ملک محمداکرم اعوان انیس سو چوہتر کو بطورِ پرائمری سکول ٹیچر سے سفر کرتے ہوئے گزشتہ روز بطورِ ہیڈماسٹر ریٹائر ہوگئے
داؤدخیل(نامہ نگار)ملک محمداکرم اعوان پندرہ فروری انیس سو چوہتر کو بطورِ پرائمری سکول ٹیچر سے سفر کرتے ہوئے گزشتہ روز بیالیس سال ملازمت مکمل کرنے کے بعد بطورِ ہیڈماسٹر گورنمنٹ ہائی سکول جلالپور سے ریٹائر ہوگئے۔ اکرم اعوان نے جی پی ایس شکرپڑی، جی ای ایس ڈھوک بھرتال، جی ای ایس بنی افغانان کے بعد جی ایچ ایس پکی شاہمردان میں بطورِ پانچ سال انچارج ہیڈماسٹر کے فرائض بھی سرانجام دیے۔ بعد ازاں جی ای ایس گلن خیل میں کلسٹر ہیڈ اور سکول ہیڈ تعینات ہوئے۔ تین سال جی ایچ ایس ایس داؤدخیل میں فرائض ادا کیے۔ ملک اکرم اعوان کی یہ بیالیس سالہ سروس بے داغ رہی۔ گزشتہ روز گورنمنٹ ہائی سکول جلالپور میں ان کے اعزاز میں الوداعی تقریب کا اہتمام کیا گیا۔ جس میں پرنسپل ملک ساعِد رسول، سابق اے ای او غلام عباس اعوان، ایس ایس ملک مسعود، ہیڈماسٹر ملک سلیمان، ٹریفک انسپکٹر ریلوے (ر) محمد اسلم نیاز کے علاوہ درجنوں معززین نے تقریب میں شرکت کی۔ حافظ محمد اسلم متعلم دہم، مہر حسین شاہ ہیڈماسٹر ، ملک ساعِد رسول اور ملک غلام عباس نے خطاب کرتے ہوئے ملک اکرم اعوان کی بیالیس سالہ ملازمت کو مثالی قرار دیا۔ انہوں نے کہاکہ ملک اکرم طلبہ اور اساتذہ کے لیے ایک عظیم سرمایہ ہیں۔ان کی شفقت کی کمی ہمیں محسوس ہوتی رہے گی۔ ملک محمداکرم اعوان نے اشک بھری آنکھوں کے ساتھ خطاب کرتے ہوئے کہاکہ آج بیالیس سال بعد میرا اپنے طلبہ سے رشتہ ٹوٹ رہاہے جو انتہائی تکلیف دہ موقع ہے۔ انہوں نے کہاکہ میں اپنے تجربے کی بنیاد پر کہتاہوں کہ اگر ہمارے اساتذہ پوری دیانتداری اور لگن سے طلبہ کو اپنی اولاد سمجھ کر پڑھائیں۔ ان کو وقت دیں۔ ان کے مسائل پر غور کریں تو اُستاد کی عزت میں اضافہ اور ان کی زندگی میں برکت ہوگی۔ اختتام تقریب پر ادارہ ، اساتذہ اور دیگر معززین کی طرف سے ریٹائر ہونے والے ہیڈماسٹر کو تحائف پیش کیے ۔ پُرتکلف ضیافت کے بعد گلے میں ہار ڈالے پورے پروٹوکول کے ساتھ سکول سٹاف اور معززین ہیڈماسٹر ملک محمداکرم اعوان کو ان گھر واقع فاروق آباد پکی شاہمردان چھوڑنے کے لیے آئے۔
Leave a Reply