پی پی ایم پرائیویٹ کلینک پر بھی ٹی بی کے مریضوں کو ٹیسٹ اور علاج کی مفت سہولیات فراہم کرے گی
داؤدخیل(نامہ نگار) پی پی ایم اب پرائیویٹ کلینک پر بھی ٹی بی کے مریضوں کو ٹیسٹ اور علاج کی مفت سہولیات فراہم کرنے کے اقدامات کررہی ہے۔ پبلک پرائیویٹ مِکس دوہزارگیارہ سے میانوالی میں آئی اور دوہزارگیارہ سے عملی کام شروع کیاگیا۔ داؤدخیل اور پکی شاہمردان کے پانچ کلینکس میں ٹی بی کے مریضوں کو سہولیات کا سلسلہ مارچ دوہزار سولہ تک شروع کردیاجائے گا۔ یہ باتیں اے ایس ڈی کے ڈسٹرکٹ فیلڈ سپروائزر محمد سلیم اور ڈسٹرکٹ فیلڈ سپروائزر شعیب اسلم خان نے گزشتہ روز ڈاکٹر محمد عنایت اللہ، ڈاکٹر اکبر علی وغیرہ سے ملاقات کے دوران بتائیں۔ انہوں نے کہاکہ داؤدخیل میں ڈاکٹر امیراحمدخان، اسکندرآباد میں ڈاکٹر محمد آصف مغل، ڈاکٹر محمد عنایت اللہ، پکی شاہمردان میں ڈاکٹر اکبر علی اور ڈاکٹر محمد سرور کے کلینکس پہ ٹی بی کے مریضوں کو ٹیسٹ اور مفت ادویہ کی فراہم کو یقینی بنایاجائے گا۔ مشورہ فیس صرف پہلی بار ادا کرنا ہوگی۔ انہوں نے مزید کہاکہ پہلے پی پی ایم لیب ٹیکنیشن کو دس دن، ڈاکٹرز کو چھ دن اور پیرامیڈیکل سٹاف کو تین دن کی ٹریننگ کرائے گی۔ انہوں نے کہاکہ اب ٹی بی کا علاج چھ ماہ میں مکمل ہوجاتاہے۔جس کسی کو دوہفتے لگاتار کھانسی، بلغم کے ساتھ خون، وزن میں کمی اور بھوک کم لگنے کی شکایت ہو وہ فی الفور کسی مستندڈاکٹر سے رجوع کرکے ٹی بی کا ٹیسٹ کرائیں۔ ٹی بی بھی دوسری بیماریوں کی طرح ایک بیماری ہے، اسے چھپانا اپنے خاندان کوبھی اس بیماری میں مبتلا کرنے کے مترادف ہے۔
Leave a Reply