رمضان بازار میں سہولتوں کی عدم فراہمی اور اے سی پپلاں پر کرپشن کے الزامات
پپلاں( محمد رضوان آکاش)پپلاں میں لگائے گئے رمضان بازار کے دکانداروں کو سہولتوں کی عدم فراہمی اور اے سی پپلاں پر کرپشن کے الزامات لگانے والے پپلاں کے تاجر خواجہ منظور کو انتظامیہ نے زبان بندی کرنے کے لیئے ایک ماہ کے لیئے میانوالی جیل بھجوا دیا، تاجروں اور شہریوں کا انتظامیہ کی انتقامی کاروائی پر اظہار افسوس، پپلاں کے معروف تاجر خواجہ منظور نے گزشتہ دنوں پپلاں میں لگائے گئے رمضان بازار میں چھوٹے چھوٹے دکانداروں کو شامیانے فراہم نہ کرنے اور رمضان بازار کے فرنٹ پر کناتیں نہ لگانے سمیت دکانوں کی ا لاٹمنٹ کے سلسلہ میں ہونے والی قرعہ اندازی سمیت دیگر مطالبات پیش کرنے کے لیئے رمضان بازار کا دورہ کرنے والے ڈی سی او میانوالی اور دیگر اعلی افسران کے سامنے دیگر تاجروں کے ہمراہ شدید احتجاج کیا تھا جبکہ اسسٹنٹ کمشنر پپلاں فضل اکبر کے خلاف کرپشن کرنے کے الزامات بھی لگائے تھے جس پر انتظامیہ نے گزشتہ روزاسے ایک ماہ کے لیئے میانوالی جیل بھجوا دیا۔ جیل میں ملاقات کے لیئے جانے والے تاجروں اور شہریوں سے دوران ملاقات گفتگو کرتے ہوئے خواجہ منظور نے کہا کہ انتظامیہ کی طرف سے میرے خلاف کی جانے والی کاروائی صرف اور صرف انتقامی بنیاد پر کی جا رہی ہے اور انتظامیہ کو ڈر ہے کہ اگر رمضان بازار کے دورہ پر کوئی اعلی افسران کی ٹیم آئی تو ہم تاجروں کے مسائل پر دوبارہ احتجاج کریں گے یہی وجہ ہے کہ مجھے زبان بند رکھنے کے لیئے جیل بھجوایا گیا لیکن ہمیں غریب اور چھوٹے دکانداروں کے حق کے لیئے آواز بلند کرنے سے نہیں روکا جا سکتا انشاء اللہ ہم انصاف کے حصول کے لیئے اعلی عدالت کا دروازہ کھٹکھٹائیں گے اور ہمیں امید ہے کہ عدالت سے ہمیں انصاف ضرور ملے گا انہوں نے تاجروں سے کہا کہ جیلیں ہمیں حق اور سچ بات کہنے سے نہیں ڈرا سکتیں انشاء اللہ ہم تاجر بھائیوں کے حق کی خاطر ہر قربانی دینے کو تیار ہیں۔
Leave a Reply