پپلاں( محمد رضوان آکاش) ایڈ منسٹریٹر ٹی ایم اے پپلاں فضل اکبر کی نگرانی میں ٹی ایم اے کا ریلوے پھاٹک پپلاں کے قریب بنائے جانے والے سہولت بازار کے سامنے سڑک کے کنارے واقع کھوکھا اور دکان مالکان کے خلاف گرینڈ آپریشن، آپریشن کے دوران آگ لگنے سے درجنوں کھوکھے جل کر خاکستر ہو گئے۔ اسسٹنٹ کمشنر پپلاں فضل اکبر ٹی ایم او رانا حامد رضا، تحصیل آفیسرز مرزا محمد امین، شیر افگن خان، ملک عنایت اللہ روڈی خیل ڈی ایس پی پپلاں فرخ سہیل سندھو ایس ایچ او پپلاں انسپکٹر محمد ارشد گوندل ایس ایچ او ہرنولی عمران یعقوب کے علاوہ ٹی ایم اے پپلاں کا عملہ تجاوزات ایکسکیویٹر ٹریکٹر ٹرالیاں اور پولیس کی بھاری نفری کے ہمراہ تجاوزات کے خلاف آپریشن کے لیئے سہولت بازار کے سامنے پہنچے تومیڈیا کے نمائندوں سمیت موقع پر سینکڑوں دکاندار اور شہری بھی موجود تھے اور متاثرہ دکانداروں نے آپریشن کے خلاف شدید احتجاج کیا اور کہا کہ تحصیل انتظامیہ غریب دکانداروں کو بے روز گار کرنا چاہتی ہے اور بغیر کسی اطلاع کے ہمارے خلاف ایکشن کیا جا رہا ہے اور ہمیں متبادل جگہ بھی فراہم نہیں کی جا رہی اس لئے کہ ہم غریب لوگ ہیں جو اپنے بال بچوں کا پیٹ پال رہے ہیں لیکن اسسٹنٹ کمشنر پپلاں نے انہیں کہا کہ آپ کو پہلے نوٹس دیا جا چکاہے اس لئے آپریشن ضرور ہو گا جس پر دکاندار ایکسکیویٹر کے سامنے کھڑے ہو گئے اور انتظامیہ کے خلاف شدید نعر ے بازی شروع کر دی کی جس پر اسسٹنٹ کمشنر پپلاں فضل اکبر نے پولیس کو مزاحمت کرنے والوں کو گرفتار کر کے اُن خلاف پرچہ درج کر نے کا حکم دے دیا اور ایس ایچ او پپلاں انسپکٹر محمد ارشد گوندل نے کچھ دکانداروں کو گرفتار کر کے تھانہ بھجوا دیا اور انتظامیہ نے تجاوزات کے خلاف آپریشن شروع کر دیا اسی دوران اچانک کھوکھوں اور چھپروں میں آگ بڑھک اٹھی جس کے شعلے آسمان پر بلند ہونے لگے اور موقع پر ہزاروں لوگ بھی جمع ہو گئے۔ آگ بجھانے کے لیئے ٹی ایم اے پپلاں سے فائر بریگیڈ کی گاڑی منگوائی گئی جس نے عملہ کے ہمراہ مل کر آگ پر قابو پایا اور اسے مزید پھیلنے سے روک لیا اس موقع پر متاثرہ دکانداروں نے میڈیا کے نمائندوں سے گفتگو کرتے ہوئے الزام عائد کیا کہ آگ انتظامیہ نے خود لگوائی ہے جبکہ انتظامیہ نے کہا کہ آگ کسی شر پسند نے لگائی اور انتظامیہ کا آگ لگانے میں کوئی کردار نہیں اس موقع پر ایک نا معلوم شخص کو موقع پر گرفتار بھی کیا گیا جس پر شبہ ظاہر کیا گیا کہ آگ اسی نے لگائی موقع پر موجود کچھ لوگوں نے صحافیوں کو بتایا کہ آگ بجلی کی تاروں کے شارٹ سرکٹ کیوجہ سے لگی ہے۔ پپلاں میں ہونے والے آپریشن کی وجہ سے شہر بھر کی صورت حال انتہائی کشیدہ ہو گئی اور ریلوے پھاٹک سے غربی جانب موجود سبزی گوشت اور فروٹ کے دکانداروں نے احتجاجا اپنی اپنی دکانیں بھی بند کر دیں۔