لاہور(ایف یو نیوز)سربراہ تحریک صراط مستقیم پاکستان ڈاکٹر محمد اشرف آصف جلالی نے کہا کہ حضرت عثمان غنیؓ عشق رسول ﷺ اور اطاعت رسول ﷺ کے بہت بڑے علمبر دار تھے۔دین اسلام کو ہر طرف غالب کرنے کی خاطر آپکی خدمات تاریخ اسلامی کا روشن باب ہے ۔آپکے دور خلافت میں بہت سے ممالک فتح ہوئے اور اسلامی نظام کے احکام زمین پر رائج کیئے گئے۔ان خیالات کا اظہار انہوں نے خلیفہ سوئم امیر المؤمنین حضرت عثمان غنی رضی اللہ تعالیٰ عنہ کے یوم شہادت پر انہیں خراج تحسین پیش کرتے ہوئے کیا انہوں نے کہا کہ حضرت عثمان غنی ذوالنورین سخاوت کا سرچشمہ اور حیاء کے پیکرتھے۔آپنے اپنی ساری زندگی اسوۂ حسنہ کی روشنی میں بسر کی آپ تاریخ انسانیت کی وہ منفرد شخصیت ہیں جن کے عقد نکاح میں یکے بعد دیگرے ایک ہی پیغمبر کی دو شہزادیاں آئیں۔آپکی دولت نے اسلام کی نشرو اشاعت میں بنیادی کردار ادا کیا۔آپ نے اپنی جان تو پیش کردی مگر اُمت مسلمہ میں خون خرابہ نہیں ہونے دیا ۔زبان رسالت نے آپکو کئی بار جنتی قرار دیا اور آپکے فضائل و مناقب بیان کیے۔
