ہمیں فرقہ بندی کی بیماری سے ہرحال میں نجات حاصل کرنی چاہیے : غلام شبیر خان
داؤدخیل(ذوالفقارخان) مسلمان کی بقا سیرتِ نبیﷺ پر عمل پیرا ہونے میں ہے۔ یومِ ولادت ہمیں اتحادِ امت اور اتحادِ انسانیت کا درس دیتاہے۔ خلفائے راشدین کی زندگی میں ہمیں محمدرسول اللہ ﷺ کی عملی زندگی کا مکمل نمونہ موجزن ملتاہے۔یہ باتیں گزشتہ روز انجمنِ تاجران اسکندرآباد کی طرف سے منعقدہ جشنِ میلادالنبیﷺ کے سلسلہ میں تقریب سے خطاب کے دوران مقررین نے کہیں۔ مولانا غلام نبی نے عشقِ رسول اور سیرتِ رسول پر روشنی ڈالی۔ سابق ناظم غلام شبیرخان نے کہاکہ ہمیں فرقہ بندی کی بیماری سے ہرحال میں نجات حاصل کرنی چاہیے اور اپنے علم و عمل کا محور قرآن اور سیرتِ محمدﷺ کو بنانا چاہیے۔ مذہبی سکالر الطاف حسین کلو نے کہاکہ فرقہ بندی ہماری جڑوں کو کھوکھلا کررہی ہے۔ ہمیں محمدرسول اللہ ﷺ کی ذات کو مرکز بنانا ہوگا۔ آپ ﷺ کے عملی کردار کا عکس سیدنا ابوبکر کی صداقت، سیدنا عمر کی عدالت، سیدنا عثمان کی سخاوت اور سیدنا علی کے علم و شجاعت میں نظر آتاہے۔ مسلمانوں کو اپنے اندر ایسے کردار پیدا کرنے کی کوشش کرنی چاہیے۔ سماجی راہنما عابد حسین عابدی نے کہاکہ ہماری بقا اللہ اور اُس کی رسول کی اطاعت میں مضمر ہے۔ تقریب سے کونسلرعبداللہ خان، شفااللہ خان،کونسلر محمد اقبال خان، محمد اکرم نیازی، نورخان شریف خیل نے بھی خطاب کیا۔ تلاوت کی سعادت کونسلر محمد حنیف خان نے حاصل کی جبکہ سٹیج سیکرٹری کے فرائض ذوالفقارخان نے ادا کیے۔ اس پروگرام کے انعقاد میں سیمنٹ فیکٹری، کھاد فیکٹری، امام خمینی ٹرسٹ، چیئرمین سیدالیاس رضا، وائس چیئرمین ملک طارق اقبال، سماجی و سیاسی شخصیت سابق ناظم حاجی ملک سرفراز خان، اکرم نیازی،نورخان ،محمد طاہراور زعفران خٹک نے خصوصی تعاون کیا۔
Leave a Reply