ڈیرہ غازی خان کے ماڈل چلڈرن کمپلیکس میں ستائیس بچے دال کھا کر اسپتال پہنچ گئے، وزیراعلیِ پنجاب نے واقعے کا نوٹس لے کر چوبیس گھنٹوں میں رپورٹ طلب کرلی، ڈی جی فوڈ اتھارٹی کی ٹیم نے چلڈرن ہوم کے کچن سےفوڈ سمپلز اکھٹے کرلیے۔ ڈیرہ غازی خان کے سرکاری چلڈرن ہوم میں بیالیس بچے دال کھا کر بیمار ہوگئے، ستائیس بچوں کی حالت زیادہ بگڑ گئی جنہیں اسپتال لایا گیا۔ انچارج چلڈرن وارڈ ٹیچنگ اسپتال ڈاکٹر شکیل الرحمان نے بتایا کہ فوڈ پوائزنگ سے متاثرہ 27 بچوں کو ہمارے پاس اہسپتال لایاگیاتھا جن میں سے چند بچوں کی حالت تشویشناک تھی تاہم بروقت علاج معالجہ کے بعد اب تمام بچوں کی حالت خطرے سے باہرہے۔ ضلعی انتظامیہ اور اراکین اسمبلی بھی دوڑے دوڑے اسپتال پہنچے، رکن پنجاب اسمبلی ڈاکٹر شاہینہ نجیب کھوسہ نے کہا کہ آشیانہ ہوم چلڈرن کے بچوں نے دال کھانے کے بعد دودھ پی لیا تھا جسکی وجہ سے انہیں فوڈپوائزنگ ہوگئی تھی تاہم بروقت طبی امداد ملنے سے اب تمام بچوں کی حالت خطرے سے باہرہے۔ دال باسی تھی یا دودھ ملاوٹ شدہ ۔۔ وزیراعلیِ پنجاب کے نوٹس پر ڈی جی فوڈ اتھارٹی کی ٹیم نے چلڈرن ہوم کا دورہ کیا اور کچن سے سیمپلز بھی اکھٹے کیے، چوبیس گھنٹوں میں وزیراعلیِ کو رپورٹ دی جائے گی۔
