داؤدخیل(نامہ نگار) صوبائی سیکرٹری تعلیم کی طرف سے چھ مئی دوہزار پندرہ کے جاری نوٹیفیکیشن کے مطابق پرائمری اور ایلیمنٹری اساتذہ کو گریڈ سولہ اور ایس ایس ٹی کو گریڈ سترہ دیاجائے۔ اپ گریڈیشن یکم جنوری دوہزار سولہ سے کردی جائے۔سرکاری سکولز کی نجکاری اساتذہ کی نجکاری اور بے روزگاری کے مترادف ہے۔ ڈسٹرکٹ ایجوکیشن اتھارٹی کا قیام ظالمانہ فیصلہ ہے۔ سکولز کا باربار کے تجربات سے گزار کر تعلیم کا بیڑا غرق کیاجارہاہے۔ اساتذہ کو اپ ڈیٹ کرنے کے بجائے صرف کورس تبدیل کیے جارہے ہیں۔ جس سے نتائج ٹھیک نہیں آتے تو سزا اساتذہ بھگت رہے ہیں۔ اب اساتذہ مزید زیادتی برداشت نہیں کریں گے۔ یہ باتیں اساتذہ راہنماؤں احمد خان صدیقی، محمد اقبال حجازی، سید صادق حسین شاہ، سید زاہد حسین شاہ،اعجاز انور جازی، عتیق الرحمن ڈی ٹی ای، شاہد خان، عبدالرشید، ثمینہ اشرف، خورشید احمد شاہ اور انجمن تاجران کالاباغ کے صدر عبدالرحمن فاروق نے گزشتہ روز کالاباغ لاری اڈا اور بعد ازاں ریلی کے بعد جلسہ عام سے خطاب کے دوران کہیں۔ مقررین نے کہاکہ بیس پچیس پچیس سال سے اساتذہ ایک ہی گریڈ میں سروس کرکے ریٹائر ہوجاتے ہیں جبکہ پولیس کا سپاہی ایس ایچ او ، ڈی ایس پی بن جاتاہے اور فوج کا سپاہی حوالدار سے صوبیدار بن جاتاہے۔ سب ملازمین کی طرح اساتذہ کو بھی ترقی دی جائے۔ ٹائم سکیل سے ہم محروم ہیں۔ ہم محمد عربی کے سپاہی ہیں جو آج اپنے جائز حقوق کے لیے سڑکو ں پر مارے مارے پھرتے ہیں۔ حکمرانوں کو شرم نہیں آتی۔ مقررین نے کہاکہ جب تک استاد ذہنی طور پر مطمئن نہ ہوگا وہ بہتر تعلیم نہیں دے سکتا۔انہوں نے کہاکہ پے پیکیج اور ان سروس پروموشن کے لیے جان بوجھ کے محکمہ تعلیم کے نااہل ذمہ داران اساتذہ کی حق تلفی کرتے آرہے ہیں۔ کئی کئی سال پے پیکیج تک نہیں دیاجاتا۔ اب ہم سب ذمہ داران کو اعلیٰ عدلیہ تک بھی لے کے جائیں گے۔ ہم حق دار اساتذہ کو پے پیکیج مقرر تاریخ سے دلوائیں گے۔مقررین نے کہاکہ اکتیس جنوری کو ہماری یونین کی مرکزی قیادت کے اعلان پر ہم کلاس پنجم اور کلاس ہشتم کے پیک امتحانات کا مکمل بائیکاٹ کریں گے۔ انہوں نے کہاکہ پنجاب کے اساتذہ کے گریڈ بھی دوسرے صوبوں کے مطابق کیے جائیں۔لاری اڈا کالاباغ جلسہ کے بعد اساتذہ نے قریبی ایک مقامی ہوٹل تک احتجاجی ریلی نکالی۔ ریلی میں مرد وخواتین اساتذہ نے اپنے مطالبات کے حق میں بینرز اور کتبے اُٹھارکھے تھے۔ اساتذہ قائدین نے جلد اس احتجاجی سلسلے کو بڑھانے اور پھیلانے کے عزم کا اظہار بھی کیا۔اس موقع پر پولیس اور دیگر خفیہ اداروں کے اہلکار بھی لمحہ بہ لمحہ رپورٹنگ بھیجتے رہے۔
