واں بھچراں (ایف یو نیوز) واں بھچراں رمضان بازار میں وزیراعلیٰ پنجاب میاں محمد شہباز شریف کی طرف سے مہیا کی گئی سستی چینی سٹال کے انچارج زراعت انسپکٹر محمد صدیق نے سستے بازار کی چینی پیکٹوں کی بجائے گٹوکے گٹواپنے چہیتوں میں بانٹ دیئے اور حکومت اورضلعی انتظامیہ کی آنکھوں میں دھول جھونکنے کے لیے فرضی شناختی کارڈ کے نمبر لکھ کر لسٹیں تیار کروانے لگا جبکہ عام شہر ی چینی کے حصول کے لئے دھکے کھارہے ہیں ۔واں بھچراں کے عوامی سماجی حلقوں اور پاکستان مسلم لیگ ن تحصیل میانوالی کے ڈپٹی سیکرٹری شیخ انوارالحق نے زراعت انسپکٹر محمد صدیق کیخلاف شدید احتجاج کرتے ہوئے وزیراعلیٰ پنجاب میاں محمد شہباز شریف ،کمشنر سرگودھا ،ڈی سی اومیانوالی اوردیگر اعلیٰ حکام سے فوری طور پر کاروائی کا مطالبہ کرتے ہوئے کہا کہ حکومت پنجاب کے ریلیف کردہ پیکج کو راشی اہلکار تباہ وبرباد کررہے ہیں عوام کا کوئی پرسان حال نہیں ہے ،انہوں نے کہا کہ ضلعی انتظامیہ فوری طور پر کاروائی کرے اور رمضان بازار کو تباہ وبرباد کرنے والے راشی اہلکاروں کو نوکری سے فارغ کیا جائے تاکہ دوسرے اہلکاروں کو سبق مل سکے۔
