جب ہم اللہ کو گواہ کرکے عہدکرتے ہیں تو پھر ہمیں عہد نبھانا ہوگاورنہ کامیابی نہیں ملے گی: بلال قدرت بٹ
داؤدخیل(ذوالفقارخان) جب تک ذمہ داران اپنی ذمہ داریاں ادا نہیں کریں گے ، نیچے بھی لوگ ذمہ داری ادا نہیں کرتے۔ جب ہم اللہ کو گواہ کرکے عہدکرتے ہیں تو پھر ہمیں عہد نبھانا ہوگاورنہ کامیابی نہیں ملے گی۔ یہ باتیں جماعت اسلامی پنجاب کے جنرل سیکرٹری بلال قدرت بٹ نے گزشتہ سہ پہر کالاباغ میں جماعت اسلامی کے اراکین و متفقین کے اجلاس سے گفتگو کرتے ہوئے کہیں۔ انہوں نے کہاکہ فلاح اُخروی ہمارا مقصد ہے مگر دُنیا کی کامیابی بھی ضروری ہے۔ بلال قدرت نے کہاکہ انقلاب صرف خواہشوں اور آرزوؤں سے نہیں آتے اس کے لیے عملی جدوجہد کی ضرورت ہوتی ہے۔ انہوں نے کہاکہ ہمارے اراکین کو ہرتھانہ کی سطح پر خود کو منظم کرنا ہوگا۔ تھانہ ، کچہری میں عوام کو درپیش مسائل کے حل کے لیے بھی بڑھ چڑھ کر آگے آنا ہوگا ورنہ عام آدمی جماعت اسلامی کی طرف راغب نہیں ہوگا۔انہوں نے اراکین کو کہاکہ اپنے اپنے علاقہ میں شباب ملی، تحریک محنت اور دیگر برادر تنظیموں کے بھی یونٹس قائم کریں تاکہ عوام کو زیادہ سے زیادہ ریلیف ملے اور جماعت اسلامی کو عوامی پذیرائی حاصل ہو۔ بعد ازاں جماعت اسلامی پنجاب کے جنرل سیکرٹری کی ملاقات این اے اکہتر سے مسلم لیگ ن کے ایم این اے عبیداللہ خان شادی خیل بھی مختصر وقت کے لیے ملاقات ہوئی۔ اس موقع پر جماعت اسلامی عیسیٰ خیل کے راہنما خورشید خان، عبدالرحمن فاروق، امیر ضلع جاویداقبال ساجد، مزدور لیڈر اور پی پی چوالیس کے گروپ لیڈر عبدالوہاب نیازی،الطاف حسین کلو، ضیااللہ، غلام فاروق، محمد سعید اعظمی، ریاض خالق، عبداللہ خان، ملک محمد ممتاز، منیب الرحمن چغتائی و دیگر افراد بھی موجود تھے۔
Leave a Reply