داؤدخیل (ذوالفقارخان)پانچ سو ملین کی لاگت سے یہ پائلٹ پراجیکٹ مکمل کیاجارہاہے۔پرائیویٹ سیکٹر کو تین سال تک ٹیکس سے استثنیٰ حاصل رہے گا۔ داؤدخیل سے اٹک تک پانچ پولیس چیک پوسٹ سیکورٹی مہیا کریں گی۔پنجاب حکومت انوسٹرز کی بھرپور حوصلہ افزائی کرے گی۔ مستقبل میں اس کا دائرہ کراچی تک بڑھادیاجائے گا۔ یہ باتیں آئی ڈبلیوٹی ڈی سی پنجاب کے چیئرمین نعیم سرفراز نے دریائی پورٹ داؤدخیل پر بحری جہاز بنانے کے سلسلہ میں
keel laying
تقریب سے خطاب کے دوران کہیں۔ انہوں نے کہاکہ یہ پراجیکٹ جنوری تک مکمل ہوجائے گا ۔پہلے چھوٹی کشتیوں کے مقامی افراد کو موقع دیاجارہاہے۔ جلد بڑے جہاز چلانے کی تربیت بھی دی جائے گی۔ انہوں نے کہاکہ پائلٹ پراجیکٹ میں 300 ٹن والے جہاز بنائے جارہے ہیں جو داؤدخیل سے تقریباََ 200کلومیٹر اٹک تک دریائے سندھ میں کارگو کا کام کریں گے۔ اس کے لیے ہر بیس کلومیٹر پر پولیس چیک پوسٹ بنائی جارہی ہے۔ یہ کارگو جہاز دن کے وقت سفر کریں گے۔ انہوں نے کہاکہ پنجاب حکومت پاکستان نیوی کے ماہرین کی نگرانی میں یہ پراجیکٹ مکمل کررہی ہے۔ پرائیویٹ انوسٹر یہاں آئیں اور اپنے ٹرمینل بنائیں، جہاز بنائیں اور اپنے جہاز چلائیں۔ پنجاب حکومت سے اس علاقے کو ٹیکس فری زون قرار دلانے کی سفارش بھی کریں گے۔ انہوں نے کہاکہ اس پراجیکٹ کے سلسلہ میں کے پی کے حکومت کے ساتھ بھی ہمارا رابطہ ہے۔ اس سے کے پی کے کو بھی بہت فائدہ پہنچے گا۔چیئرمین نے کہاکہ اس پراجیکٹ سے کسی قسم کی آلودگی پیدا نہیں ہوگی۔ ابتدائی طور پر پچاس ملازمین اس پراجیکٹ کی نگرانی کریں گے البتہ جہاز بنانے کے لیے مقامی لیبر کو ترجیح دی جارہی ہے۔کامیابی کی صورت میں مستقبل میں اس علاقہ کے عوام کو تعلیم اور صحت کی سہولیات کے لیے بھی اقدامات خارج از امکان نہیں۔ پراجیکٹ منیجر کمانڈر عبدالغفار نے کہاکہ مقامی آبادی کو تفریحی کی مفت سہولیات میسر ہونگی۔ مقامی طور پر انفاسٹریچر میں بہتری آئے گی۔ مستقبل میں کراچی تک نیوی گیشن لاگ سسٹم کے ذریعے کراچی تک کارگو کو ممکن بنایاجاسکے گا۔انہوں نے کہاکہ پہلا فیز جنوری 2016ء میں کام شروع کردے گا۔ مقامی کھاد فیکٹری اور سیمنٹ فیکٹری کارگو کے سلسلہ میں آن بورڈ ہیں۔دیگر پرائیویٹ کمپنیز بھی جلد آنا شروع ہوجائیں گی۔ اس تقریب میں ڈی سی او میانوالی طلعت محمود، جی ایم محمد نعیم، ایڈمن جاوید خان، جی ایم عطاالرحمن،لیفٹینٹ کمانڈر طارق قیوم، کمانڈور محمد اظہر، کیپٹن محمد ریاض چیف آپریٹنگ آفیسر، پراجیکٹ کوارڈی نیٹر جہانزیب اکرم ، ایس ایچ او عبدالغفور گجر کے علاوہ دیگر درجنوں شخصیات شریک تھیں۔ تقریب کے اختتام پر
IWTDC
کے چیئرمین نعیم سرفراز نے 300 ٹن کے پہلے جہاز کی کنسٹرکشن کا ویلڈنگ کرکے افتتاح کیا اور دُعائے خیر کے ساتھ پروگرام اختتام پذیر ہوا۔
