پپلاں ( محمد رضوان آکاش) لاہور سے پپلاں آنے والی نجی ٹرانسپورٹ کمپنی کی مسافر بس نائٹ کوچ پر سیال موڑ کے قریب گزشتہ رات اڑھائی بجے کے قریب سرگودھا روڈ پر ڈکیتی کی واردات میں چھ نا معلوم ڈکیتوں نے اسلحہ کی نوک پر پپلاں اور دیگر علاقوں کے مسافروں سے ہزاروں روپئے کی نقدی چھین لی۔ بس میں سفر کرنے والے پپلاں کے مسافروں نے پپلاں پہنچنے پرڈکیتی کی ورادت بارے میڈیا کے نمائندوں کو تفصیلات بتاتے ہوئے کہا کہ ہم لاہور سے نجی ٹرانسپورٹ کمپنی کی نائٹ کوچ بس نمبر8696بی کے بی میں سوار ہو کر گزشتہ رات اپنے گھر آرہے تھے کہ موٹر وے سے اترتے ہی سیال موڑ کے قریب سرگودھا روڈ پر اسلحہ سے مسلح چھ نا معلوم افراد نے زبردستی بس روک لی اور چار افراد بس میں سوار ہو گئے جبکہ دو افراد 125موٹر سائیکل پر سوار ہو کر بس کی نگرانی کرتے رہے اور بس میں سوار ہونے والے ڈکیتوں نے ڈرائیور اور مسافروں پر اسلحہ تان لیا اور مسافروں کی تلاشی شروع کر دی جبکہ اسی دوران بس میں پچھلی سیٹ پر بیٹھے کسی مسافر نے پیٹرولنگ پولیس کے ایمرجینسی نمبر پر پولیس کوا طلاع دے دی جب نا معلوم ڈکیت مذکورہ مسافر نائٹ کوچ کو ایک ویران مقام پر لے جا رہے تھے کہ اسی دوران پیٹرولنگ پولیس ، ایلیٹ فورس اور پنجاب پولیس کی گاڑیاں بس کا تعاقب کرتے ہوئے پیچھے پہنچ گئیں جن کو دیکھتے ہی ڈکیتی کی واردات کے تمام ملزمان موقع سے فرار ہو گئے اور جاتے جاتے کئی مسافروں سے ہزاروں روپئے کی نقدی بھی ساتھ لے گئے جبکہ باقی ماندہ مسافر پولیس کی بر وقت کاروائی کی وجہ سے لٹنے سے بچ گئے۔ بسوں میں سفر کرنے والے مسافروں نے آئی جی پنجاب، آر پی او سرگودھا ڈویژن اور پولیس کے اعلی حکام سے مطالبہ کیا کہ کہ مسافر گاڑیوں میں سفر کرنے والے شہریوں کے تحفظ کے لیئے اقدامات اٹھائے جائیں اور وارداتوں میں ملوث لوگوں کا سراغ لگا کر انکے خلاف سخت تریں کاروائی کی جائے۔

QR Code: