صرف سالانہ امتحانات پر نہیں بلکہ ہر انٹرنل ا متحان پر بھی اچھی کارکردگی پر طلبا کو سراہا جائے: ملک محمد اکرم اعوان
داؤدخیل(نامہ نگار) طلباکی حوصلہ ا فزائی ہر مرحلے پر ضروری ہے۔ صرف سالانہ امتحانات پر نہیں بلکہ ہر انٹرنل ا متحان پر بھی اچھی کارکردگی پر طلبا کو سراہا جائے۔ ہم اس روایت کو ضلع بھر کے تعلیمی اداروں کے لیے مثال بنائیں گے۔ یہ باتیں گورنمنٹ ہائی سکول جلالپور کے ہیڈماسٹر ملک محمد اکرم اعوان نے گزشتہ روز نوماہی امتحان میں پوزیشن ہولڈر طلبا میں انعامات تقسیم کرنے کی تقریب سے خطاب کے دوران کہیں۔ انہوں نے کہاکہ نصابی سرگرمیوں کے ساتھ ساتھ ہم نصابی سرگرمیاں بھی بہت اہمیت کی حامل ہیں۔ ہم طلبا کے ساتھ اچھی کارکردگی کا مظاہرہ کرنے والے اساتذہ کی بھی حوصلہ افزائی کرتے ہوئے انعامات سے نوازرہے ہیں۔ انہوں نے کہاکہ جب تک معلم اور متعلم مطمئن نہ ہوں تعلم معیاری نہیں ہوسکتا۔معلمین صدیق الرحمن اور محمد ندیم خان کی کارکردگی کو سراہتے ہوئے انعامات دیئے گئے۔ تقریب سے ماسٹر عتیق الرحمن، مہرحسین شاہ نے بھی خطاب کیا۔ اسٹیج سیکرٹری کے فرائض ظہور شاہ نے ادا کیے۔نرسری تا دہم پوزیشن حاصل کرنے والے طلبا میں انعامات تقسیم کیے گئے اور تمام طلبا کی پراگریس رپورٹس والدین کو بھجوائیں گئیں۔
Leave a Reply