داؤدخیل(نامہ نگار) تھانہ داؤدخیل میں رشوت کا بازار گرم ہے۔شہر میں پرچی جوا اپنے عروج پر ہے۔منشیات کا سلسلہ بھی جاری۔ ڈکیتیوں کی ایف آئی آر دینے کے بجائے ملزمان سے مک مکا جاری ہے۔ سرکاری املاک کونقصان پہنچانے والوں کو رشوت لے کر مقدمات سے فارغ کردیاجاتاہے۔ ایس ایچ او اور محرر رشوت لینے میں براہ راست ملوث ہیں۔ینگ انقلابی ویلفیئر سوسائٹی کے صدر سردار خان اور جنرل سیکرٹری حبیب الرحمن خان نے میڈیا کو بتایاکہ تھانہ داؤدخیل پولیس نے سرفراز خان ورک جیسے فرض شناس ڈی پی او کو اندھیرے میں رکھ کر رشوت کا بازار گرم کررکھاہے۔ داؤدخیل شہر میں پرچی جوا اپنے عروج پر ہے۔بچے سے لے کر بزرگ تک پرچی جوا سے متاثر ہورہاہے۔پولیس لڑائی جھگڑے کے کیس سے لے کر ڈکیتی جیسی وارداتوں تک میں رشوت لے رہی ہے۔ہم خود ان کی رشوت خوری کے عینی شاہدین ہیں۔ ریلوے کی لکڑی کی چوری کے بڑے سرغنے کو رشوت لے کر چھوڑ دیاگیا ۔اسی طرح ڈکیتی کے ملزمان کو کئی کئی دن تھانے میں رکھاجاتاہے مگراُن کے خلاف ایف آئی آر درج نہیں کی جاتی۔ اس طرح متاثرین کوتنگ کرکے صلح پرمجبور کیاجاتاہے۔جبکہ دوسری طرف ملزمان سے بھاری رقم بٹوری لی جاتی ہے۔ سردار خان اور حبیب الرحمن خان نے کہاکہ منشیات کا سلسلہ بھی ابھی تک جاری ہے۔ گردونواح کے کئی افراد اب بھی منشیات کے لیے داؤدخیل میں دیکھے جاتے ہیں۔ جبکہ دوسری طرف ایس ایچ او تھانہ داؤدخیل چوہدری عبدالغفور گجر نے بتایاکہ ہم میرٹ پر اپنے فرائض سرانجام دے رہے ہیں۔ نام نہاد سفید پوشوں کی جب ہم ناجائز بات نہیں مانتے تو یہ بیان بازی پر اُتر آتے ہیں۔ داؤدخیل کے بڑے بڑے منشیات فروش گرفتار ہوکر جیل کی ہوا کھارہے ہیں۔ رشوت کا الزام بھی بے بنیاد ہے۔ڈکیتی کے ملزمان جیسے ہی گرفت میں آتے ہیں ، مدعی فوراََ صلح کرکے ملزمان کی بے گناہی لکھ دیتے ہیں۔ پرچی جوا اور منشیات فروشی کا قلع قمع ہونے کے قریب ہے۔ بارش کے دنوں میں کچھ محلوں میں پانی بھرجانے سے پولیس کی رسائی میں مسئلہ رہا مگر اب وہاں بھی آئے روز ہم ایکشن کررہے ہیں۔ اگر کسی شہری کو پرچی جوا، منشیات فروش یا دیگر جرائم پیشہ افراد کا معلوم ہو، وہ پولیس کو اطلاع کریں ۔ پولیس فوراََ ایکشن کرے گی۔ البتہ پولیس نام نہاد سفید پوشوں کے ہاتھوں کبھی بھی بلیک میل نہیں ہوگی۔اگر کسی کو پولیس کے خلاف شکایت ہے تو وہ ثبوتوں کے ساتھ بات کرے۔

QR Code: