پپلاں( محمد رضوان آکاش) جے یو آئی کے سربراہ مولانا فضل الرحمن نے میری درخواست پر ذاتی کوششوں سے دریائے سندھ پر پپلاں میں نیا پل تعمیر کرانے کی حکومت پنجاب سے منظوری کرا دی ہے اور انشاء اللہ پل پپلاں میں ہی تعمیر ہو گا ہم اپنے قائد مولانا فضل الرحمن کو تحصیل پپلاں کے عوام کا دیرینہ مطالبہ پورا کرانے پر خراج تحسین اور مبارکباد پیش کرتے ہیں۔ ان خیالات کا اظہار جے یو آئی ضلع میانوالی کے امیر امیدوار برائے صوبائی اسمبلی پی پی46 میانوالی صاحبزادہ سعید احمد نے پپلاں میں سابق نائب ناظم رانا جاوید اقبال کی رہائش گاہ پر ایک پر ہجوم پریس کانفرنس سے خطاب کرتے ہوئے کیا اس موقع پر مسلم لیگ ن کے سینئر رہنما و اسیر جمہوریت تحصیل صدر پپلاں رانا سعید اختر،سینئر نائب صدر مسلم لیگ ن عطا محمد خان گلو خیل، پل بناؤ کمیٹی کے روح رواں اور کنوینئر پیر مرتضی اور میڈیا کے نمائندوں سمیت شہریوں کی کثیر تعداد بھی موجود تھی ۔ صاحبزادہ سعید احمد نے کہا کہ میانوالی کی کسی بھی سیاسی شخصیت یا منتخب نمائندوں نے پپلاں میں دریائے سندھ پر متبادل پُل کی تعمیر کے لیئے وزیر اعلی پنجاب میاں محمد شہباز شریف سے نہ تو کوئی بات کی اور نہ ہی وزیر اعلی پنجاب کے علم میں پل کے متعلق کوئی تجویز دی ایسے لوگ صرف اخباری بیان بازی کے ذریعے اس حلقہ کے عوام کو دھوکا دے رہے ہیں پل کی تعمیر کے مسئلہ کو صرف میڈیا کے نمائندوں اور صحافیوں نے بھر پور انداز میں اجاگر کیا اور میں میڈیا کو عوامی مسئلہ اجاگر کرنے پر خراج تحسین اور مبارکباد پیش کرتا ہوں میرا اس حلقہ کے منتخب نمائندوں کو کھلا چیلنج ہے کہ اگر وہ اس بات پر مجھ سے مناظرہ کر لیں اور اگر وہ یہ بات ثابت کر دیں تو میں انکے حق میں دستبردار ہو جاونگا۔ انہوں نے کہا کہ اس حلقہ کے عوام نے بار بار جن لوگوں کو ووٹ دیکر اسمبلی میں بھیجا انہوں نے اس حلقہ کے عوام کے لیئے کچھ نہیں کیا اور جو لوگ کرپشن اور لوٹ مار کر کے اپنی جیبیں بھرنے میں مصروف ہیں انہیں عوام اچھی طرح جان چکے ہیں اس لیئے اب حلقہ کے عوام کا فرض ہے کہ ایسے لوگوں سے جان چھڑائیں اور نیک نام قیادت کو منتخب کریں صحافیوں کی طرف سے آئندہ الیکشن لڑنے بارے پوچھے گئے سوال کا جواب دیتے ہوئے صاحبزادہ سعید احمد نے کہا کہ انشاء اللہ اگلا الیکشن پی پی46سے ضرور لڑونگا اور عوام کے ووٹوں سے منتخب ہو کر اس حلقہ کو ضلع میانوالی کا ایک مثالی اور ترقی یافتہ حلقہ بناؤنگا۔ انہوں نے کہا کہ پپلاں میں نئے پل کی تعمیر کے لیئے2006میں ہونے والے سروے اور فزیبلٹی رپورٹ کو ہی اولیت دی گئی ہے اور میرے قائد مولانا فضل الرحمن نے وزیر اعلی پنجاب میاں محمد شہباز شریف سے ملاقات کر کے پل پپلاں میں ہی تعمیر کرانے کی منظوری کرائی ہے لیکن اس بجٹ میں پل کی تعمیر کے لیئے رقم نہ ہونے کیوجہ سے اگلے بجٹ میں اس کے لیئے فنڈز فراہم کرنے کا وعدہ کیا گیا ہے اور جب بھی پل کی تعمیر ہو گی وہ پپلاں میں ہی ہو گی جو لوگ اخباری بیان بازی کے ذریعے عوام کو دھوکا دے رہے ہیں اس میں کوئی صداقت نہیں انہوں نے کہا سابقہ الیکشن میں اس حلقہ کے عوام اور بالخصوص پپلاں کے شہریوں نے مجھ پر جس اعتماد کا اظہار کیا اس محبت کو میں کبھی بھی نہیں بھلا سکتا اور عوام کا قرض اتاروں گا پپلاں میں تعمیر ہونے والا پل اس شہر اور علاقہ کی ترقی کا ضامن ہو گا اور انشاء اللہ بہت جلد عوام یہ خوشخبری سن لیں گے۔
