داؤدخیل(نامہ نگار) چھ ماہ قبل ہونے والی بارشوں سے آنے والے سیلاب سے متاثرہ آبادی آج بھی خیموں میں رہنے پر مجبور۔ سروے اور وعدہ ہوچکے مگر ابھی تک سوائے خیموں کے کچھ نہیں ملا۔ قصبہ محمد والا ترگ شرقی عیسیٰ خیل ضلع میانوالی کے محمدحنیف، محمداعجاز، فیض محمد، غلام یٰسین، غلام شبیر، غلام بشیر، محمدمشتاق، منورحسین، شفیع اللہ، لطیف اللہ، محمد اقبال، غلام عاشق، زاہداقبال، محمد حسین، ثمر عباس، مجاہد احمد اور ثنااللہ نے تفصیلات بتاتے ہوئے کہاکہ چھ ماہ قبل کئی گھنٹوں کی مسلسل بارش نے سیلاب کی شکل اختیار کرلی۔ ہمارے مکان پانی میں ڈوب کرگرگئے۔ کھانے پینے کی اشیاء تک ضائع ہوگئیں۔ قریبی آبادی نے ہماری مدد کی۔ پھر این آر ایس پی نے دس اور تحصیلدار نے حکومتِ پنجاب کی طرف سے چودہ خیمے دیے۔ چھ ماہ سے ہم دودرجن گھرانے انہیں خیموں میں زندگی گزار رہے ہیں۔ حکومت کی طرف سے سروے بھی کیاگیا ۔ مبینہ طور پر لاہور سے ایک ٹیم بھی آئی تھی۔ ہمیں مکان وغیرہ بناکر دینے کی خوشخبری سنائی گئی تھی مگر اب تو نصف سال سے زیادہ عرصہ گزر چکاہے مگر ابھی تک ہماری کوئی شنوائی عمل شکل میں سامنے نہیں آسکی۔ متاثرین نے حکومتِ پنجاب سے پُرزور مطالبہ کیاکہ وہ آکر ہماری حالتِ زار دیکھیں اور ہماری داد رسی کریں۔ اس موقع پر متاثرین نے ہاتھ اُٹھا کر احتجاج بھی کیا۔
