داؤدخیل(نامہ نگار) ہماری کارکردگی کاتھانہ ریکارڈ گواہ ہے۔دریائی چیک پوسٹ کی وجہ سے اسلحہ کی سمگلنگ ختم ہوچکی ہے۔ داؤدخیل میں منشیات اور جوا آخری ہچکیاں لے رہے ہیں۔ جرائم پیشہ افراد کو بچانے کے لیے بلیک میل کرنے والے کبھی کامیاب نہیں ہونگے۔ یہ باتیں گزشتہ روز تھانہ داؤدخیل کے ایس ایچ او عبدالغفور گُجر نے اپنی تعیناتی کے دو ماہ کی کارکردگی بیان کرنے کے لیے بلائی گئی پریس کانفرنس کے دوران کیں۔ انہوں نے کہاکہ داؤدخیل میں جوا اور منشیات کا تقریباََ خاتمہ کردیاگیاہے۔ سود خوروں کے خلاف پرچے دیئے اور بہت سے متاثرین کی داد رسی کرائی۔ ان دو ماہ میں دولاکھ روپے اور بھینس چوری کی واردات ٹریس کی۔ تقریباََ نولاکھ روپے جوا کی مدد میں برآمد کیے۔ 392 کے سات مقدمات میں کامیابی ملی، اسلحہ کے سولہ کامیاب کارروائیاں کی گئیں۔ دو موٹر سائیکل اور تین لاکھ روپے کی سرکاری لکڑی کی چوری کے ملزمان گرفتارکیے۔ نو اشتہاری ملزمان کو گرفتار کیا۔ جبکہ آٹھ اے اور دس بی کیٹگری کے اشتہاریوں کے گرد ہم گھیرا تنگ کرچکے ہیں۔ ایس ایچ او عبدالغفور گجر نے کہاکہ اس بار عید پر داؤدخیل میں جوا کا نام و نشان تک نہ تھا اور نہ ہی شراب نوشی ہوسکی۔۹ سی کے تیرہ مقدمات میں سولہ کلو منشیات برآمد کی۔ ایک بھتہ خور ملزم گرفتارکیا۔سات ڈکیتی میں ملوث تین گروہوں کو گرفتار کرچکے ہیں۔ دریائی چیک پوسٹ پر ہمارے انچارج چیک پوسٹ اور سپاہیوں نے اسلحہ اسمگلرز کو پکڑا۔ ایس ایچ او نے کہاکہ ماڑی شہر میں نیاز حسین نامی شخص جو پولیس کو پریس کانفرنس وغیرہ کے ذریعے دباؤ میں لانے کی کوشش کررہاہے دراصل اُس کے بیٹے کو منشیات سمگلنگ میں دریائی چیک پوسٹ کے اہلکاروں نے رنگ ہاتھوں گرفتار کیاہے۔وہ اس کیس سے بیٹے کو نکلوا کر ساتھ والی بندے کو پھنسوانا چاہتاتھا۔ پولیس نے میرٹ پر فیصلہ کیاتو وہ انتقامی کارروائی پر اُتر آیاہے۔ وہ اپنی سیاسی اور مقامی دھونس دھاندلی کے ذریعے بیٹے کو بچانا چاہتاہے مگر قانون کسی کے ساتھ ہرگز زیادتی نہیں کرے گا۔ عبدالغفور گجر نے کہاکہ دریائی چیک کی عمدہ کارکردگی پر انعام بھی مل چکاہے۔ ہم بُرے اور جرائم پیشہ افراد کے خلاف جہاد کررہے ہیں۔ شہری ہمارا ساتھ دیں ، ہمیں اپنے مسائل سے آگاہ کریں ہم ان کا تحفظ کریں گے۔انہوں نے دہشت گردی سے نمٹنے کے لیے جناح بیراج او ر کینال کالونی داؤدخیل چائنیز انجینئرز اور اہلکاروں کے تحفظ بارے کہاکہ ایک جگہ بیاسی اور دوسری جگہ ایک سو دو پولیس کے چاک و بند نوجوان سیکورٹی کے فرائض سرانجام دے رہے ہیں۔ اس موقع پر موجود دریائی چیک پوسٹ ککڑانوالہ کے انچارج محمد اقبال نے کہاکہ ہم اپنے فرائض دیانتداری سے ادا کررہے ہیں۔ ہمارے جوان رات دن دریا کے راستوں کی نگرانی پوری جانفشانی سے کررہے ہیں۔ ہم کسی سمگلر اور جرائم پیشہ دیگر افرادسے کسی قسم کی رو رعایت نہیں کریں گے۔

QR Code: