لاہور: کراچی میں اپریشن صرف دہشت گردوں اور مجرموں کے خلاف کیا جارہاہے کوئی سیاسی پارٹی ان واقعات میں ملوث نہیں تو انہیں پریشان ہونے کی کوئی ضرورت نہیں ان خیالات کااظہارمسلم لیگ ن تاجرونگ پنجاب کے جنرل سیکرٹری الحاج زبیر احمد نے تاجربرادری کے وفودسے ملاقات کے دوران کیا۔انہوں نے کہا میاں نوازشریف کی قیادت میں سیاسی و عسکری قیادت نے کراچی میں ہر قیمت پر امن و امان قائم کرکے قانون کی بالادستی کا عزم کررکھاہے تاکہ عوام کے حقوق کا تحفظ کیا جا سکے۔دہشت گردی کے واقعات میں جو بھی ملوث ہوا اس کے خلاف بلاامتیاز ایکشن لیا جائے گا پاکستان نے انتہا پسندی اور دہشت گردی کی بڑی قیمت چکائی ہے اب سخت فیصلے کرنے کا وقت ہے جو لوگ حکومت کی رٹ تسلیم نہیں کریں گے قانون ان سے آہنی ہاتھوں سے نمٹنا جانتا ہے۔ پاکستانی عوام کا حق ہے کہ وہ چین اور سکون سے اس ملک کی ترقی کے لئے کام کریں بھتہ خوری، اغواء برائے تاوان، دہشت گردی، چوری ڈکیتی اور دیگر جرائم کے خاتمہ کے لئے حکومت نے اپنی ترجیحات کا تعین کرلیاہے اب ایسے عناصر کا مکمل فلع قمع کرنے کے لئے قانون نافذ کرنے والے ادارے آخری حد تک جائیں گے۔
