داؤدخیل (نامہ نگار ) گورنمنٹ پرائمری سکول نمبر 3ریلولے اسٹیشن میں گزشتہ رات چور سکول کے تالے توڑ کر پنکھے اتار کر لے گئے۔ تفصیلات کے مطابق گزشتہ رات نامعلوم چور سکول نمبر 3کے کمروں کے تالے توڑ کر تین عدد پنکھے لے اڑے۔ واضح رہے کہ اس سے قبل بھی اسی سکول سے چور دروازے ،کھڑکیاں ،گِرلز ،واٹر پمپ اورواٹر ٹینک بھی چوری کرچکے ہیں۔ جن کی رپورٹ تھانہ داؤدخیل میں دی گئیں لیکن تاحال کوئی چور گرفتار نہ ہوسکا۔ اس پر سکول کے بچوں نے سڑکوں پر احتجاج بھی کیا لیکن کچھ نہ ہوا۔ہیڈماسٹر امیر محمدملک نے بتایا کہ حکومت کی پالیسی کے تحت تمام پر ائمری سکولز سے چوکیدار کی سیٹیں ختم کر دیں گئیں تھیں جس کی وجہ سے سکولوں میں چوری کی وارداتوں میں اضافہ ہوا ہے جبکہ تھانہ داؤدخیل کا عملہ بھی درخواست وصول کرنے کے بعد کوئی موثر کارروائی عمل میں نہیں لاتا۔ جس کی وجہ سے سرکاری پراپرٹی کا باربار نقصان ہورہاہے۔

QR Code: