داؤدخیل(ذوالفقارخان) حسن خیل اور شریف خیل قبائل کے درمیان پچاس سالہ پرانی دُشمنی صلح میں بدل گئی۔ پچاس کے عشرے میں مہرخان حسن خیل نے اپنے ماموں مقدر خان شریف خیل کے بیٹے ارسلا خان کو قتل کیا اور بدلے میں مقدر خان کے بیٹے عطااللہ خان،فتح خان وغیرہ مہرخان کے بھائی اسلم خان کو قتل کردیا۔ مہرخان کو ارسلا خان کے قتل میں بیس سال قید کی سزا ہوئی جبکہ اسلم خان کے قتل میں عطااللہ خان وغیرہ بری ہوگئے تھے۔ بعدازاں ایک اور مقدمے میں عطااللہ خان کو سزائے موت ہوگئی اور فتح خان کسی اور دشمنی میں قتل ہوگئے تھے۔ساٹھ سال سے یہ دشمنی چلی آرہی تھی۔ حبیب اللہ خان بُڑا وغیرہ کی کوششوں سے صلح ممکن ہوئی۔ صلح کی تقریب جامع مسجد اسکندرآباد میں منعقد ہوئی۔ تقریب سے خطاب کرتے ہوئے خادمِ میانوالی مولوی عظمت اللہ خان نے کہاکہ دوبھائیوں کے درمیان صلح کراناایک مقبول حج کے برابر ہے۔ معاف کرنے والے عزت اور ظالم ذلت پاتے ہیں۔کسی بھی مسئلے کا حل آپس میں گفتگو اور پنچائت سسٹم میں موجود ہے۔ انہوں نے کہاکہ برداشت کلچر کو فروغ دیاجائے۔انہوں نے کہاکہ اگر ہم اللہ کے آخری رسول محمد مصطفیﷺ کے فرامین پر عمل کریں تو آپس کی دشمنی مٹ جائیں۔ برادری میں صلح کرانا سب سے اہم فریضہ ہے۔ قتل جیسے گناؤنے فعل سے خاندان تباہ ہوجاتے ہیں۔قریبی رشتے ٹوٹ جاتے ہیں۔ مائیں بہنیں اُجڑ جاتی ہیں اور بچے یتیم ہوجاتے ہیں۔ انہوں نے کہاکہ اگر آج معاشرے لُچے لفنگوں سے نفرت اور شریف آدمی کی عزت شروع کردے تو لوگ شریف بننے میں فخر محسوس کریں گے۔ معاشرہ سے جوا، سود اور شراب جیسے لعنتیں ختم ہوں تو لڑائی جھگڑے بھی ختم ہوجائیں۔ انہوں نے کہاکہ دو بھائیوں کے درمیان صلح کرانے کے لیے جھوٹ بھی بولناپڑجائے تو اللہ ایسے جھوٹ کو بھی معاف کردیتے ہیں۔قرآن صلح کرانے والے کو پسند اور شرپسند کو سخت ناپسند کرتاہے۔ سابق کونسلر حبیب اللہ خان بُڑا نے کہاکہ صلح کرانے کے لیے بہت مشکلات اور کڑوی کسیلی باتوں کا سامنا کرناپڑتاہے لیکن صلح کے لیے کوششیں کرنے والے اللہ کے نزدیک پسندیدہ لوگ ہوتے ہیں۔ ہم گناہ گار مسلمان ہیں۔ ہمارے پیارے حبیب ﷺ نے تو کفار کے ساتھ بھی صلح کرنے کو ترجیح دی۔مولانا مفتی ضیاالرحمن او ر پیر مرید رضا شاہ نے دُعا کرائی۔ حاجی تاج محمد اعوان نے تقریب کا انتظام کیا جبکہ جامع مسجد اسکندرآباد کے ایک طالب علم تلاوت و نعت کی سعادت حاصل کی۔ صلح کی تقریب میں حسن خیل قبیلہ کی طرف سے کرم دادخان، صاحب دادخان، شہباز خان، محمد اسلم خان، عمر حیات خان، عالم خان، سرفرازخان، یعقوب خان، اسکندرخان، ڈاکٹر حبیب اللہ خان، امیرعبداللہ خان، حمید اللہ خان،یوسف خان، ذوالفقارخان وغیرہ جبکہ شریف خیل قبیلہ کی طرف سے صوبیدار حمید اللہ خان، صورت خان، غلام محمد خان،عطااللہ خان،مصطفی خان،خالد خان،اولیا خان،علی خان ودیگر موجود تھے۔ جبکہ سابق چیئرمین حمیداللہ خان امیرے خیل، حاجی محمد حسین، حاجی غلام قاسم، حاجی ملک شیرخان، ملک بشیر خان،عزیزاللہ سعید،ملک ممتاز احمد، ملک غلام مرتضیٰ،ملک محمد زمان اعوان، خالد فاروق اعوان، ملک عمیررضا،ملک اللہ یار، حاجی غلام قادر،سابق کونسلر ملک فلک شیراعوان، ملک شاہ نواز،سابق کونسلر حفیظ اللہ خان سالار، ملک دوست محمد، ملک مہرمحمد، لطیف اللہ خان آف موچھ ودیگر درجنوں معززین علاقہ بھی صلح کی تقریب میں خصوصی طور پر شریک ہوئے۔تقریب کے اختتام پر دونوں قبائل کے بزرگ اور نوجوان ایک دوسرے سے گلے ملے اور آئندہ کے لیے اتفاق اور محبت سے مل جل کررہنے کا عزم کیا۔
