پپلاں(محمد رضوان آکاش) پی ٹی آئی پنجاب کے ڈپٹی آرگنائزراور ڈپٹی اپوزیشن و ڈپٹی پارلیمانی لیڈر پنجاب سردار محمد سبطین خان نے پی ٹی آئی میانوالی کی ضلعی آرگنائزنگ کمیٹی کی سر براہی قبول کرنے سے معذرت کر لی، اپنے فیصلہ بارے صحافیوں سے گفتگو کرتے ہوئے سردار محمد سبطین خان نے کہا کہ میں نے چئیرمین پی ٹی آئی عمران خان اور اعلی قیادت کو بھی اس فیصلہ کے متعلق آگاہ کر دیا ہے اور پارٹی قیادت کو تجویز پیشکرتے ہوئے اپیل کی ہے کہ وہ میانوالی سے پارٹی کے منتخب ممبر قومی اسمبلی امجد علی خان اور سابق ضلعی صدر و ممبر صوبائی اسمبلی ڈاکٹر صلاح الدین خان کے درمیان پائے جانے والے تحفظات ختم کر کے اُن کے درمیان صلح کروائیں اور ضلعی آرگنائزنگ کمیٹی کے کنونیئر اور ڈپٹی کنونیئر کی ذمہ داریاں بھی اُنکو سونپی جائیں ہم اُن کے ساتھ کام کرنے پر تیار ہیں ۔ انہوں نے کہا کہ میرے پاس پہلے ہی پنجاب اسمبلی میں ڈپٹی اپوزیشن و ڈپٹی پارلیمانی لیڈر کی ذمہ داریاں ہیں جبکہ پارٹی قیادت نے مجھے پی ٹی آئی پنجاب کا ڈپٹی آرگنائزر بھی مقرر کر کے جو اہم ذمہ داریاں سونپی ہیں انکو احسن طریقے سے ادا کرنے کی خاطر میں مزید بوجھ اٹھانے سے قاصر ہوں انہوں نے کہا کہ مجھے نہ تو ضلعی آرگنائزنگ کمیٹی کی سربراہی لینے کا شوق ہے اور نہ ہی میں اسکا خواہش مند ہوں لیکن جن دوستوں اور ساتھیوں نے اس عہدے کے لیئے میرا نام پارٹی قیادت کے سامنے تجویزکیا تھا اور مجھ پر جس اعتماد کا اظہار کیا میں سب لوگوں کا خلوص دل سے شکر گزار ہوں اور پارٹی قیادت کی طرف سے جس کو بھی ضلع میانوالی میں یہ اہم ذمہ داری سونپی جائے تو مجھے کسی پر کوئی بھی اعتراض نہیں میں سب کے ساتھ کام کرنے کو تیار ہوں میری خواہش کہ پارٹی کارکنوں کو متحد کیا جائے اور سب کارکن یونٹی کامظاہرہ کر کے ایک پلیٹ فارم پر جمع ہو کر پارٹی کے لیئے کام کریں کیونکہ ضلع میانوالی چئیرمین عمران خان کا گھر اور پارٹی کا مضبوط قلعہ ہے اگر پارٹی کارکنوں میں اختلاف ہو گا تو اسکا نقصان پارٹی کو ہو گا انہوں نے کارکنوں سے اپیل کی کہ وہ پارٹی میں انتشار پیدا کرنے والے لوگوں کے عزائم کو ناکام بنائیں اور ہر سازش کا ڈٹ کر مقابلہ کریں سردار محمد سبطین خان نے کہا کہ پارٹی کا ہر ورکر اور کارکن پارٹی کا قیمتی سرمایہ ہے اور ہمیں اپنے پارٹی کارکنوں اور ورکروں کی قربانیوں پر فخر ہے جو لوگ پارٹی کے خلاف سازشیں کر کے اسے کمزور کرنے کی خواہش رکھتے ہیں انشاء اللہ انکو ناکامی ہو گی اور بلدیاتی الیکشن میں پاکستان تحریک انصاف ضلع میانوالی سے جنرل الیکشن کی طرح ایک بار پھر بھر پور کامیاب ہو گی۔
