داؤدخیل(ذوالفقارخان) 35 سال 1 ماہ اور 6 دِن ٹیچنگ کے فرائض سرانجام دینے کے بعد ملک عبدالعزیز فاروق ریٹائر ہوگئے۔ چار دسمبر انیس سو اسی کو گورنمنٹ پرائمری سکول چک ۱۸۲ ٹی ڈی اے ضلع بھکر(اُس وقت ضلع میانوالی)سے ملازمت کا آغاز کیا اوربعد ازاں گورنمنٹ پرائمری سکول کینال کالونی داؤدخیل،مسجد مکتب آرائیاں ،آبائی گاؤں گورنمنٹ پرائمری سکول سوڑا،پرائمری سکول پنسلین فیکٹری داؤدخیل اور آج گورنمنٹ ہائی سکول پکی شاہمردان ضلع میانوالی سے بطور ای ایس ٹی ملازمت کااختتام ہوا۔ گزشتہ روز ان کے اعزاز میں الوداعی تقریب منعقد ہوئی۔ جس میں سکول سٹاف کے علاوہ عبدالعزیزفاروق کے دیرینا ساتھی اورسابق ہیڈماسٹر سکول ہذا ایس ایس محمد عارف خان نے خصوصی طور پر شرکت کی۔ تقریب سے عبدالعزیز فاروق، ایس ایس محمد عارف خان، سینئر ہیڈماسٹر جاویداقبال ملک، سائنس ٹیچر ایس ایس ٹی ملک اختر اقبال، پی ٹی آئی مبشر حسین اُترا، انگلش ٹیچر سیدعاصم بخاری،ای ایس ٹی ملک اللہ دادنے خطاب کیا۔ عبدالعزیز فاروق نے اساتذہ کا شکریہ ادا کیا۔ جبکہ دیگر مقررین نے ریٹائر ہونے والے اُستاد کو زبردست خراجِ تحسین پیش کرتے ہوئے کہاکہ عبدالعزیز فاروق نے اپنی تمام ملازمت بے داغ گزاری ہے۔ کبھی شوکاز تک کا سامنا نہ کیا۔ ہمیشہ دیانتداری اور اپنی تمام صلاحیتوں کو بروکار لاتے ہوئے اپنے فرائض سرانجام دیئے۔قناعت پسند اور جانفشانی کو اپنا شعار بنائے رکھا۔ انہوں نے سینکڑوں نہیں بلکہ ہزاروں طلبا کی زندگی کو چاک کے ایک ٹکڑے سے سنوار ا۔ عبدالعزیز فاروق اپنی اور قوم کی اولاد کے علمی خیرخواہ ہیں۔ ان کی زندگی میں منفی سوچ کا شائبہ تک نہیں۔ انہوں نے اپنی ملازمت کی بھرپور اور کامیاب اننگز کھیلی ہے۔ یہ بندہ کوہستانی ہے اور آج اس نے یہ بات سچ ثابت کردی ہے۔ تقریب میں تلاوت محمدحسین علی اور نعت غلامِ حسنین نے پیش کی۔سکول آمد پر عبدالعزیز فاروق کو طلبہ کی طرف سے گارڈ آف آنر پیش کیاگیا۔ تقریب کے اختتام پر اساتذہ و دیگر ساتھیوں محمد ابراھیم، امیرعبداللہ، محمدیونس، محمد حسین، فتح محمد، محمد شاہ زیب وغیرہ کی طرف سے انہیں تحائف پیش کیے گئے۔ اور ان کے اعزاز میں پُرتکلف ظہرانے اور گروپ فوٹو سیشن کے ساتھ پروگرام اختتام پذیر ہوا۔
