ڈی ای او سیکنڈری کا گورنمنٹ ہائی سکول پکی شاہمردان کا اچانک دورہ
داؤدخیل(نامہ نگار) ڈی ای او سیکنڈری کا گورنمنٹ ہائی سکول پکی شاہمردان کا اچانک دورہ۔ تعمیراتی کام اور سکول ریکارڈ کے ساتھ کلاسز کا معائنہ۔ باغیچہ اور سکول ملازم محمد یونس کی تعریف۔ سکول کی مجموعی کارکردگی پر اطمینان کا اظہار۔ تفصیلات کے مطابق ڈی ای او سیکنڈری میانوالی مختیار احمد سندھیلہ نے گزشتہ روز اچانک گورنمنٹ ہائی سکول پکی شاہمردان کا دورہ کیا۔تعمیراتی کام کا جائزہ لیا۔ مختلف کلاسز کے معائنہ کے دوران کلاس تھری کا خصوصی معائنہ کیا۔بچوں سے انگلش، ریاضی اور جنرل نالج کے سوالات پوچھے۔ بعد ازاں پورے سکول کا معائنہ کیا۔ دریائے سندھ کنارے بنے سکول کے باغیچہ اور جگہ جگہ پودے اور گملوں پر سکول کو ضلع بھر کا خوبصورت سکول قرار دیا اور باغیچہ بنانے والے سکول کے ملازم محمد یونس کو بلا کر خصوصی داد دی۔ سینئر ہیڈماسٹر جاویداقبال ملک ، اساتذہ اور سٹاف کی کارکردگی پر اطمینان کا اظہارکرتے ہوئے کہاکہ اس سکول کے کام کو ڈی سی او ، ای ڈی او اور ڈی ایم او صاحبان تک سب ضلعی افسران سراہا رہے ہیں۔اس کا سہرا سکول کے تمام سٹاف کے سر ہے۔افسران اس سکول کی تمام ضروریات کو ترجیح بنیادوں پر پورا کریں گے۔ آپ محنت جاری رکھیں۔ انہوں نے کہاکہ مجھے اس ماڈل سکول کے اعلیٰ معیار پر فخر ہے۔
Leave a Reply