شیخوپورہ (ایف یو نیوز) مثبت صحافت کے علمبردار سینئر صحافی اور کالم نگار حامد قاضی کو کالمسٹ کونسل آف پاکستان کا مرکزی نائب صدر منتخب ہونے پر مبارکباد پیش کرتے ہیں اور ڈاکٹر غازی شاہد علوی چیئر مین کالمسٹ کونسل آف پاکستان کے مشکور ہیں جن کی نظر انتخاب سپوت شیخوپورہ حامد قاضی پر پڑی اور انہوں نے سی سی پی کی نائب صدارت کا قلمدان انہیں سونپا ۔پاک میڈیا کلب شیخوپورہ نے ایک اجلاس میں حامد قاضی کو کردار و عمل میں بہترین صحافی گردانتے ہوئے انہیں سی سی پی کی نائب صدارت کا صیح انتخاب قرار دیا انہوں نے کہا کہ ہم مشکور ہیں چیئر مین ڈاکٹر غازی شاہد علوی اور مرکزی صدر ایم اے تبسم کے کہ جنہوں حامد قاضی کو نائب صدر منتخب کر کے شیخوپورہ کے صحافیوں اور قلمکاروں کی دیرینہ خواہش کو تکمیل بخشی ان خیالات کا اظہار پاک میڈیا کلب کے چیئر مین رانا محمد ایوب نے اجلاس میں گفتگو کرتے ہوئے کیا انہوں نے مزید کہا حامد قاضی وہ صحافی ہیں کہ جن کے کردار پر آج تک کسی قسم کا کوئی قدغن نہیں اپنے تو اپنے پرائے بھی ان کے کردار پر انگلی نہیں اٹھا سکتے وہ ایک بہترین منتظم بھی ہیں اور ہمیشہ اصلاحی اور معاشرتی موضوعات پر تحقیقی طور پر لکھنے والے لکھاری ہیں امید ہے کہ وہ کالم نویسوں کے حقوق کی بہترین پاسداری کریں گے ۔پاک میڈیا کلب کے وائس چیئر مین حاجی عبدالرؤف نے اپنے خیالات کا اظہار کرتے ہوئے کہا کہ حامد قاضی کی صحافت اور کالم نویسی پر شیخوپورہ کو فخر ہے یہ وہ صحافی کہ جن کے کردار و عمل میں کوئی تضاد نہیں بلکہ ایسی شخصیت مملکت خداداد پاکستان میں کالم نویسوں کا سرمایہ ہے اللہ رب العزت انہیں اپنے فرائض سے خوش اسلوبی کے ساتھ عہدہ براہ ہونے کی توفیق عطا فرمائے ہم پاک میڈیا کلب کی جانب سے انہیں دل کی گہرائیوں سے مبارکباد پیش کرتے ہیں ۔ پاک میڈیا کلب کے صدر ڈاکٹر اسحاق سجاد نے کہا کہ سی سی پی نے حامد قاضی کو نائب صدر منتخب کر کے کالم نگاروں کو ایک سچی اور کھری لیڈر شپ فراہم کی ہے ۔پاک میڈیا کلب کے سینئر نائب صدر ڈاکٹر ایم ایچ بابر نے اظہار خیال کرتے ہوئے کہا کہ حامد قاضی کا بطور نائب صدر سی سی پی منتخب ہونا بلا شبہ ایک قابل توصیف فیصلہ ہے جس پر میں ڈاکٹر غازی شاہد علوی چیئرمین،ایم اے تبسم مرکزی صدر ،فیصل اظفر علوی مرکزی جنرل سیکریٹری سی سی پی کو داد تحسین پیش کرتا ہوں کہ جنہوں نے اپنے ساتھ ایگزیکٹیو باڈی میں ایک بہترین ساتھی کو شامل کیا انہوں نے مزید کہا کہ حامدقاضی سے میرا تعلق لڑکپن سے جوانی اور اب ادھیڑ عمری تک قریب 35سالوں پر محیط ہے میں نے آج تک حامد قاضی کو ایک اچھا دوست ،بہترین انسان ،انتھک محنت کرنے والا منتظم اور تحقیق کر کے لکھنے والا لکھاری پایا مجھے قوی امید ہے کہ وہ اپنی تمام تر صلاحیتوں کو بروئے کار لاتے ہوئے کالم نویسوں کے حقوق کے لئے کام کریں گے سی سی پی کا مرکزی نائب صدر منتخب ہونے پر اپنے جگری یار اور ہر دلعزیز صحافی حامد قاضی کو مبارکباد پیش کرتا ہوں ۔ پاک میڈیا کلب کے تمام ممبران نے دل کی اتھاہ گہرائیوں سے حامد قاضی کو مبارکباد پیش کی اور مستقبل میں ان کی کامیابیوں کے لئے دعا کی اس موقع پر نائب صدر ڈاکٹر سہیل انجم ،جنرل سیکریٹری ڈاکٹر فیض الرسول اور فنانس سیکریٹری دانیال منصور کے علاوہ پاک میڈیا کلب کے دیگر ممبران بھی موجود تھے ۔
