یوسی پکی شاہمردان رُورل داؤدخیل میں نومنتخب چیئرمین، وائس چیئرمین اور کونسلر ز کا پہلا باضابطہ اجلاس
داؤدخیل(نامہ نگار) یوسی پکی شاہمردان رُورل داؤدخیل میں نومنتخب چیئرمین، وائس چیئرمین اور کونسلر ز کا پہلا باضابطہ اجلاس۔ علاقے کی صورت حال پر تبادلہ خیال۔ سیوریج کے مسائل، تعلیمی مسائل اور صحت کے مسائل زیرِ بحث لائے گئے۔ یونین کونسل کی حدود میں موجود سیمنٹ اور کھادکے بڑے کارخانوں کو یوسی کے عوام کو بنیادی سہولیات مفت مہیاکرنے کی قرار داد متفقہ طور پر منظور کی گئی۔ فیکٹریوں کی انتظامیہ سے مطالبہ کیاگیا کہ ان کے سکولوں میں گردونواح کی آبادیوں کو مفت تعلیمی سہولیات مہیاکی جائیں۔ صحت کی مفت سہولت دی جائے۔ فیکٹریوں کو آلودگی پر قابوپانے کے لیے بھی مشترکہ قرارمنظور کی گئی۔ خصوصاََسیمنٹ فیکٹری کی آلودگی کی وجہ سے قرب و جوار کی آبادیاں شدیدمتاثر ہورہی ہیں لیکن فیکٹری آلودگی کی روک تھام کے لیے موثر اقدامات نہیں کررہی۔ چیئرمین سیدالیاس رضا شاہ نے کہاکہ سیمنٹ فیکٹری کوئلہ پر چلنے والے پاور پلانٹس وغیرہ کی تنصیب کررہی ہے جس سے مزید آلودگی بڑھے گی۔ اب بھی روزانہ ہزاروں ٹن کوئلہ فیکٹری میں استعمال ہورہاہے۔ اس کے اثرات علاقے پر پڑرہے ہیں۔ کونسلرز کی طرف سے فیکٹریوں کے سکولوں میں آئندہ سال فیسیں بڑھانے کا نوٹس لیتے ہوئے چیئرمین اور دیگر ممبران نے کہاکہ ہم جلد انتظامیہ سے ملیں گے اور فیس میں اضافہ تو کیا ہم فیس کو ہی ختم کرائیں گے کیونکہ گردونواح کو مفت سہولیات مہیاکرنا فیکٹریوں کی ذمہ داری ہے۔ پرائیویٹائزیشن کے قوانین و ضوابط میں بھی یہ سہولیات درج ہیں۔ چیئرمین الیاس شاہ نے کہاکہ ملک کے دوسرے علاقوں میں موجود انڈسٹریز کی طرف سے یہ سہولیات دی جارہی ہیں۔ نومنتخب کونسل نے متفقہ قرار داد میں کہاکہ ہم یوسی سطح پر فیکٹریوں سے قانونی طریقے سے ٹیکس بھی وصول کریں گے تاکہ یوسی میں ترقی کا عمل بہتر ہو۔
Leave a Reply