہر انسان خود سرانجام دیتا ۔کیونکہ اس وقت انسان نے اپنی ضروریات کوبہت ہی محدود کیاہوا تھا اس وقت کھانے کے لئے روٹی پہننے کے لئے کپڑے اور رہنے کے لئے مکان ہی زندگی کا ماحاصل تھا کھانے کے لئے ہر شخص اپنی اپنی اناج کی فصلیں آگاتا جب وہ تیا ر ہو جاتی تو یہ خود ہی کاٹ کے اس کو ایک جگہ پہ جمع کرتا اور اس پہ اپنے ہی گھر کے چند افراد کے ساتھ ملکر اس پہ مٹی کا لیپ کر تا اور پھر ا س پہ بیل کو دوڑاتا ۔اس طرح سے بھالیوں سے دانے الک ہو جاتے پھرخام اناج کو صاف کرکے گندم کو گھر میں رکھ لیتا گھر میں چکیاں ہو تی اور ہر گھرانہ اپنے گھر میں ہی آٹا بنا لیتااس طرح یہ انسان کے پاس اتنا ذخیرہ ہوتا کہ اگلی فصل کے آنے سے قبل تک بھی ختم نہ ہوتا اس ہی طرح علاج و معالجہ کے لئے ہرانسان کو خود ہی معلوم ہو تا تھا کہ انہوں نے کس طرح اپنی بیماری کا علاج کرنا ہے اگر کسی کے دانت یا داڑھ میں درد ہو تا تو وہ اس کے لئے لونگ کا استعمال کر تااور اگردانتوں میں ٹھنڈا گرم پانی لگتا تو دیسی گھی میں کالی مرچ پیس کے لیپ تیار کر کے دانت یا داڑھ میں رکھتا۔اگر دانتوں سے خون کا اخراج ہو تا تو اس کے لئے انار کے چھلکوں کا سفوف بنا کہ دانتوں پہ رکھتااس طرح سے ا سکا خون بہنا نہ صرف ختم ہو جاتا بلکہ ہمیشہ کے لئے ہی من جانب اللہ سے کافور ہو جاتا۔ اگر کسی کو قبض کی بیماری لاحق ہو تی تو وہ اس بیماری سے نجات کے لئے ثناء مکی کا استعمال کر تا اس طرح جب چھوٹے بچوں کے پیٹ میں کیڑوں کی شکایا ت ہو تی تو وہ رات کو میٹھا چیز کھلاتے اور صبح نہار منہ ناریل کھلادیتے جس سے پیٹ کے تما م کیڑے مر کر نجاست کے راستے سے باہر آجاتے۔وعلی ھذا القیاس اس ہی طرح تمام بیماریوں کا علاج کیا جاتا۔ مگر پھر انسان نے ترقی کی۔ رفتہ رفتہ اس میں سہل پسندی آگئی ہر شخص آرام کی زندگی گزارنے کے اسباب کی طرف متوجہ ہوا۔وہ ذاتی مفادات کے لئے قومی و ملی و برادری مفادات کو پس پشت ڈالنے لگااس طرح سے خون خرابہ قتل و قتال چوری و راہزنی اپنے عروج پہ پہنچنے لگی۔ ان مذکورہ خرابیوں تدارک کے لئے یقیناًفرد واحد ناکافی تھا۔ تو ان برائیوں کے خلاف اسباب جمع کرنے میں ایک دوسرے کا ساتھ دینے کے لئے قوم و قبیلے کی ضرورت پیش آئی توپھر اس ہی فردِ واحد نے اپنی قوم کاسہار ا لیا اس طرح یہ ایک برادری بن گئی برادری کی اہمیت کا اندازہ شاہد عام لوگوں کو نہ ہو جو برادری میں مل جل کر رہتے ہیں مگر آج بھی کوئی بھی شخص اپنے خاندان و فیملی کو چھوڑ کے الگ ہو تا ہے تو ان کو یقیناًایسے اوقات میں اپنے خاندان کے افراد کی کمی ضرور محسوس ہو تی ہے ۔آج ہم جو کچھ برادریوں کے نام لیتے اور جانتے ہیں وہ اس ہی بات کی عکاس ہیں ورنہ تمام انسان حضرت آدم علیہ السلام کی اولاد ہی تو ہیں۔ان کی تقسیم ان کے طور اطوار اور رہن سہن و معرفت کی وجہ سے ان کے الگ الگ نام ہو ئے ۔لیکن یہ بات ذہن نشین رہے کہ ان قوموں و برادریوں کا تعلق اسلام میں صرف ایک پہچان و معرفت ہے ’’جعلنکم شعوبا و قبائل لتعارفوا‘‘ترجمہ ہم نے تمہیں قوموں اوربرادریوں میں اس لئے بنایا تاکہ تم پہچانے جاو(القران)اس سے زیادہ عند الاسلام قوموں و برادریوں کی کوئی اہمیت نہیں اسلام اس نظریہ کی مخالفت کرتا ہے جس میں قوم و برادری کی بنا پہ غرور و تکبر کیا جائے کوئی بھی شخص بڑا اس ہی صورت میں ہو سکتا ہے جب کہ وہ متقی ہوجس کا جتنا زیادہ تقوی ہو گا اتنا ہی زیادہ وہ عنداللہ مقرب ہو گا اس ہی نظریہ کی طرف قران مجید مشار ہے اللہ تعالی فرماتا ہے کہ ’’ان اکرمکم عنداللہ اتقاکم‘‘ترجمہ اللہ کے نزدیک سب سے زیادہ عزت والا وہ ہے جو زیادہ تقوے والا ہے (القران)لیکن پھر حالات و معاملات تبدیل ہو ئے جو کہ اقوام سے بھی بالا تر ہو گئے کہ پوری قوم بھی انکا مقابلہ نہ کر سکی تو پھر ان ہی اقوام نے مل کر ایک اتحادو اتفاق بنایا ۔ان ہی مختلف اقوام کے اتحاد سے معرض وجود میں آنے والے شئی کانام مملکت ٹہرا۔اور اسمیں ایسے قانون وقواعد و ضوابط شامل کئے جائیں جس میں تمام اقوام کو ان کے بنیادی حقوق میسر ہو انکودستور یا آئین کہتے ہیں۔ کسی بھی مملکت میں کاموں کو اس طرح سے تقسیم کر دیاجاتا ہے کچھ لوگ عوام کی حفاظت پہ معمور ہوں گے کچھ لوگ مملکت کی نوجوان نسل کے مستقبل کو بہتر بنانے کے لئے جہد مسلسل کریں ۔ کچھ لوگ ملک کے لئے قانون سازی کریں کہ کس طرح ہمارا ملک خوشحالی کی راہ پہ گامزن ہو سکتا ہے کس طرح سے عوام کو زیادہ ریلیف مل سکتا ہے۔عوام کو اس دور میں علاج و معالجہ تعلیم و صحت دینا حکومت کا فرض عین ہے اور یہ حکومت کا احسان نہیں بلکہ یہ عوام سے کئے جانے والے ٹیکسز کا نعم البدل ہے ۔ بالفاظ دیگرے یوں کہہ لیں کہ ملک میں چور و ڈکیتوں سے حفاظت کے لئے محکمہ پولیس بیرونی سازشوں سے نمٹنے کے لئے فوج کے محکمے قائم کئے اور یہ شعبے مختلف افراد کی زیر نگرانی کر دئے کہ وہ فرد واحد اس پورے ادارے کی نگہبانی کرے ۔ جیسا کہ ہم آئے روز ان وزراء کے نام سنتے ہی رہتے ہیں کہ وزیر خوراک تو وزیر مذہبی امور وغیرہم ذالک۔ یہ کسی بھی حکومت کا نقشہ اور اس کی زمہ داریاں ہو تی ہیں کہ وہ حکومت کس طرح سے قائم ہو تی ہیں۔ اور اسکی کیا زمہ داریاں ہوتی ہیں۔ اب آئیں ہم ملک پاکستان کی طرف دیکھتے ہیں کہ اس ملک کی کیا حالت ہے ۔عوام اگراپنے خون پسینے کاماحاصل ایک روپیہ بھی کسی کو دیتے ہیں تو وہ سوچتے ہیں کہ ان کو اس ایک روپے کے عوض کیا ملے گا ۔مگر ہمارے ہاں تو روٹی کے ٹکڑے سے لیکر پیمپر تک کوئی بھی چیز ٹیکسزسے خالی نہیں ہوتی۔ مگر اس کے عوض ملتا کیا ہے عوام خود ہی جانتے ہیں کہ ان کوکیا ملتا ہے ۔ہم پہ اتنے ٹیکس لگا دیئے کہ ہماری کوئی بھی چیز ٹیکس سے مبراء نہیں مگر اس کے عوض ملنے والی بنیادی چیزیں امن و امان تعلیم علاج و معالجہ اور سستا انصاف میں سے کسی کا عشر عشیر بھی میسر نہیں۔حکومت نے ہمیں جمہوریت و آمریت کے چکر میں لگا رکھا ہے عوام کو ان مسائل کی طرف متوجہ کر رہیں ہیں جن کا عوام سے کوئی بھی تعلق ہی نہیں۔ ہر دور کے حکمران صرف و صرف اپنی حکومت کو ہی چمکا تے رہیں ہیں اور اس کوشش میں ہیں کہ کسی بھی طرح یہ اپنی پالیسوں سے ملک کی عوام پہ حکومت کرتے رہیں۔حکومتِ سابقہ نے بھی کہا کہ جب ہم اپنی آئینی مدت مکمل کر یں گے تو پھر کوئی بھی بحران نہیں ہو گا ملک میں ہر چیز وافر مقدار میں موجود ہو گی مگر کیا ایسا ہو ا ؟ہر گز نہیں ۔اس کے بعد موجودہ حکومت نے یہ دعوی کیاتھا کہ ہم حکومت میں آتے ہی چھ ماہ میں ملک کے مسائل حل کریں گے بجلی کا نعم البدل راستہ نکال لیں گے مگر اب ایک سال کے بعد بھی یہ ہی اعلان ہو رہا ہے کہ آئندہ دو سے تین سالوں میں ہم بجلی پہ قابو پالیں گے۔تین سال کے بعد ایک سال کا نعرہ لگانا کون سی کوئی بڑی بات ہے اس طرح عوام تو لامحالہ طور پہ پھر کسی نئے کی تلاش میں ان کو مستترد کر دے گی اس طرح نئی حکومت پھر عوام کو اس ہی طرح بہکائے گی اور عوام کو سہانے خواب دیکھا کہ اپنا وقت پورا کرے گی ۔اورعوام کے لئے ایسے ایسے ایشو رکھے جائیں گے کہ عوام کو اپنے مسائل سے زیادہ ان مسائل کوحل کرنے کی فکر ہو اور لایعنی باتوں پہ عوام کو لگا دیا جائے گاجیسا کہ ابھی اس حکومت میں بھی یہ ہی ہو رہا ہے کبھی مشرف صاحب کے تو کبھی فوج کے’ تو کبھی طالبان کے ’تو کبھی اور معاملات میں عوام کی توجہ مبذول کروا دی جاتی ہے۔جناب صدرِووزیر اعظم پاکستان ’’اس عوام کو جمہوریت و آمریت سے کوئی بھی غرض نہیں یہ لوگ تو ہر اس شخص کو سلام کرنے کے لئے تیا ر ہیں جو ان کے معاملات کو خوش اسلوبی سے انجام دیں اگرچہ وہ کوئی امر ہی کیوں نہ ہو ۔آپ کی پہلی حکومت آئی تو اس وقت بھی آپ نے یہ ہی کیا۔ لایعنی کاموں میں آپ پڑھ گئے یہاں تک کہ آپ کی حکومت الوداع ہوئی ۔مانا کہ مشرف صاحب بہت ہی بڑے ظالم ہو ئے مگر آپ یہ تو بتائیں کہ اس وقوعہ کی ابتداء کہاں سے ہوئی ۔کیا جب آپ وزیر اعظم تھے اس وقت مشرف صاحب کے طیارے کو لینڈ کرنے سے باز رکھنے والے کون تھے ؟کیا آپ کو عوام نے اس لئے ووٹ دئیے تھے کہ آپ کوئی وہ کام کریں جس میں عوام کا کوئی فائدہ ہی نہ ہو۔یقیناًجواب نہیں میں ہو گا ۔تو آپ نے اس دور میں بھی وہ کام کئے جن کو نہیں کرنا چاہیے تھااس لئے آپ کی حکومت کو دوام نہ مل سکا اب بھی آپ اس ہی طرح کی باتوں کو دہرانے جارہے ہیں خدارا آپ اس ملک و ملت کو برباد نہ کریں عوام کا خیال کریں عوام کو اس سے کوئی بھی خوشی نہیں ہو گی کہ مشرف صاحب کو کیا ہو تا ہے کیا نہیں ہو تا ۔عوام کو جب خوشی ہو گی جب آپ ان کے مسائل حل کریں گے جب انکا بجٹ پچاس فیصد کم ہو جائے گا جب ان کو روٹی کپڑا مکان علاج و معالجہ تعلیم و سستا انصاف ان کے گھر کی دہلیز پہ فراہم ہو گا ورنہ عوام کا اعتماد اٹھ گیا تو مزید مسائل کھڑے ہو جائیں گے اب عمران خان اور ڈاکٹر طاہر القادری نے تحریک چلانے کا اعلان کردیا ہے یقیناًوہ حکمرانی کریں یا نہ کریں مگر اتنا لازمی ہوگا کہ عوام کو آپ کو جانے کی خوشی لازمی ہو گی جس طرح آپ پہلے گئے تو عوام کوآپ کے جانے کی خوشی تھی ۔جناب عالی آپ کے پاس اس وقت بہت اہم موقع ہے کہ آپ عوام کی جذبات کی قدر کریں اور عوام کو ان کے بنیادی حقوق ان کی دیلیز تک پہنچائیں۔بعض اس طرح کے مسائل ہو تے ہیں کہ جن کوکالم کی صورت میں احاطہ تحریر میں نہیں لایا جاسکتا مگر اس کا مطلب یہ نہیں کہ وہ مسائل ہی نہیں ہوتے ۔یقیناًکچھ مسائل حل ہو ئے ہیں مگر ابھی تک زیادہ مسائل باقی ہیں اور انکا حل بھی سہل و آسان ہے مگرحکومت کی سنجیدگی کی ضرورت ہے اگر آپ خود سنجیدہ ہو نے کے ساتھ ساتھ اپنی نیچے کے وزراء کی تربیت کریں تو یقیناًیہ مسائل کافور ہو سکتے ہیں اس ملک میں ہنر مند افراد کی کمی نہیں ۔اس ملک میں ہروہ شخص میسر آئے گا جو اس ملک کو اوج ثریا پہ مقیم کر سکتا ہے ۔آپ بجلی کے بحران کو لیں لیں ۔اس پہ قابو پانا کوئی مشکل امر نہیں۔ ہمارے پاس ایٹمی پاکستان کے بانی ڈاکٹر عبدالقدیرخان موجود ہیں جو ملکِ پاکستان کے قائد اعظم کے بعد سب سے بڑے محسن ہیں کیونکہ قائد اعظم نے پاکستان کو بنایا تو ڈاکٹر عبدالقدیرخان نے اس ملک کو بچایا مگران کی زندگی سے کوئی بھی فائدہ حاصل نہیں کیا جارہا شائد اب ان گھڑیوں کا انتظار ہے کہ کب یہ عظیم شخص محسنِ پاکستان اس دینا سے جائے تو سیاست دانوں کو موقع میسر آئے جو کہ میڈیا میں ان کے نام کی سیاست کر سکیں۔اوران کے حق میں سیاسی بیان دے کر اپنی شہرت میں اضافہ کریںیا پھر ان کے نام کا کوئی کالج و اسکول یا کوئی سڑک بنا دے ۔اگر ایسا نہیں تو ان کی زندگی کو غنیمت جانتے ہو ئے ان کو یہ کام کیوں نہیں سونپاجاتا کہ وہ پاکستان کو ایٹمی بجلی بنا کہ دیں؟ جس سے پورے ملک کو فائدہ ہو گا ۔کیونکہ کسی بھی ملک کی معیشت کا انحصار اس ملک میں بجلی کا سستہ اوروافر مقدار میں ہو نا لازم ہے جو کہ اس ملک کی ترقی کے اہم ہو تا ہے اگر آپ بھی پاکستان کو ترقی کی راہ پہ گامزن کرنا چاہتے ہیں تو فوری طور پہ اس مسئلے کے سد باب کے لئے اقدام کریں اگر یہ ایک مسئلہ حل ہو جائے تو اور بھی کئی مسائل خود بخود حل ہوجائیں گے مگر ضرورت حسن نیت اور کامل عزم کی ہے اگر ذہن یہ ہو ا کہ عوام صرف نعروں سے ہی خوش ہو جاتی ہے تو پھر یہ پانچ سال کیا ساری زندگی بھی کم ہیں اور اگر آپ سنجیدہ ہو ئے تو یقیناًیہ مسئلہ کچھ ہی مہینوں میں حل ہو جائے گا ۔
