داؤدخیل(نامہ نگار) انجمن تاجران داؤدخیل کے زیرِاہتمام ڈی پی او سرفراز خان ورک کے حق میں نکالی گئی ریلی سے عبداللہ خان ، امجد عباس خان، ماما حق نواز خان، خلیل خان، سیف اللہ خان ایڈووکیٹ و دیگر نے خطاب کرتے ہوئے کہاکہ ڈی پی او میانوالی مظلوم کی آواز بن چکے ہیں۔ ڈی پی او میانوالی سرفراز خان ورک نے سودخوروں، بھتہ خوروں، منشیات فروشوں اور اشتہاریوں کے خلاف زبردست مہم چلاکر غریب اور شریف عوام کے دِل جیت لیے ہیں۔ آج ہر غریب اور شریف آدمی ڈی پی او سرفراز خان ورک کے لیے تن من دھن لگانے کو تیار ہے۔ مقررین نے کہاکہ ڈی پی او نے سود خوروں اور بھتہ خوروں کو لگام ڈال دی ہے۔ اشتہاری اب ایسا لگتاہے جیسے ملک بدر ہوگئے ہیں یا پھر خود گرفتاریاں پیش کررہے ہیں۔ انہوں نے کہاکہ اشتہاریوں کی جائیدادیں نیلام کرنے کا سلسلہ بھی بہت قابلِ تحسین ہے۔ماما حق نوازخان اور سیف اللہ خان ایڈووکیٹ نے کہاکہ ڈی پی او کی کاوشوں کو تھانوں میں تعینات عملہ ناکام بنا رہاہے۔ سختی کے نام پر رشوت کا بازار گرم کردیاگیاہے۔ تھانہ داؤدخیل کی حدود میں منشیات کا دھندہ جوں کا توں موجود ہے۔منشیات فروشوں کے بجائے نشئیوں پر ۹ سی کے پرچے کاٹے جارہے ہیں۔ہوٹلوں سے لڈو کھیلنے والوں کے ساتھ بیٹھے درجنوں بے گناہ لوگوں کو بھی پکڑ لیاجاتاہے ۔ اُن سے نقدی اور موبائل وغیرہ لے کر چھوڑ دیاجاتاہے۔ انہوں نے کہاکہ پولیس کے کئی ملازم خود منشیات کے عادی ہیں اور کئی خود منشیات فروشوں سے ملے ہوئے ہیں۔ ڈی پی او میانوالی منشیات کے عادی پولیس والوں کو بے نقاب کرکے قرار واقع سزا دیں۔ مقررین نے کہاکہ ڈی پی او سرفراز خان ورک کے لیے حکومتی سیاستدانوں کا گٹھ جوڑ قابلِ مذمت ہے۔ انعام اللہ نیازی ہو یا کوئی اور کسی کو حق نہیں پہنچتاکہ وہ ایک فرض شناس ڈی پی او کے خلاف پنجاب اسمبلی میں تحریک استحقاق جمع کراتے پھریں۔ عوام ڈی پی او کے ساتھ ہے۔ اس موقع پر حبیب بنک چوک سے شیرشاہ سوری بازار میں ریلی بھی نکالی گئی۔ جس میں سینکڑوں دکانداروں اور شہریوں نے شرکت کی۔ خادم موچھ مولوی عظمت اللہ خان نے بعدازاں ٹیلی فون پر بات کرتے ہوئے کہاکہ ڈی پی او ضلع سے جرائم ختم کرنے کے لیے بالکل مخلص ہیں مگر تھانہ میں تعینات اکثر پولیس افسران اور عملہ اپنی پرانی روش پر کھڑا نظر آتاہے ۔ پولیس کی ان کالی بھیڑوں کے خلاف بھی ڈی پی او سرفراز خان ورک کو زبردست ایکشن دکھانا ہوگا۔ ورنہ یہ سب کیے کرائے پر پانی پھیر دیں گے۔
