داؤدخیل (نامہ نگار) محکمہ ایری گیشن کالاباغ ڈویژن کے ڈرائیور کو اپنی ڈیوٹی نہیں دی جارہی۔ وہ چار سال چار ماہ سے دفتر میں بیٹھ کر تنخواہ لے رہاہے۔ مجھے اپنی ڈیوٹی دی جائے۔ ڈرائیور عبدالغفور خان کی پریس کانفرنس۔ ایکسیئن بشیر احمد کی لاعلمی اور ایس ڈی او ثمر اقبال کا انکار۔ محکمہ ایری گیشن کالاباغ ڈویژن کے ڈرائیور عبدالغفور خان نے گزشتہ روز پریس کانفرنس کے دوران بتایاکہ بارہ اپریل دوہزار گیارہ کو اُس نے اوورسیئر عارف جعفری کی لاکھوں روپے کی کرپشن بے نقاب کی۔ بارہ اپریل دوہزار گیارہ کے اخبارات گواہ ہیں۔ اس دِن کے بعد ایس ڈی او اور ایکسیئن سمیت سب افسران میرے خلاف ہوگئے۔ اب میں چار سال چار ماہ سے صرف دفتر میں حاضری لگا کر تنخواہ لے رہاہوں۔ ہر نئے آنے والے ایکسیئن اور ایس ڈی او کو اپنی اصل ڈیوٹی کے لیے تحریری اور زبانی درخواست دیتا رہا ہوں، سفارشیں بھی کرائیں مگر میری کسی نے ایک نہ سُنی۔ عبدالغفور نے کہاکہ میری جگہ ایک قُلی عبدالحمید گاڑی چلاتاہے۔یہ کئی بار گاڑی کا انجن سیز کرچکاہے اور دوسرا نقصان بھی کر چکاہے مگر ایکسیئن اور ایس ڈی او مجھے میری ڈیوٹی دینے سے ہمیشہ ٹال مٹول سے کام کرتے آئے ہیں۔ عبدالغفور خان نے کہاکہ میں نے ہمیشہ دیانتداری سے اب تک ڈیوٹی ادا کی ہے۔ جہاں کہیں بھی مجھے کرپشن نظر آئی میں نے اپنے افسران اور دیگر اداروں تک کو آگاہ کیا تاکہ ملک و قوم کا سرمایہ کرپشن کی نذر نہ ہو۔اب بھی ہمارا موجود ایس ڈی او ثمر اقبال ڈپلومہ ہولڈر سے ترقی کرکے ایس ڈی او بنا ہے لیکن اسے جناح بیراج کے اتنے بڑے اور حساس پراجیکٹ پر ڈیوٹی دے دی گئی ہے حالانکہ یہاں بی ایس سی انجینئر کو تعینات کرنا قانونی طور پر لازمی ہے۔انہوں نے کہاکہ میں نے موجودہ ایکسیئن سے ڈیوٹی کی درخواست کی تو اُس نے مجھے ایس ڈی او کی طرف بھیج دیا۔ اور ایس ڈی او نے مجھے ٹالتے ہوئے کہاہے کہ تمھیں نومبر میں گاڑی کی ڈرائیوری دیں گے۔ انہوں نے کہاکہ مجھے میرا قصور بتایاجائے اور یہ بھی بتایاجائے کہ کیا ایک قُلی قانوناََ ایک ڈرائیور کی ڈیوٹی سرانجام دے سکتاہے۔اُس نے کہاکہ یہ افسران مجھے حلال کی روزی کھانے سے روک رہے ہیں۔ افسران بالا کو اس کا نوٹس لینا چاہیے۔ ورنہ میں انصاف کے لیے اب محکمہ ایری گیشن کے بڑے افسران اور اعلیٰ عدلیہ اور خادم اعلیٰ تک پہنچوں گا۔ اس سلسلہ میں ایکسیئن بشیر احمد نے رابطہ پر بتایاکہ میں نے تو عبدالغفور کو ایس ڈی او کی طرف بھیج دیاتھا۔ مزید مجھے کچھ پتا نہیں معلوم کرکے تفصیلات دوں گا۔ ایس ڈی او ثمر اقبال نے رابطہ پر بتایاکہ مجھے صرف دو ماہ ہوئے ہیں آئے ہوئے۔ عبدالغفور غلط کہہ رہاہے ، یہ وقتاََ فوقتاََ جیپ چلاتا رہتاہے۔البتہ ڈبل کیبن ہائی ایس ایکسیئن کے پاس ہوتی ہے۔ اور اگر کبھی کبھار ڈرائیور نہ ہوتو قُلی عبدالحمید کو بطورِ ڈرائیور استعمال کرلیتے ہیں۔ایس ڈی او نے کہاکہ میں ڈپلومہ ہولڈر نہیں بلکہ بی ایس سی انجینئر ہوں۔

QR Code: