نیپال: زلزلہ متاثرین کے لیے امدادی کارروائیاں تیز

نیپال میں سنیچر کو آنے والے شدید زلزلے کے نتیجے میں حکام نے 1800 سے زائد ہلاکتوں کی تصدیق کی ہے جبکہ ماؤنٹ ایورسٹ میں زلزلے کے نتیجے میں برفانی تودے گرنے سے کوہ پیماؤں سمیت 17 افراد ہلاک ہوگئے ہیں۔ گذشتہ 80 سالوں میں نیپال میں آنے والا یہ شدید ترین زلزلہ ہے اور اسے ماؤنٹ ایورسٹ کی تاریخ کا سب سے بڑا سانحہ قرار دیا جا رہا ہے۔ نیپال کی وزارتِ داخلہ کی جانب سے جاری ہونے والےتازہ ترین اعدادوشمار کے مطابق زلزلے کے نتیجے میں 1805 افراد ہلاک ہو چکے ہیں جبکہ ساڑھے چار ہزار سے زائد زخمی ہیں۔ خیال رہے کہ زلزلے کے مرکز کے علاقے میں ہونے والی تباہی کی بہت ہی کم معلومات حاصل ہو سکی ہیں۔

امریکی جیولوجیکل سروے کے مطابق زلزلے کی شدت ریکٹر سکیل پر سات اعشاریہ آٹھ ریکارڈ کی گئی اور اس کا مرکز نیپال کے ضلع کاسکی کے ہیڈکواٹر پوکھرا کے مشرق میں 80 کلومیٹر دور کا علاقہ بتایا جاتا ہے۔ یہ علاقہ دارالحکومت کھٹمنڈو کے مغرب میں واقع ہے۔  زلزلے سے متاثرہ ہزاروں افراد نے پوری رات سخت سرد موسم میں کھلے آسمان تلے بسر کی۔

زلزلے سے بنگلہ دیش، بھارت اور چین میں تبت کے علاقے کے لوگ بھی متاثرہ ہوئے ہیں۔ بھارت کی شمالی ریاستوں میں ہالک شدگاہ کی تعداد 62 ہو چکی ہے۔ سنہ 1934 میں نیپال میں 8.3 شدت کا جو زلزلہ آیا تھا اس میں تقریباّ دس ہزار افراد ہلاک ہو گئے تھے۔

بین الاقوامی امداد

پاکستان، بھارت، چین اور امریکہ اور سمیت متعدد ممالک اور امدادی اداروں نے نیپال کو اس قدرتی آفت سے نمٹنے کے لیے مدد فراہم کرنے کی پیشکش کی ہے۔ بھارت نے ہوائی جہازوں کے ذریعے ادویات، موبائل ہسپتال اور قدرتی آفات سے نمٹنے والے ادارے کے 40 اہلکار بھیجے ہیں۔ پاکستان نے چار سی ون تھرٹی طیاروں میں 30 بستروں کا فیلڈ ہسپتال، طبی عملہ اور امدادی سامان نیپال روانہ کرنے کا اعلان کیا ہے۔اس کے علاوہ ملبے تلے دبے متاثرین تک پہنچنے کے لیے سراغ رساں کتوں اور ریڈار سمیت ضروری آلات بھی بھجوائے جائیں گے۔ ملک کے سرکاری ٹی وی کے مطابق یہ امداد اور ٹیمیں نیپال کے لیے روانہ ہو گئی ہیں۔ امریکی ادارے یو اس ایڈ کے مطابق امریکہ نے دس لاکھ ڈالر اور ہنگامی صورتحال سے نمٹنے والی ٹیم روانہ کرنے کا اعلان کیا ہے۔ برطانیہ نے امدادی اہلکاروں پر مشتمل آٹھ افراد کی ٹیم بھجوانے کا اعلان کیا ہے۔ ناروے نے ساڑھے 20 لاکھ برطانوی ڈالر امداد کا اعلان کیا ہے۔ جرمنی، فرانس، سپین اور یورپی یونین نے بھی نیپال کو امداد دینے کا اعلان کیا ہے۔

اس سے قبل نیپال کے وزیرِ اطلاعات نے اپنے بیان میں کہا تھا کہ ’ ہمیں اس وقت جس ناگہانی صورتحال کا سامنا ہے اس سے نمٹنے کے لیے ہمیں مختلف بین الاقوامی تنظیموں کی مدد درکار ہے کیونکہ ان کے پاس بہتر معلومات اور آلات موجود ہیں۔‘ زلزلے سے متاثرہ علاقوں میں بین الاقوامی امدادی ادارے بھی اپنی ٹیمیں بھیج رہے ہیں۔ ان میں ریڈ کراس، آکسفام، ڈاکٹرز وداؤٹ باڈرز سمیت کئی اور ادارے بھی شامل ہیں۔ عالمی امدادی ادارے ریڈ کراس اور ریڈ کریسنٹ سوسائٹیز کے ایشیا میں ڈائریکٹر جگن چاپاگین نے کہا ہے کہ کتنے پیمانے پرتباہی ہوئی اس کا ابھی اندازہ نہیں ہو سکا تاہم یہ بھارت اور نیپال میں 1934 کے بعد آنے والا سب سے تباہ کن زلزلہ ہے۔ آئی ایف آرسی نے زلزلے کے مرکز جو کہ دارالحکومت کھٹمنڈو سے 80 کلومیٹر دور کا علاقہ ہے کہ اردگرد کے دیہات کی صورتحال پر تشویش کا اظہار کیا ہے۔

ماؤنٹ ایورسٹ کی تاریخ کا بدترین سانحہ

نیپال کے محکمہ کوہ پیمائی کے مطابق کوہ پیماؤں سمیت17 افراد ہلاک ہوچکے ہیں جبکہ نامعلوم تعداد میں کوہ پیما لاپتہ یا زخمی ہیں۔ بتایا گیا ہے کہ ان غیر ملکیوں کی شہریت واضح نہیں ہو سکی زخمیوں کو امداد دی جا رہی ہے اور لینڈ سلائیڈنگ اور آفٹرشاکس کے خدشے کی وجہ سے ہر طرف افراتفری کا عالم ہے۔ امداد کے لیے علاقے میں ہیلی کاپٹرز پہنچائے گئے جو زحمیوں کو ہسپتال منتقل کر رہے ہیں تاہم موسم کی شدت کے باعث امدادی کارروائیوں میں رکاوٹ پیش آرہی ہے۔ خبر رساں ادارے روئٹرز نے نیپال کی وزارتِ سیاحت کے حوالے سے لکھا ہے کہ جس وقت زلزلہ آیا تو وقت کم ازکم 1000 کوہ پیما جن میں 400 غیر ملکی بھی شامل ہیں یا تو بیس کیمپ میں موجود تھے یا پھر اپنی مہم جوئی کا آغاز کر چکے تھے۔ حکام کے مطابق ایورسٹ کے بیس کیمپ سے اوپر کیمپ نمبر ایک اور دو میں 100 کوہ پیما اور گائیڈ موجود تھے لیکن وہ زلزلے کے باعث راستہ خراب ہو جانے کی وجہ سے نیچے آنے میں ناکام رہے۔ ادھر چینی میڈیا نے کہا ہے کہ ہلاک ہونے والے دو گائیڈز سمیت چینی کوہ پیما بھی شامل ہیں۔ گوگل کا کہنا ہے کہ ان کے ایک انتظامی اہلکار ڈین فریڈنبرگ جو ماؤنٹ ایورسٹ جانے والے مہم جوؤوں میں شامل تھے ہلاک ہوگئے ہیں۔

دنیا میں آنے والے بدترین زلزلے

۔2003 میں ایران کے شہر بام میں آنے والے زلزلے میں 26000 افراد ہلاک ہوئے تھے زلزلے کی شدت چھ اعشاریہ چھ تھی۔

۔2004 میں انڈونیشیا میں نو اعشاریہ نو کی شدت سے آنے والے زلزلے اور سونامی میں دولاکھ 30 ہزار افراد ہلاک ہوئے تھے۔

۔2005 میں پاکستان کے زیرِ انتظام کشمیر میں سات اعشاریہ چھ کی شدت سے آنے والے زلزلے میں تقریباً اکی لاکھ افراد ہلاک ہوئے۔

۔2008 میں چین آنے والے زلزلے میں 90 ہزار کے قریب ہلاکتیں ہوئی تھیں۔ ریکٹر سکیل پر زلزلے کی شدت سات اعشاریہ نو تھی۔

۔2010 میں ہیٹی میں دو لاکھ 22 ہزار سے زائد افراد ہلاک ہوئے تھے جبکہ ریکٹر سکیل پر اس زلزلے کی شدت سات ریکارڈ کی گئ۔

۔(بشکریہ: بی بی سی اردو)۔