داؤدخیل( خصوصی رپورٹ:ذوالفقارخان) ۔ یہ نوسالہ جُنید حسن ہے جو گورنمنٹ بوائز سیکنڈری سکول پکی شاہمردان ضلع میانوالی کے پرائمری حصہ میں جماعت سوم کا ایک ہونہار طالب علم ہے۔ بظاہر بالکل نارمل بچہ ہے۔ سکول یونیفارم میں دمکتے چمکتے چہرے کے ساتھ کلاس کے دوسرے بچوں کے ساتھ پڑھائی میں مصروف رہتاہے۔ بس چلتے ہوئے پتہ چلتاہے کہ جُنید کی دائیں ٹانگ میں کمزوری ہے۔ اس بارے ان کے والد ظفراقبال سے رابطہ کیاگیاتو انہوں نے بتایاکہ پیدائش کے وقت تو ہمیں محسوس نہ ہوا مگر جب چلنے میں دیر لگائی تو چیک کرانے پر معلوم ہوا کہ اس کی دائیں ٹانگ کیلشیم کی کمی کا شکار ہے۔ پھر جُنید نے آہستہ آہستہ چلنا شروع کردیا۔ لیکن جیسے جیسے بڑا ہوتاگیا اس کی لنگڑاہٹ زیادہ واضح ہوتی گئی اور ساتھ ساتھ ٹانگ بھی پتلی ہوکر ٹیڑھی ہوتی جارہی ہے۔ جس کی ہمیں بہت زیادہ پریشانی ہے۔ والدین نے جُنید کو اپنی استطاعت کے مطابق کچھ ڈاکٹرز کو چیک کرایا ہے ، جن کا یہی کہناہے کہ بچہ کیلشیم کی کمی کا شکار ہے۔ جُنید کا والد پانچ سکیل کا برانچ پوسٹ ماسٹر ہے۔ جُنید کا بڑا بھائی وحید الحسن بھی تیسری جماعت کا طالب علم ہے جبکہ چھوٹا بھائی علی رضا پہلی جماعت میں اور بہن تہذیب فاطمہ ابھی چھوٹی ہے۔ جُنید کے سب بہن بھائی بالکل صحت مند ہیں۔ ظفراقبال کاکہنا تھاکہ ہمارے خاندان میں پہلے کوئی شخص ایسی بیماری کا شکار نہیں ہوا ہے۔ اگر اس بچے کو بڑے شہر کے کسی مستند ڈاکٹر کو چیک کرایا جائے تو ہوسکتاہے اس کا بہتر علاج ہوسکے مگر سکیل پانچ کا ایک ڈاکیا شاید وسائل کی کمی سے ایسا نہ کرپاسکتا جس کی وجہ سے یہ خوبصورت بچہ دن بدن ایک ٹانگ سے معذوری کی طرف آہستہ آہستہ گامزن ہے۔
