پی ٹی آئی کو چیئرمین شپ ملی تو تعلیمی اداروں اور ہسپتالوں میں ترجیحی بنیادوں پر اصلاحات اور بہتری لائی جائے گی
داؤدخیل(نامہ نگار) پی ٹی آئی کو چیئرمین شپ ملی تو تعلیمی اداروں اور ہسپتالوں میں ترجیحی بنیادوں پر اصلاحات اور بہتری لائی جائے گی۔ کوئی گلی محلہ صفائی اور نکاسی آب کے بغیر نہیں رہے گا۔ ہر ادارہ عوام کا خادم نظر آئے گا۔ یہ باتیں پی ٹی آئی کی طرف سے متوقع ضلع چیئرمین میانوالی مولوی عظمت اللہ خان نے گزشتہ روز گورنمنٹ پرائمری سکول کالاباغ کے دورے کے موقع پر اساتذہ اور صحافیوں سے گفتگو کے دوران کہیں۔ انہوں نے کہاکہ میانوالی میں چیئرمین انشااللہ پی ٹی آئی بنائے گی اور اگر پارٹی نے مجھے ضلع چیئرمین کی ذمہ داری سونپی تو ہم ضلع کو پنجاب کا ایک ماڈل ضلع بناکر پاکستان بھرکے لیے ایک نمونے کے طور پرپیش کریں گے۔ ضلع میانوالی کا ہر محکمہ عوام کا حقیقی خادم نظر آئے گا۔ عام آدمی کے ساتھ ہونے والی زیادتیوں کا ہم ازالہ کریں گے۔ مولوی عظمت اللہ خان نے کہاکہ پنجاب حکومت سے فنڈ لینا کوئی مسئلہ نہیں ، ہمارے اندر دیانتداری ہوتو ہم عوام کو حقوق دلواسکتے ہیں۔ ہماری چیئرمین شپ میں ہر یوسی کا پٹواری اپنی یونین کونسل میں بیٹھے گا۔ اساتذہ کو سیاسی انتقام کے بجائے سہولیات دیں گے تاکہ وہ دلجمعی سے ہمارے بچوں کو بہتر تعلیم دیں۔ ہسپتالوں میں سہولیات مہیاکریں گے۔ عام مریض کو دور دراز تک دھکے نہیں کھانے پڑیں گے۔ ضلع ہیڈکوارٹر ہسپتال کو جدید بنیادوں پر استوار کریں گے۔ سرکاری املاک کا تحفظ یقینی بنائیں گے۔ مولوی عظمت اللہ خان نے کہاکہ عمران خان ملک کے خیرخواہ اور نہایت دیانتدار لیڈر ہیں۔ وہ کرپشن کو کسی صورت برداشت نہیں کرتے۔ عمران خان نے اپنے ورکرز کو بھی حوصلہ اور جرات عنایت کرکے اس قوم پر احسان کیاہے۔پی ٹی آئی اس ملک کو ترقی یافتہ ممالک کی صف میں لاکر دم لے گی۔
Leave a Reply