داؤدخیل( نامہ نگار) چیف جسٹس آٖف پاکستان اور وزیر اعلیٰ پنجاب سے مطالبہ کرتے ہیں کہ ایسے اقدامات میں ملوث افراد کے خلاف قانونی کارروائی عمل میں لائی جائے۔ ان خیالات کا اظہار نو منتخب چیئرمین یونین کونسل موچھ مولوی عظمت اللہ خان نے پریس کانفرنس میں میڈیا سے گفتگو کرتے ہوئے کیا۔انہوں نے کہا کہ ڈسٹرکٹ بھر کے تھانوں میں رشوت کا بازار گرم ہے اور پولیس کی وردی میں ملبوس افراد تھانوں میں بیٹھ کر ڈاکے ڈالنے میں مصروف ہیں اور ایسے کئی افراد کے خلاف رشوت ثابت ہونے کے باوجود کوئی کارروائی نہ کرنا قانون کے محافظوں اور انصاف کی فراہمی کا دعویٰ کرنے والوں کے لیے سوالیہ نشان ہے ۔تھانوں میں ٹاؤٹوں کے ذریعے رشوت عام ہے جبکہ دوسری جانب وہی قانون کے رکھوالے شہریوں کو ماورائے عدالت جعلی پولیس مقابلوں میں قتل کرنے اور مضروب کرنے میں لگے ہوئے ہیں۔کل کوئی بے گناہ شہری بھی جعلی پولیس مقابلے کی بھینٹ چڑھ سکتاہے۔اگر آج عوامی نمائندے خاموش رہے تو یہی جعلی پولیس مقابلے سیاسی انتقام کے لیے بھی استعمال ہوسکتے ہیں۔کسی ملزم اور مجرم کو سزا دینا عدالت کا کام ہے۔جعلی پولیس مقابلے عدلیہ پر عدمِ اعتماد کے زمرے میں آتے ہیں۔یہ عدلیہ کی توہین ہے۔ انہوں نے کہا کہ میانوالی کے تمام منتخب عوامی نمائندے ایم این ایز، ایم پی ایز،چیف جسٹس آف پاکستان ،صدر پاکستان، وزیر اعظم پاکستان اور وزیر اعلیٰ پنجاب ان ماورائے عدالت جعلی پولیس مقابلوں کا نوٹس لیں ورنہ پولیس پر سے عوام کا اعتماد اُٹھ جائے گا۔
