میانوالی (سٹاف رپورٹر)سابق ناظم یوسی وتہ خیل امیرعبداللہ خان وقاص نے پریس کانفرنس کرتے ہوئے کہاکہ حالیہ بارشوں سے صرف عیسیٰ خیل متاثر نہیں ہوا بلکہ پورا ضلع شدید متاثر ہوا ہے۔یوسی ماڑی،یوسی رورل داؤدخیل، یوسی اربن داؤدخیل، یوسی ڈھیراُمیدعلی شاہ، یوسی پائی خیل، یوسی موچھ، یوسی سوانس، روکھڑی،میانوالی شہر، موسیٰ خیل، واں بھچراں، کندیاں اور دیگر درجنوں علاقہ جات میں غریب لوگوں کا جانی و مالی نقصان ہواہے۔ لیکن ہمارے نام نہاد عوامی نمائندگان کہاں گم ہوچکے ہیں۔ کوئی آواز بلند کرنے والا نہیں۔تحصیل میانوالی اور تحصیل پپلاں کے سیاسی نمائندگان ستو پی کے سو تے رہے اور وزیراعظم پاکستان عیسیٰ خیل کا دورہ کرکے واپس چلے گئے۔ وزیراعظم جناب محمد نواز شریف نے حلقہ این اے اکہترکے ایم این اے عبیداللہ خان شادی خیل سے مزید ضروریات کا پوچھا تو عوامی نمائندے نے مزید کچھ عوام کے لیے مانگنے کے یہ کہہ کر بات ختم کردی کہ پھر کبھی بتائیں گے۔ امیرعبداللہ وقاص نے کہاکہ کیا نمائندگی اسی کا نام ہے کہ عوام سیلاب میں مرتے رہیں، ان کے مکان گرتے رہیں، ان کی فصلیں تباہ ہوتی رہیں اور حکومت صرف پٹواریوں سے سروے کراکے ٹرخاتی رہے۔ ان علاقوں کے یہ کیسے بے حس نمائندے ہیں جو ووٹ لینے کے لیے تو رات دن غریبوں کے در پر پہنچ جاتے ہیں مگر اب غریب کا کوئی پُرسانِ حال نہیں۔ سابق ناظم یوسی وتہ خیل نے کہاکہ اگر کچھ دن تک تحصیل میانوالی اور تحصیل پپلاں کے متاثرہ علاقہ جات کے لیے ان علاقوں کے حکومتی و غیر حکومتی نمائندوں نے آواز بلند نہ کی۔ غریبوں کی داد رسی نہ کرائی تو ہم سڑکوں پر نکلیں گے۔ ہمارا احتجاج غریب عوام کے شانہ بشانہ ہوگا۔ غریب کے حقوق کے حصول تک یہ احتجاج پھر جاری رہے گا۔ میری خادم اعلیٰ پنجاب محمد شہباز شریف او ر وزیرِ اعظم پاکستان محمد نواز شریف سے اپیل ہے کہ وہ خود ہی ہمارے محروم علاقوں کے لیے ایک بڑے پیکیج کا اعلان کریں ورنہ تو سُتو پی کر سوئے ہوئے ہمارے سیاسی نمائندے غریب عوام کی تقدیر بھی سُلا دیں گے۔
